મોટી રાહત / ટામેટાના ભાવમાં ઘટાડો થતા સામાન્ય જનતાને મોટી રાહત, જાણો કિંમત 200 રૂપિયાથી ઘટીને સીધી કેટલે પહોંચી

• ગુજરાતમાં ટામેટાના ભાવમાં ઘટાડો 
• 120 રૂપિયા પ્રતિકિલો થયા ટામેટા 
• ભાવ ઘટતા આમ આદમીને રાહત 

ગુજરાતની ગૃહિણીઓ માટે રાહતના સમાચાર સામે આવ્યા છે. ટામેટા સાથે કોથમીરની આવક વધતા રિટેલ કિંમતોમાં રાહતજનક ઘટાડો થયો છે. છેલ્લા ઘણા સમયથી આસમાને પહોંચેલા ટામેટાના ભાવમાં હવે ઘટાડો આવતા ગૃહિણીઓએ રાહતનો શ્વાસ લીધો છે. 200 રૂપિયાએ પહોંચેલા ટામેટાનો ભાવ અત્યારે 120 રૂપિયા થયો છે. આગામી સમયમાં ટામેટાના ભાવમાં હજુ પણ ઘટાડો થાય તેવી શક્યતા જોવા મળી રહી છે.

હોલસેલ માર્કેટમાં 80 રૂપિયાએ પહોંચ્યો ભાવ
200 રૂપિયાએ પહોંચેલા ટામેટાનો ભાવ 120 રૂપિયા થયો થોડા દિવસ અગાઉ હોલસેલમાં ટામેટાનો પ્રતિ કિલો રૂ.200ને વટાવી ગયેલો ભાવ અત્યારે જથ્થાબંધ બજારમાં 80 રૂપિયા પ્રતિકિલોએ પહોંચ્યો છે. જ્યારે છૂટક બજારમાં પણ ટામેટાના ભાવમાં ઘટાડો નોંધાયો છે. છૂટક બજારમાં ટામેટાનો પ્રતિકિલો ભાવ 120 રૂપિયાએ પહોંચ્યો છે. બજારમાં ટામેટાની આવકમાં વધારો જોવા મળતા ટામેટાના ભાવમાં ઘટાડો જોવા મળ્યો છે. મહારાષ્ટ્રથી ટામેટાની આવક વધવાના કારણે આ અસર જોવા મળી રહી છે.

હોલસેલ અને છૂટક ભાવમાં તફાવત 
હોલસેલ અને રિટેલ માર્કેટમાં ટામેટાના ભાવમાં મોટો તફાવત જોવા મળી રહ્યો છે. હોલસેલ માર્કેટમાં 80 રૂપિયે જ્યારે લારી પર 120 રૂપિયા કિલો ટામેટા વેચાઈ રહ્યા છે. હોલસેલ અને રિટેલમાં ભાવમાં ફેરક બદલ વેપારીએ પ્રતિક્રિયા આપી છે. વેપારીએ જણાવ્યું કે, હોલસેલમાં 25 કિલોનું કેરેટ ફરજિયાત લેવું પડે છે. આ કેરેટમાં અનેક બગડેલા ટામેટા આવતા હોય છે. જેના કારણે તે ફેંકી દેવામાં આવ્યા છે. આ કારણે રિટેલ અને હોલસેલમાં ટામેટાના ભાવમાં તફાવત છે. 

ગૃહિણીઓમાં બોલી ગયો હતો દેકારો
આપને જણાવી દઈએ કે, થોડા દિવસ અગાઉ ગુજરાત સહિત દેશભરમાં ટામેટાનો ભાવ બેકાબુ બન્યો હતો. ટામેટાના ભાવ 200 રૂપિયા પ્રતિકિલોને વટાવી જતા ગૃહિણીઓમાં દેકારો બોલી ગયો હતો. ટામેટાના ભાવમાં ભડકાથી મધ્યમ વર્ગના લોકોના ઘરમાં દેખાતા ઓછા થઈ ગયા હતા. લોકોએ ટામેટા ખાવાનું બંધ કરી દીધું હતું.