સલામ / પોરબંદરથી 50કિમી દૂર મધદરિયે દિલધડક રેસ્ક્યૂ, કોસ્ટ ગાર્ડના જવાનો દેવદૂત બની અવતર્યા, 7ને બચાવ્યા

• પોરબંદર દરિયામાં કોસ્ટગાર્ડે માછીમારોને બચાવ્યા
• કોસ્ટગાર્ડે સમુદ્રમાં 5 ગુમ, 2 ઘાયલ માછીમારોને બચાવ્યા
• બે કલાકની જહેમત ઉઠાવી ગુમ થયેલા તમામ બચાવી લેવાયા

ભારતીય કોસ્ટગાર્ડનું ઉમદા કાર્ય સામે આવ્યું છે, પોરબંદરના દરિયાકાંઠેથી 50 કિલોમીટર દૂર અરબી સમુદ્રમાં માછીમારોની જય ભોલે નામની બોટના 5 ગુમ થયેલા અને 2 ઘાયલ ક્રૂને બચાવી લેવાયા છે

પોરબંદર દરિયામાં કોસ્ટગાર્ડે માછીમારોને બચાવ્યા
પોરબંદરના દરિયાકાંઠેથી 50 કિલોમીટર દૂર અરબી સમુદ્રમાં માછીમારોની જય ભોલે નામની બોટના 5 ગુમ થયેલા અને 2 ઘાયલ ક્રૂને બચાવી લેવાયા છે. કોસ્ટગાર્ડના મેરીટાઇમ રેસ્ક્યુ સબ સેન્ટર પોરબંદરને સમુદ્રમાં જય ભોલે નામની  ફિશિંગ બોટમાં આગ લાગી હોવા માહિતી પાપ્ત થઈ હતી. બોટ પોરબંદરના દરિયાકાંઠાથી 50 કિલોમીટરથી દૂર હતી. જેની વિગતા પાપ્ત થતાં  જ કોસ્ટગાર્ડના પોરબંદરથી જિલ્લા કાર્યાલય માહિતીનું આદાન-પ્રદાન કરી તેના ઇન્ટરસેપ્ટર ક્લાસ જહાજો C-161 અને C-156ને ઘટનાસ્થળ તરફ રવાના થયા હતા. 

બે કલાકની જહેમત ઉઠાવી ગુમ થયેલા તમામને બચાવી લેવાયા
પોરબંદર કોસ્ટગાર્ડના એર સ્ટેશનથી એક એડવાન્સ લાઇટ હેલિકોપ્ટર (ALH) પણ ત્યાંથી રવાના કરવામાં આવ્યું હતું. કોસ્ટ ગાર્ડના જહાજો પૂર ઝડપે ઘટનાસ્થળ તરફ ગયો હતો જેમ બને તેમ  જલ્દી  ઘટનાસ્થળ પર કોસ્ટગાર્ડ પહોંચ્યું હતું. પરંતું ત્યાં સુધીમાં આગે વિકરાણ સ્વરૂપ લીધુ હતુ અને બોટના ક્રૂ આગને કાબૂમાં લેવામાં નિષ્ફળ રહ્યાં હતાં.  ક્રુ મેમ્બરોએ બોટને છોડી દીધી હતી અને જહાજ પરના 7 ક્રૂમાંથી, 2 ક્રુ ને નજીકમાં ઓપરેટિંગ કરતી ડંજી બોટ દ્વારા બચાવી લેવામાં આવ્યા હતા અને અન્ય 5 દરિયામાં ગુમ થઇ ગયા હતા. જ્યાં પહોંચેલા કોસ્ટગાર્ડ દ્વારા ખરાબ દરિયાઈ હવા વચ્ચે બે કલાકની જહેમત ઉઠાવી ગુમ થયેલા તમામ 5 ક્રૂને શોધીને બચાવી લેવાયા હતા. 

8 મહિનામાં  60થી વધુ લોકોના જીવ બચાવ્યા
તમામ ક્રૂ મેમ્બરોને હેલિકોપ્ટર દ્વારા એરલિફ્ટ કરવામાં આવ્યા હતા. પાંચેય ક્રૂને બપોરે 1:00 વાગ્યે પોરબંદર લાવવામાં આવ્યા હતા. ડીંગી બોટ દ્વારા બચાવાયેલા બે ક્રૂમાંથી એક ગંભીર રીતે ઘાયલ હોવાનું જાણવા મળ્યું હતું. ઘાયલ ક્રૂને કોસ્ટ ગાર્ડના જહાજ C-161 પર લઈ જવામાં આવ્યો હતો. કોસ્ટગાર્ડની ટીમ દ્વારા તેને દરિયામાં પ્રાથમિક તબીબી સારવાર આપ્યા બાદ વધુ સારવાર માટે પોરબંદર ખસેડવામાં આવ્યો હતો. તમને જણાવી દઈએ કે, કોસ્ટ ગાર્ડ દ્વારા છેલ્લા 8 મહિનામાં ગુજરાતના દરિયામાં 60 થી વધુ લોકોના જીવ બચાવ્યા છે.