- મહારાષ્ટ્ર પેટાચૂંટણીમાં કોંગ્રેસે ભાજપ પાસેથી છીનવી આ સીટ
- દોઢ વર્ષ બાદ પશ્ચિમ બંગાળમાં પણ ખાતું ખુલ્યું
- છ બેઠકોમાંથી ત્રણ બેઠકો જીતવામાં સફળ રહી કોંગ્રેસ
પૂર્વોત્તરના ત્રિપુરા, મેઘાલય અને નાગાલેન્ડ વિધાનસભામાં કોંગ્રેસના હાથે ભલે નિરાશા લાગી હોય, પરંતુ 5 રાજ્યોની પેટાચૂંટણીના પરિણામોએ કોંગ્રેસનો ઉત્સાહ વધાર્યો છે. મહારાષ્ટ્રની 27 વર્ષથી ભાજપના કબજામાં રહેલી બેઠક કોંગ્રેસે છીનવી લીધી છે, જ્યારે તમિલનાડુમાં પણ જીત મેળવવામાં સફળ રહી છે. કોંગ્રેસ દોઢ વર્ષ બાદ પશ્ચિમ બંગાળમાં ખાતું ખોલવામાં સફળ રહી છે. પાંચ રાજ્યોની છ બેઠકો પર યોજાયેલી પેટાચૂંટણીમાં કોંગ્રેસ ત્રણ રાજ્યોમાં ત્રણ બેઠકો જીતવામાં સફળ રહી.
કોંગ્રેસને મોટો ફાયદો
મહારાષ્ટ્રની કસ્બા પેઠ, ચિંચવાડ, બંગાળની સાગરદિઘી, ઝારખંડની રાયગઢ, તમિલનાડુની ઈરોડ, અરુણાચલ પ્રદેશની લુમલા બેઠક પર પેટાચૂંટણી યોજાઈ છે. આ પાંચ રાજ્યોની છ બેઠકો પર યોજાયેલી પેટાચૂંટણીમાં ભાજપને સૌથી મોટો ફટકો પડ્યો છે, જ્યારે કોંગ્રેસને મોટો ફાયદો થયો છે.
27 વર્ષ બાદ ભાજપે ગુમાવી સીટ
મહારાષ્ટ્રની કસ્બા પેઠ સીટ કોંગ્રેસે ભાજપને હરાવીને જીતી લીધી છે. ભાજપે 27 વર્ષ બાદ આ બેઠક ગુમાવી છે. આ બેઠક પર ભાજપે હેમંત રસાને અને કોંગ્રેસે રવિન્દ્ર ધંગેકરને ચૂંટણીના મેદાનમાં ઉતાર્યા હતા. આ વચ્ચે કોંગ્રેસના ઉમેદવાર રવિન્દ્ર ધંગેકરનો વિજય થયો છે. 1995પછી ભાજપે આ બેઠક ગુમાવી છે. આ બેઠક પરની જીતથી કોંગ્રેસની સાથે-સાથે મહાવિકાસ આઘાડીના ઉત્સાહમાં વધારો થયો છે. આદિત્ય ઠાકરેએ કહ્યું કે, આ મહાવિકાસ આઘાડીની જીત છે, જે રીતે પાર્ટી તોડવામાં આવી અને આ બધુ મહારાષ્ટ્રની જનતાએ જોયું છે. કોંગ્રેસે આ સીટ ભાજપ પાસેથી છીનવી લીધી છે.
આ બેઠક પર ભાજપના ઉમેદવારની જીત
મહારાષ્ટ્રની ચિંચવાડ વિધાનસભા બેઠક પર ભાજપે જીત મેળવી છે. ચિંચવાડમાં ભાજપના પૂર્વ ધારાસભ્ય લક્ષ્મણ જગતાપના પત્ની અશ્વિની જગતાપનો વિજય થયો છે. તેમણે NCPના નાના કાટેને હરાવ્યા છે. ભાજપે ભલે એક બેઠક બચાવી હોય, પરંતુ કસ્બા પેઠ બેઠક ગુમાવવી તેના માટે મોટો ઝટકો માનવામાં આવે છે.
તમિલનાડુમાં કોંગ્રેસની જીત
તમિલનાડુની ઈરોડ પૂર્વ સીટ પર કોંગ્રેસના ઉમેદવાર ઇવીકેએસ એલંગોવન AIADMKના કે.એસ થેન્નારાસ્રુને હરાવીને ધારાસભ્ય બન્યા છે. આ સીટ પર એલંગોવનના પુત્ર અને કોંગ્રેસના ધારાસભ્ય ઈ થિરુમહન ઈવરાના અવસાનના કારણે આ બેઠક પર પેટાચૂંટણી યોજાઈ હતી. કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેએ દાવો કર્યો હતો કે કોંગ્રેસની નિશ્ચિત છે કારણ કે દરેકને આશા હતી. અમારી પાર્ટીના લોકોને જીતનો ઘણો વિશ્વાસ છે અને અમે મોટા માર્જિનથી જીતી રહ્યા છીએ. ડીએમકે-કોંગ્રેસનું ગઠબંધન હતું, જેનો ફાયદો કોંગ્રેસને થયો છે.
પશ્ચિમ બંગાળમાં પણ ખુલ્યું ખાતુ
પશ્ચિમ બંગાળની સાગરદિઘી વિધાનસભા બેઠક પર પેટાચૂંટણી ટીએમસી નેતા સુબ્રત સાહાના નિધનને કારણે યોજાઈ હતી. અહીંથી ટીએમસીએ દેબાશીષ બેનર્જી, ભાજપને દિલીપ સાહા અને કોંગ્રેસે બાયરન બિસ્વાસને મેદાનમાં ઉતાર્યા હતા. કોંગ્રેસે ટીએમસી પાસેથી આ સીટ છીનવી લીધી છે. કોંગ્રેસના બાયરન બિસ્વાસ ટીએમસીના દેબાશીષ બેનર્જીને હરાવીને ધારાસભ્ય બન્યા છે. બંગાળમાં કોંગ્રેસ બે વર્ષ પછી ખાતું ખોલવામાં સફળ રહી છે. પાર્ટીને 2021ની વિધાનસભા ચૂંટણીમાં એક પણ બેઠક મળી ન હતી.
