હરણી દુર્ઘટના / VMCનો અસંવેદનશીલ નિર્ણય: કસૂરવારને જ બનાવ્યો ફરિયાદી, આરોપી છે ભાજપ યુવા મોરચાનો હોદ્દેદાર

• હરણી લેક દુર્ઘટના બાદ વડોદરા મહાપાલિકાનો અસંવેદનશીલ નિર્ણય 
• મહાપાલિકાના કાર્યપાલક ઇજનેરને આરોપીના બદલે ફરિયાદી બનાવાયા 
• કાર્યપાલક ઇજનેર રાજેશ ચૌહાણે હરણી પોલીસ સ્ટેશનમાં નોંધાવી ફરિયાદ 

Vadodara Harani lake boat incident: વડોદરાની હરણી દૂર્ઘટનામાં નિર્દોષ બાળકોની જાનના દુશ્મન બનનારને ક્યારે સજા મળશે તેની રાહ જોવામાં આવી રહી છે ત્યારે કેટલાક સવાલો થઈ રહ્યા છે. જે કંપની ખાણી પીણીના ધંધામાં છે તેને બોટનો કોન્ટ્રાક્ટ કેમ આપવામાં આવ્યો? અણઘડ કંપનીને કોન્ટ્રાક્ટ આપવાના દસ્તાવેજ પર કોની સહી છે તેવા ઘણા સવાલો ઉભા થઈ રહ્યા છે. કોટીયા કંપનીને જેને કોન્ટ્રાકટ આપવામાં આવ્યો હતો તેને કોની ભલામણથી કોન્ટ્રાક્ટ મળ્યો એ જાણકારી બહાર આવશે કે નહિ આવા ઘણા સવાલના જવાબ ક્યારે મળશે તેની રાહ જોવામાં આવી રહી છે. આ તમામ સવાલોની વચ્ચે વડોદરા મહાપાલિકાનો અસંવેદનશીલ નિર્ણય પણ સામે આવ્યો છે,  જેમાં મહાપાલિકાના કાર્યપાલક ઇજનેરને આરોપીના બદલે ફરિયાદી બનાવાયા છે. 

આરોપીના બદલે ફરીયાદી ?
કાર્યપાલક ઇજનેર રાજેશ ચૌહાણે હરણી પોલીસ સ્ટેશનમાં ફરિયાદ નોંધાવી છે. અત્રે જણાવીએ કે, રાજેશ ચૌહાણે યોગ્ય તપાસ ન કરતાં કોન્ટ્રાક્ટરે બેદરકારી દાખવી છે. જ્યારે આરોપી બનાવવાને બદલે કાર્યપાલક ઇજનેર રાજેશ ચૌહાણને જ ફરિયાદી બનાવી દેવાતા પણ અનેક વેધક સવાલો ઉભા થઈ રહ્યાં છે.  

     પોલીસની ફરિયાદમાં પરેશ શાહનુ નામ પણ ન હોવાનો ખુલાસો થયો છે. સાથો સાથ આરોપી દિપેન શાહ ભાજપ યુવા મોરચાનો હોદેદાર હોવાનો ખુલાસો થયો છે. એક મોટા ભાજપના નેતાની કોન્ટ્રાક્ટર સાથે કોન્ટ્રાક્ટમાં ભાગીદારી છે તેવું પણ ચર્ચાઈ રહ્યું છે.  કોન્ટ્રાક્ટર પરેશ શાહને પોલીસ છાવરી રહી હોવાનો આક્ષેપ થઈ રહ્યો છે.

સેફ્ટી સાધનોની વ્યવસ્થા કરાઇ ન હતી!
હરણી લેકમાં બોટિંગ સેવાની યોગ્ય સમારકામ પણ ન કરાયાનું સામે આવ્યું છે. એટલું જ નહીં, બોટિંગ દરમિયાન બોયા, રિંગ, દોરડા જેવા કોઇ પણ સેફ્ટી સાધનોની વ્યવસ્થા કરાઇ ન હતી. સામાન્ય કહી શકાય તેવા સેફ્ટી સાધનો અને પ્રોટોકોલની પણ દરકાર ન લેવાતાં આખરે ભુલકાઓએ આની કિંમત ચૂકવવાનો વારો આવ્યો છે. 

વાંચવા જેવું:  ભારે કરી! સેવ ઉસળનો નાસ્તો બનાવનારને અપાયો બોટિંગનો કોન્ટ્રાક્ટ, પછી દુર્ઘટના ના ઘટે તો બીજું શું થાય?

વડોદરા હરણી દુર્ઘટનાના આ સવાલોના કોણ જવાબ આપશે?
બાળકોની જાનના દુશ્મન બનનારને ક્યારે સજા મળશે?
ખાણીપીણીના ધંધાવાળાને કેમ અપાયો બોટિંગનો કોન્ટ્રાક્ટ?
અધિકારીઓને કેમ જવાબદાર બનાવવામાં ન આવ્યા?
નેતાઓએ તરફેણ કરી અને મનપાએ કોન્ટ્રાક્ટ આપી દીધો?
કોની ભલામણથી કંપનીને કોન્ટ્રાક્ટ મળ્યો?
અધિકારી ફરિયાદી તો સુરક્ષાની જવાબદારી કોની?