એક્સિડન્ટ / અમદાવાદના SG હાઇવે પર વધુ એક અકસ્માત: પકવાન બ્રિજથી ગાંધીનગર જતા સર્જાઇ દુર્ઘટના, એકનું મોત, 4 ઇજાગ્રસ્ત

• અમદાવાદના SG હાઈવે પર અકસ્માત
• પકવાન બ્રિજથી ગાંધીનગર જતા માર્ગ પર અકસ્માત
• વહેલી સવારે ગાડી પલ્ટી મારતા સર્જાયો અકસ્માત
• અકસ્માતમાં 1 વ્યક્તિનું મોત અને 4 ઈજાગ્રસ્ત 

Ahmedabad Accident: અમદાવાદમાં વધુ એક અકસ્માત સર્જાયો છે. આ દુર્ઘટનામાં 1 વ્યક્તિનું મોત નિપજ્યું છે, જ્યારે 4 લોકો ઈજાગ્રસ્ત થતાં તેઓને સારવાર અર્થે હોસ્પિટલમાં ખસેડવામાં આવ્યા છે. હાલ પોલીસે સમગ્ર મામલે વધુ તપાસ હાથ ધરી છે. 

કાર પલ્ટી મારી જતા સર્જાયો અકસ્માત
પ્રાપ્ત વિગતો અનુસાર, અમદાવાદના એસ.જી હાઈવે પર પકવાન બ્રિજથી ગાંધીનગર જતાં માર્ગ પર આજે વહેલી સવારે કાર ચાલકે સ્ટિયરિંગ પર કાબૂ ગુમાવતા કાર પલટી મારી ગઈ હતી. એસ.જી હાઈવે પર અકસ્માત સર્જાતા રાહદારીઓના ટોળેટોળા ઘટનાસ્થળે એકઠા થઈ ગયા હતા. જેમાં સ્થાનિકો દ્વારા કારમાં સવાર લોકોને બહાર કાઢવામાં આવ્યા હતા. તો આ અંગેની જાણ એમ્બ્યુલન્સને કરવામાં આવી હતી. 

4 ઈજાગ્રસ્તોને સારવાર માટે હોસ્પિટલ ખસેડાયા 
આ અકસ્માતમાં કરવામાં સવાર એક વ્યક્તિનું ઘટના સ્થળે જ મોત નિપજ્યું હતું. જ્યારે અન્ય 4 ઈજાગ્રસ્તોને એમ્બ્યુલન્સમાં સારવાર અર્થે હોસ્પિટલમાં ખસેડવામાં આવ્યા હતા. અકસ્માતની જાણ થતાંની સાથે જ પોલીસની ટીમ પણ અકસ્માત સ્થળે દોડી આવી હતી અને કારને દૂર કરવાની કામગીરી હાથ ધરી હતી. 

ગઈકાલે સોલા બ્રિજ પર સર્જાયો હતો અકસ્માત 
આપને જણાવી દઈએ કે, ગઈકાલે પણ અમદાવાદના એસજી હાઈવે પર અકસ્માત સર્જાયો હતો. જેમાં એક યુવકનું મોત થયું હતું. અંકિત પ્રજાપતિ નામનો યુવક બાઇક પર સવારે 8 વાગ્યે ઓફિસ જવા નીકળ્યો હતો. ત્યારે સોલા બ્રિજ પર એક ખાનગી કંપનીની બસના ચાલકે બાઇકસવાર અંકિતને અડફેટે લીધો હતો. આ અકસ્માતમાં અંકિતનું ઘટના સ્થળે જ મોત નિપજ્યું હતું. 

બસ ચાલકે યુવકને લીધો હતો અડફેટે 
તો બીજી બાજુ બસ ચાલક અકસ્માત સર્જીને ત્યાંથી ફરાર થઈ ગયો હતો. આ અંગેની જાણ થતાં પોલીસનો કાફલો ઘટનાસ્થળે દોડી આવ્યો હતો અને યુવકના મૃતદેહને પોસ્ટમોર્ટમ માટે સોલા સિવિલ હોસ્પિટલમાં ખસડીને ફરાર બસ ચાલકની શોધખોળ હાથ ધરી હતી.