અમદાવાદ / બેંકના પટ્ટાવાળાએ પત્ની સાથે મળી બેન્કના લૉકરમાંથી 47 લાખની વસ્તુઓ કરી છૂમંતર, આવી રીતે ભાંડો ફૂટતા બંને જેલ હવાલે

• બેંકના પટ્ટાવાળાએ પત્ની સાથે મળી બેંકમાંથી કરી ચોરી
• બેંકના લોકરમાંથી 47.88 લાખની કિંમતની ચિઝવસ્તુઓની ચોરી
• સોનાના 3 મંગળસૂત્ર, સોનાની 8 બંગડી સહિત કુલ 47 લાખનો મુદ્દામાલ ઝડપાયો

અમદાવાદમાં ચોંકાવનારી ઘટના સામે આવી છે. જેમાં રક્ષક ભક્ષક બન્યો હોય તેમ બેંકના પટ્ટાવાળાએ જ પોતાની પત્ની સાથે મળી બેંકના લોકરમાંથી કિંમતી વસ્તુની ચોરી કરી હોવાનું સામે આવ્યું છે. આ મામલે પોલીસને સોનાના દાગીના ભરેલ બેગ સાથે શંકાસ્પદ હાલતમાં મળેલ યુવકની પૂછપરછ હાથ ધરતા ભાંડો ફૂટ્યો હતો. આ દંપતીએ ડમી ગ્રાહક બની બેંકમાં જઇ રૂપિયા 47.88 લાખની ચોરીને અંજામ આપ્યો હતો. 

બેંકના મેનેજરએ એલિજબ્રિજ મથકમાં ફરિયાદ નોંધાવી 

એલિજબ્રિજ પોલીસ પેટ્રોલિંગમાં હતી આ દરમીયાન ચિરાગ દાતણીયા પાસેથી સોના દાગીના અને વિદેશી ચલણી નોટો સાથે કિંમતી વસ્તુ મળી આવી હતી. જેને લઈને પોલીસે પૂછપરછ હાથ ધરી હતી. જેમાં આરોપીએ બેન્કમાંથી ચોરી કરી હોવાની કબૂલાત આપી હતી. બાદમાં બેંકના મેનેજર એલિજબ્રિજમાં ફરિયાદ નોંધાવી હતી. વધુમાં પૂછપરછમાં સામે આવ્યું કે બેંકમાં રહેલા દસેક જેટલા લોકરનો છેલ્લા ઘણા સમયથી ઉપયોગ કોઈ ગ્રાહક કરતા ન હતા અને લોકરનો ચાર્જ પણ ચૂકવતા ન હતા જેથી દસેક લોકરોની કિંમતી ચીઝવસ્તુઓ બેંકના અધિકારીઆ ગણતરી કરી અન્ય ચાર લોકરમાં સામાન મુક્યો હતો.જે ચાર લોકરમાં રહેલ કિંમતી વસ્તુઓ પર બેંકના પટ્ટાવાળા ચિરાગ દાતણીયાની નજર બગડી હતી. જેથી લોકરમાંથી ચોરી કરવાનું પત્ની સાથે પ્લાન કર્યો હતો.જેમાં આરોપી ચિરાગે તેની પત્ની અર્ચના દાતણીયાનીને ડમી ગ્રાહક તરીકે બેંકમાં બોલાવી અને રજીસ્ટ્રેશન બુકમાં ખોટી એન્ટ્રી કરી લોકર રૂમમાં પ્રવેશ મેળવ્યો હતો.

47 લાખથી વધુનો મુદ્દામાલ ઝડપાયો

જ્યાં પટ્ટાવાળા તરીકે કામ કરતા આરોપી ચિરાગે અગાઉથી બે લોકરમાં રહેલ કિંમતી સામાન કાઢી દીધો હતો. જ્યાં લોકર રૂમમાં પત્ની અર્ચના અંદર આવતા જ કિંમતી સામાન બેગમાં મૂકી જતી રહી હતી. જે થોડા દિવસ બાદ ચિરાગ કિંમતી સામાન વાળો બેગ લઈ જતા પોલીસના હાથે પકડાયો અને લોકર ચોરીના ગુનાનો ભેદ ઉકેલાયો હતો. નોંધનીય છે કે છેલ્લા બે વર્ષથી ચિરાગ દાતણીયા બેંકમાં પટ્ટાવાળા તરીકે નોકરી કરે છે જેથી બંધ લોકરમાં રહેલ કિંમતી સામાન હવે કોઈ ગ્રાહક લેવા નહીં આવે તેમ સમજી તેના પર દાનત બગાડીને ચોરી કરી હોવાનું કબૂલાત કરી હતી.આરોપી દંપતી પાસેથી 1 કિલો 200 ગ્રામ સોનાના દાગીના, સોનાના 3 મંગળસૂત્ર, સોનાની 8 બંગડી અને બે ચેઇન તથા  2 કિલો જેટલા ચાંદીના દાગીના અને 3 પાસપોર્ટ, વિદેશી ચલણી નોટો મળી કુલ 47 લાખથી વધુનો મુદ્દામાલ મળ્યો હતો.