સર્વે / આજે થાય લોકસભા ચૂંટણી તો કોની બને સરકાર? સર્વેના ચોંકાવનારા તારણો, ભાજપ-કોંગ્રેસને કેટલી સીટો

• લોકસભા ચૂંટણીને લઈને રાજકીય ગતિવિધિઓ તેજ
• ચૂંટણીના પરિણામને લઈને એક ખાનગી સર્વે સામે આવ્યો
•  ફરી ભાજપ સત્તા પર આરૂઢ થઈ રહી હોવાનો દાવો

આગામી વર્ષમાં યોજાનાર લોકસભા ચૂંટણીને લઈને રાજકીય ગતિવિધિઓ તેજ બની રહી છે. કોંગ્રેસ, જીડીયુ, ટીએમસી સહિતના તમામ વિપક્ષી દળો એક થઈને મહામોરચો બનાવી તૈયારી કરી રહ્યા છે. ત્યારે આ મામલે પટનામાં એક મહત્વપૂર્ણ બેઠક પણ યોજાઈ હતી. જેમાં એક સાથે ચૂંટણી લડવાની સહમતી દર્શાવવામાં આવી છે. બીજી બાજુ ભાજપ પણ પોતાની તૈયારીઓમાં જોતરાઈ ગયું છે. યુનિફોર્મ સિવિલ કોડ સહિતની મુદ્દે કેન્દ્ર સરકાર સક્રિય બની છે. ત્યારે ચૂંટણીના પરિણામને લઈને એક ખાનગી સર્વે સામે આવ્યો છે. જેમાં ફરી ભાજપ સત્તા પર આરૂઢ થઈ રહી હોવાનો દાવો કરવામાં આવી રહ્યો છે.

બીજેપી ગઠબંધન આસાનીથી સરકાર બનાવી શકે છે
આગામી સમયમાં સરકાર આ મામલે કાયદો પણ બનાવી શકે છે. આવી સ્થિતિ વચ્ચે મતદારોનો મિજાજ શું છે તે મામલે લોકોમાં ચર્ચા ચાલી રહી છે. જો આજે ચૂંટણી યોજાઈ તો ભાજપ સત્તામાં આવે કે કોંગ્રેસ સહિત વિપક્ષે દળ બહુમતી હાસિલ કરે? તેવા અનેક સવાલો લોકોમાં ઉભા થઈ રહ્યા છે. ત્યારે લોકસભા ચૂંટણીને લઇને તાજો સર્વે સામે આવ્યો છે. જેમાં ચોંકાવી દેનારા પરિણામ સામે આવ્યા છે. ચોકાવી મુક્તિ વાત એ છે કે તમામ વિપક્ષી પક્ષો એક થઈને પણ વધુ સફળતા હાંસલ કરી શકે તેમ નથી! પરિણામે બીજેપી ગઠબંધન આસાનીથી સરકાર બનાવી શકે છે તે દેખાઈ રહ્યું છે.

60% લોકોનું ટેલિફોનિક સંપર્ક
ટાઈમ્સ નાઉ, નવ ભારત અને ઇડીજી દ્વારા કરવામાં આવેલા લોકસભા ચૂંટણીના સર્વેને લઈને પરિણામ સામે આવ્યા છે. જેમાં બીજેપી નેતૃત્વ વાળી એનડીએ ફરીથી સરકાર બનાવી શકે છે અને સર્વેમાં બીજેપી ગઠબંધન પાર્ટીને 285 થી 325 સીટો મળી રહી છે. જ્યારે કોંગ્રેસ ગઠબંધનના ખાતામાં 111 થી 149 સીટો આવી શકે છે. તેમજ તૃલમુલ કોંગ્રેસને 20 થી 22 અને વાયએસઆરપી 24 થી 25,  બીજેડીને 12 થી 14, બી.આર.એસ ને નવ થી 11,  આમ આદમી પાર્ટીને ચારથી સાત તેમજ સપાને ચારથી આઠ અને અન્યના ખાતામાં 18 થી 38 સીટો જાય તેવું જાણવા મળી રહ્યું છે. સર્વે એજન્સીનો દાવો છે કે આ સર્વેમાં અનેક લોકો સાથે વાત કરવામાં આવી હતી. 60% લોકોનું ટેલિફોનિક અને 40% લોકોના રૂબરૂ મુલાકાત કરી અને સવાલો પૂછ્યા બાદ સર્વે તૈયાર કરવામાં આવ્યો છે.

અગાઉ આવ્યો હતો સર્વે
નોંધનીય છે કે વર્ષની શરૂઆત દરમિયાન જ ચૂંટણીને લઈને એક સર્વે કરવામાં આવ્યો હતો. જેમાં ઇન્ડિયા ટુડે અને સી વોટર દ્વારા કરવામાં આવેલા સર્વેમાં પૂર્વ સાંસદ રાહુલ ગાંધીની ભારત જોડો યાત્રાની પણ કોઈ પ્રતિકૂળ અસર પડી હોય તેવું લાગતું નથી! જેના પરિણામે એનડીએ 298 સીટો, યુપીએને 153 સીટો મળે તેવો દાવો કરવામાં આવ્યો હતો. તેમજ અન્યના ખાતામાં 92 સીટો જાય તેવો દાવો કરાયો હતો.