મોટું નિવેદન / 'જવાહરલાલ નેહરૂની 2 ભૂલના કારણે આજે PoKનું નિર્માણ થયું, કાશ્મીરને પણ સહન કરવું પડ્યું', લોકસભામાં કોંગ્રેસ પર અમિત શાહના પ્રહાર

• જમ્મૂ-કાશ્મીર રિઝર્વેશન સંશોધન બિલ પર સદનમાં ચર્ચા
• સદનમાં અમિત શાહે કહ્યું PoK અમારું છે...
• તેમણે કહ્યું કે નહેરુની ભૂલોનાં લીધે PoK બન્યું

 જમ્મૂ-કાશ્મીર રિઝર્વેશન સંશોધન બિલ: કેન્દ્રીય ગૃહમંત્રી અમિત શાહે જમ્મૂ-કાશ્મીર રિઝર્વેશન સંશોધન બિલ 2023 અને જમ્મૂ-કાશ્મીર પુનર્ગઠન બિલ 2023 પર કહ્યું કે હું અહીં જે બિલ લઈને આવ્યો છું તે એ લોકોને ન્યાય અપાવવા માટે અને તેમને અધિકાર અપાવવા માટે છે કે જેમની સાથે અન્યાય થયો છે, જેમનું અપમાન થયું છે અને જેમની ઉપેક્ષા કરવામાં આવી છે. 

PoK માટે 24 સીટો આરક્ષિત
શાહે કહ્યું કે, કેટલાક લોકોએ કહ્યું કે માત્ર નામ બદલવામાં આવી રહ્યું છે. હું એ તમામને કહેવા માંગુ છું કે જો આપણી અંદર થોડી પણ સહાનુભૂતિ છે તો આપણે જોવું પડશે કે નામની સાથે તેમનું સમ્માન પણ જોડાયેલું છે.  અમે સીમાંકનની ભલામણના આધારે ત્રણ બેઠકો માટેની વ્યવસ્થા કરી છે. જમ્મૂ-કાશ્મીર વિધાનસભામાં 2 સીટ કાશ્મીરથી વિસ્થાપિત લોકો માટે અને એક સીટ PoKથી વિસ્થાપિત લોકો માટે છે. અમિત શાહ અનુસાર વિધાનસભામાં 9 સીટ અનુસૂચિત જનજાતિ માટે આરક્ષિત કરવામાં આવી છે. શાહે કહ્યું કે POK માટે 24 સીટો આરક્ષિત કરવામાં આવી છે કારણકે PoK અમારું છે. બંને બિલને દરેક એ કાશ્મિરી યાદ રાખશે જે પીડિત છે. વિસ્થાપિતોને આરક્ષણ આપવાથી તેમનો અવાજ જમ્મૂ-કાશ્મીરની વિધાનસભામાં ગૂંજશે.'

પંડિત નહેરુનાં લીધે PoK બન્યું- શાહ
શાહે કોંગ્રેસ પર હુમલો કરતાં કહ્યું કે,' નહેરુની ભૂલોને લીધે PoK બન્યું છે.  તેમણે કહ્યું કે 2 મોટી ભૂલો પંડિત નહેરુ જ્યારે પ્રધાનમંત્રી હતાં ત્યારે થઈ જેના કારણે વર્ષો સુધી કાશ્મીરનાં લોકોને ભોગવવું પડ્યું.  જ્યારે આપણી સેના જીતી રહી હતી, પંજાબનો વિસ્તાર આવતા જ યુદ્ધવિરામ કરી દેવામાં આવ્યો, અને PoKનો જન્મ થયો, જો સીઝફાયર ત્રણ દિવસ મોડું થયું હોત તો આજે   PoK ભારતનો હિસ્સો હોત.' કોંગ્રેસનાં વૉકઆઉટ બાદ અમિત શાહે કહ્યું કે "પહેલાં જમ્મુમાં 37 સીટો હતી, હવે 43 છે. પહેલાં કાશ્મીરમાં 46 સીટ હતી, હવે 47 છે અને PoKમાં 24 સીટો આરક્ષિત કરી દેવામાં આવી છે કારણ કે PoK આપણું છે."