વાહ / ધોરણ 12 (CBSE)ના પરિણામોમાં અદાણી વિદ્યામંદિરના વિદ્યાર્થીઓ ડંકો વગાડ્યો,ખુશીની લહેર

• ધોરણ 12 (CBSE)ના પરિણામો જાહેર થતાં વિદ્યાર્થીઓમાં ખુશી
• વાણિજ્ય પ્રવાહની વિદ્યાર્થિની રિદ્ધિ બાલમુકુંદે 97% મેળવ્યા
• વિજ્ઞાન પ્રવાહમાં ક્રિશ પટેલે 95.20% માર્કસ મેળવ્યા

CBSE બોર્ડે ધોરણ 12નું પરિણામ 12 મેના રોજ જાહેર કર્યું છે ત્યારે તમને જણાવી દઈએ કે, ઘણાં વિદ્યાર્થીઓએ સારુ પરિણામ લાવ્યું છે જો કે, આ વર્ષે ધોરણ 12માં 87.33 ટકા વિદ્યાર્થીઓ પાસ થયા છે. જેમાં છોકરાઓ કરતા છોકરીઓની પાસ થવાની ટકાવારી 6% સારી રહી છે. છોકરીઓની પાસ થવાની ટકાવારી 90.68% રહી છે જ્યારે છોકરાઓની પાસ થવાની ટકાવારી 84.67% રહી છે ત્યારે આજે વાત કરીએ કેટલાક તેજસ્વી વિદ્યાર્થીઓની જેમણે સારી ટકાવારી મેળવી છે. 
 
અવધિ શાહે 96.2% મેળવી શહેરના ટોપ-10માં સ્થાન મેળવ્યું
શૈક્ષણિક વર્ષ 2022-23ના ધોરણ 12 (CBSE)ના પરિણામોમાં અદાણી વિદ્યામંદિરના વિદ્યાર્થીઓએ સારૂ પરિણામ મેળવ્યું છે. વાણિજ્ય પ્રવાહની વિદ્યાર્થિની રિદ્ધિ બાલમુકુંદે 97% જ્યારે અવધિ શાહે 96.2% મેળવી શહેરના ટોપ-10 તેજસ્વી વિદ્યાર્થીઓમાં સ્થાન મેળવ્યું છે. તો વિજ્ઞાન પ્રવાહમાં ક્રિશ પટેલે 95.20% માર્કસ મેળવી પરિવારનું નામ રોશન કર્યું છે. દરવર્ષની જેમ આ વર્ષે પણ AVMના વિદ્યાર્થીઓએ સફળતાનો ડંકો વગાડતા સ્ટાફ સહિત વિદ્યાર્થીઓ અને તેમના પરિવારજનો રાજીના રેડ થઈ ગયા છે. 

3000થી વધુ વિદ્યાર્થીઓને મફત શિક્ષણ અપાય છે
AVMની શાળાઓ ગુજરાતના અમદાવાદ, ભદ્રેશ્વર, સુરગુજા (છત્તીસગઢ) અને કૃષ્ણપટનમ (આંધ્રપ્રદેશ)માં કાર્યરત છે. અત્રે તમને જણાવી દઈએ કે, સમાજના આર્થિક નબળા વર્ગોના 3000થી વધુ વિદ્યાર્થીઓને મફત ગુણવત્તાયુક્ત શિક્ષણ પ્રદાન કરે છે. શાળામાં વિદ્યાર્થીઓને ગણવેશ, પુસ્તકો, સ્ટેશનરી અને વાહનવ્યવહારની સાથે શ્રેષ્ઠ-વર્ગંમાં ઈન્ફ્રાસ્ટ્રક્ચર અને નવીનતમ સુવિધાઓ પ્રદાન કરે છે.