તપાસ / ભાવનગરના ઉખલા ગામે કથિત રીતે જુગારની રેડ બાદ ભાગતા 3 યુવકો કૂવામાં પડતાં મો*ત

ભાવનગરના ઉખલા ગામના વાડી વિસ્તારમાં આશ્ચર્યનજક ઘટના બનવા પામી હતી. જેમાં પોલીસ દ્વારા જુગાર ધામ પર રેડ કરવા જતા જુગાર રમી રહેલા લોકોએ ભાગવાનો પ્રયાસ કરતા ત્રણ યુવકો કૂવામાં પડી જતા તેઓના મોત નિપજ્યા હતા. પોલીસ દ્વારા આ સમગ્ર મામલે તપાસ શરૂ કરી છે.

ઘટનાને પગલે સમગ્ર વિસ્તારમાં ભારે ચકચાર મચી

ભાવનગર જિલ્લાના ઉખલા ગામના વાડી વિસ્તારમાં મોડી રાત્રે બનેલી એક ચોંકાવનારી ઘટનામાં કુવામાં પડી જવાથી ત્રણ યુવકોના મોત થયા હોવાનું સામે આવ્યું છે. ઘટનાને પગલે વિસ્તારમાં ભારે ચકચાર મચી છે અને મૃતકોના પરિવારજનો મોટી સંખ્યામાં હોસ્પિટલ ખાતે પહોંચ્યા હતા.

અજીતસિંહ

પોલીસની રેડ પડતા લોકોએ ભાગવાનો પ્રયાસ કર્યો

પ્રાથમિક માહિતી મુજબ, વાડી વિસ્તારમાં અંદાજે 11 લોકો એકઠા થયા હતા. આ દરમિયાન પોલીસ રેડ પડી હોવાની જાણ થતાં તમામ લોકો ત્યાંથી ભાગવા લાગ્યા હોવાનો પરિવારજનોનો આક્ષેપ છે. ભાગદોડ દરમિયાન ત્રણ યુવકો કુવામાં પડી ગયા હોવાનું જણાવાઈ રહ્યું છે.

નિલેશ

મૃતકોના નામ

આ દુર્ઘટનામાં રાહુલ પોપટભાઈ ચૌહાણ, નિલેશ ડાભી અને અજીતસિંહ નામના ત્રણ યુવકોના મોત થયા હોવાનું જાણવા મળ્યું છે.

મૃતકોના પરિવારજનો ઘટના સ્થળે પહોંચ્યા

ઘટનાની જાણ થતાં પોલીસ અને સંબંધિત તંત્રના અધિકારીઓ ઘટનાસ્થળે પહોંચ્યા હતા. મૃતદેહોને બહાર કાઢી પોસ્ટમોર્ટમ માટે હોસ્પિટલ ખસેડવામાં આવ્યા હતા. બીજી તરફ, મૃતકોના પરિવારજનો પણ હોસ્પિટલ ખાતે મોટી સંખ્યામાં એકત્રિત થયા હતા.

રાહુલ ચૌહાણ

પોલીસ અને પરિવારજનોના નિવેદનમાં વિરોધાભાસ

આ સમગ્ર ઘટનાને લઈને હવે જુગારની રેડનો મુદ્દો પણ ચર્ચામાં આવ્યો છે. મૃતકોના પરિવારજનોનો આક્ષેપ છે કે પોલીસની રેડ દરમિયાન ભાગવાનો પ્રયાસ કરતા ત્રણેય યુવકો કુવામાં પડી ગયા હતા. જોકે, પોલીસના ઉચ્ચ અધિકારીઓ તેમજ વરતેજ પોલીસ દ્વારા રેડ અંગે ઇનકાર કરવામાં આવી રહ્યો હોવાનું સામે આવ્યું છે. જેના કારણે ઘટનાની હકીકતને લઈને અનેક સવાલો ઊભા થયા છે.

આ પણ વાંચોઃ ગોંડલમાં મોપેડ પર આવી મહિલાની છેડતી કરતો શખ્સ ઝડપાયો! CCTVના આધારે પોલીસે દબોચી લીધો

ત્રણ યુવકોના મોતને લઈ તપાસ શરૂ

હાલ સમગ્ર મામલે પોલીસ દ્વારા વધુ તપાસ હાથ ધરવામાં આવી રહી છે. ત્રણ યુવકોના મોત પાછળના ચોક્કસ સંજોગો શું હતા અને ઘટનાસ્થળે ખરેખર શું બન્યું હતું તે તપાસ બાદ જ સ્પષ્ટ થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ