સ્માર્ટ સીટીના દ્રશ્યો / અમદાવાદીઓ પોતાના જીવના જોખમે બહાર નીકળજો! અનેક વિસ્તારોમાં ગટરના ઢાંકણા ખુલ્લા

• અમદાવાદના લોકો માથે ઝળુંબતો અકસ્માતનો ખતરો
• સ્માર્ટ સિટીમાં નાગરિકોને નથી મળતી સ્માર્ટ સુવિધા 
• રસ્તામાં ખાડા અને ગટરના ખુલ્લા ઢાંકણાથી ભય

અમદાવાદને સ્માર્ટ સીટી કહેવામાં આવે છે પરંતુ નાગરિકોને સ્માર્ટ સુવિધા મળતી નથી.અમદાવાદમાં રેહવુંએ એક સમસ્યા હોય તેવું લોકોને લાગી રહ્યું છે. ઘરેથી નિકળો તો ઢોર નડે, રાસ્તા પરના ખાડા કે પછી ગટરના ખુલ્લા ઢાંકણા. શહેરના પૂર્વ હોય કે પશ્ચિમ વિસ્તાર જ્યા જુઓ ત્યાં ગટરના ઢાંકણા ખુલ્લા છે. અમદાવાદના જશોદાનગર, સીટીએમ, હાટકેશ્વર, બાપુનગર સહીતના વિસ્તારોમાં ગટરના ઢાંકણા ખુલ્લા જ મૂકી દેવામાં આવ્યા હોવાથી  તંત્રની આળસુ વૃતિ સામે સવાલો ઊભા થયા છે.

ગટરના ખુલ્લા ઢાંકણા મોતનું મો ફાડીને ઊભા છે
ગટરના ખુલ્લા ઢાંકણા મોતનું મો ફાડીને ઊભા હોવા મામલે તંત્ર દ્વારા જણાવ્યા અનુસાર અધિકારીઓને તાકીદે સૂચના આપી આ ગટરના ઢાંકણા બંધ કરવા કહેવામાં આવ્યું છે. પરંતુ હજુ સુધી અધિકારીઓએ પણ કામગીરી કરવાની તસ્દી લીધી નથી. અમદાવાદમાં રોડ પર ઢોરનો ત્રાસ તો યાથવત જ છે ઉપરથી અકસ્માત નોતરવા ખુદ અમદાવાદ કોર્પોરેશન દ્વારા આ ગટરના ઢાંકણા ખુલ્લા મૂકી દેવાયા છે જે અકસ્માતની રાહ જોઈ રહયા હોય તેવુ લાગી રહ્યું છે. 

ખુલ્લા ઢાંકણા અકસ્માત નોતરે તે પહેલા કાર્યવાહી કરવા માંગ 
સ્માર્ટ સિટી અમદાવાદના રહીશોને ઉપાધિનો કૉઈ પાર નથી. વરસાદમાં પાણી ભરવાની સમસ્યા નવી નથી પણ પાણીના નિકાલ બાદ જે ગટરોના ઢાંકણા બંધ નથી કરવામાં આવી જેના કારણે લોકોએ રસ્તા પર નીકળવું અકસ્માતને નોતરવા સમાન છે. મહત્વનું છે કે, તાજેતરમાં મહેસાણા જિલ્લાના વિસનગરમાં તંત્રની બેદરકારીના કારણે ખુલ્લી ગટરમાં બે બાળકી પડી હતી. આ કરુણ ઘટનામાં એક બાળકીનું મોત થયું હતું. જેથી આવી ઘટનામાંથી શીખ લઇને અમદાવાદમાં પણ તાત્કાલિક ખુલ્લા ગટરના ઢાંકણા અકસ્માત નોતરે તે પહેલા કાર્યવાહી કરવા માંગ ઊઠી છે.