બધા માતાપિતા જાણે / નહીં થાય તમારા બાળકોનું યૌન શૌષણ, બસ ખાલી આટલું શીખવાડી દેજો, બચી જશો મોટી પીડામાંથી

• નાની ઉંમરે બાળકોને સેક્સ એજ્યુકેશન આપવું જરુરી
• 12 વર્ષ બાદ છોકરા-છોકરીઓ કામની દ્રષ્ટિએ બને છે પ્રોઢ
• આવી સ્થિતિમાં તે ગમે તેવું પગલું ભરી શકે છે 

બાળકોનું યૌન શોષણ કરનારા મોટાભાગના લોકો નજીકના હોય છે અને તેથી તેમને નાનપણથી જ આ વિશે શીખવવામાં આવે તો અપ્રિય ઘટનાઓથી બચી શકાય છે. આ કામ અઘરું છે પણ જરૂરી પણ છે. ઘણી વખત બાળકો ટીવી પર કંઈક એવું જુએ છે જે તેમને સમજાતું નથી. જ્યારે તેઓ માતાપિતાને આ વિશે પૂછે છે, ત્યારે તેઓ ગોળ ગોળ જવાબ આપીને વાતને ટાળી દેતા હોય છે જેને પરિણામે કૂતુહલ રહી જતા બાળકો ખોટી રીતે માહિતી મેળવવાનું શરુ કરે છે આથી બાળકો સાથે થોડી તૈયારી સાથે જાતે વાત કરવી વધુ સારું રહેશે. ઘણા નિષ્ણાતોનું માનવું છે કે કેટલીક વસ્તુઓ બાળક 18 થી 24 મહિનાનું થાય ત્યારથી શરૂ કરવું જોઈએ. તેમને યોગ્ય શિક્ષણ આપીને, તમે તેમને ખોટું કરવાથી અને જાતીય શોષણથી બચાવી શકો છો.

 2થી 5 વર્ષના બાળકોને શું શીખવાડવું 
જ્યારે બાળક 2થી 5 વર્ષનું હોય ત્યારે તમારે તેને શરીરના અંગો અને સાચા-ખોટા વિશે શીખવવું જોઈએ. જેમ કે તેમને કહો કે તેમણે દરેકના ખોળામાં બેસવાની જરૂર નથી. પૂછ્યા વગર કોઈના શરીરને નહીં અડવાનું. કોઈને પણ તમારા શરીરના ભાગોને સ્પર્શવા નહીં દેવો. ખાસ કરીને કમરથી નીચેના શરીરને સ્પર્શ ન કરવાની તાલીમ આપો. તેમને કહો કે આ શરીરના ખાસ અંગો છે, તેમને હંમેશા બધાની સામે ઢાંકવા પડે છે. બાળકને કહો કે જો કોઈ તેમને આ રીતે અડે છે, તો તરત જ કહી દો.

5 વર્ષથી વધુ ઉંમરના બાળકોને આવી શીખામણ આપો 
5 વર્ષથી વધુ ઉંમરના બાળકો શાળા અથવા અન્ય કારણોસર નેટ અને મોબાઇલનો ઉપયોગ કરવાનું શરૂ કરે છે. તેઓ શું સર્ફિંગ કરી રહ્યા છે તેના પર ધ્યાન આપો. તેમને સમજાવો કે સોશિયલ મીડિયા પર એકાઉન્ટ ન બનાવો, ન તો તમારા ફોટા અને વિગતો કોઈ અજાણી વ્યક્તિ સાથે શેર કરો. આ ઉંમરે તમે તેમને યૌન શોષણ વિશે થોડી ખુલીને જણાવી શકો છો. ધ્યાન રાખો કે બાળક ડરી ન જાય. હંમેશા તેમને એવો અહેસાસ કરાવો કે દરેક પરિસ્થિતિમાં તેમનો પરિવાર તેમની સાથે છે.

10 વર્ષથી વધુ ઉંમરના બાળકોને શું કહેવું 
10 વર્ષથી વધુ ઉંમરના બાળકોની સામે તમે છાપામાં છપાયેલા સેક્સ ક્રાઈમના સમાચારો પર ચર્ચા કરી શકો છો, જેથી તેઓ સતર્ક રહે. ટીનેજર્સ એટલે કે 13થી 19 વર્ષના ટીનેજર્સને પ્રેગ્નન્સી, પીરિયડ્સ, સેક્સ્યુઅલી ટ્રાન્સમિટેડ ડિસીઝ, રિલેશનશિપ અને ફ્રેન્ડશિપ વિશે જાણકારી આપવી જોઈએ.

બાળકો કેવી રીતે પેદા થાય છે, તેવું બાળકો પૂછે તો શું કહેવું
સેક્સ વિશે વાત કરતી વખતે તમારી વાતને તથ્યપૂર્ણ અને સકારાત્મક રાખો. વધારે વિગતમાં ન જાઓ. તેમને કહો કે જો કોઈ મૂંઝવણ હોય, તો તેઓ ફરીથી પૂછી શકે છે. બાળકોના પ્રશ્નો પર શરમાશો નહીં કે હસશો નહીં. તેમને પ્રામાણિકતાથી જવાબ આપો. જો સમજાવવું મુશ્કેલ હોય તો બાળકોને સરળ ભાષામાં કહો પણ ખોટા જવાબો ન આપો. ઉદાહરણ તરીકે, જો બાળક પૂછે કે બાળકોનો જન્મ કેવી રીતે થાય છે, તો તમે પહેલા તેમને પૂછી શકો છો કે તેઓ શું વિચારે છે. આ પછી, તમે એક સરળ જવાબ આપી શકો છો કે માતાપિતા સાથે મળીને તેને બનાવે છે.