9 ફોટો ગેલેરી

તમારા કામનું / 8મા પગાર પંચનો રિપોર્ટ આવે તે પહેલાં જ મોંઘવારી ભથ્થું 67% સુધી પહોંચશે? સરકારી કર્મચારીઓમાં ચર્ચા તેજ

Last Updated: 02:18 PM, 1 November 2026

FOLLOW ON

શેર કરો

કેન્દ્ર સરકારના કર્મચારીઓ માટે નવા વર્ષમાં મોંઘવારી ભથ્થા (DA)ને લઈને સારા સમાચાર મળી શકે છે. જાન્યુઆરી 2027થી DAમાં 4 ટકાનો વધારો થવાની શક્યતા છે, જેના કારણે હાલનો દર 63%થી વધીને 67% થઈ શકે છે.

1/9

1. 8મા પગાર પંચ પહેલાં DA 67% થશે?

આ વધારો 7મા પગાર પંચ હેઠળ મળનારા મોંઘવારી ભથ્થાનો છેલ્લો વધારો પણ બની શકે છે. 8મા પગાર પંચની ભલામણો આવે તે પહેલાં કર્મચારીઓના પગારમાં વધુ વધારો થવાની આશા છે. જોકે આ અંગે હજુ સુધી સરકાર તરફથી કોઈ અંતિમ જાહેરાત કરવામાં આવી નથી.

આ તસવીર શેર કરો

2/9

2. જાન્યુઆરી 2027થી DAમાં 4 ટકાનો વધારો શક્ય

કેન્દ્ર સરકારના લાખો કર્મચારીઓ અને પેન્શનરો માટે મોંઘવારી ભથ્થાને લઈને ફરી ચર્ચા શરૂ થઈ છે. જાન્યુઆરી 2027થી મોંઘવારી ભથ્થામાં 4 ટકાનો વધારો થઈ શકે છે. જો આ અંદાજ સાચો સાબિત થાય તો કર્મચારીઓને હાલના 63 ટકાના બદલે 67 ટકા DA મળશે. આ ગણતરી ઔદ્યોગિક શ્રમિકોના મોંઘવારીના આંકડા અને 7મા પગાર પંચના ફોર્મ્યુલાના આધારે કરવામાં આવી છે. જોકે આ વધારો કેટલો રહેશે તેનો અંતિમ નિર્ણય કેન્દ્ર સરકાર જ લેશે.

આ તસવીર શેર કરો

3/9

3. હાલ કેટલું મળે છે મોંઘવારી ભથ્થું?

કેન્દ્ર સરકારે 1 જુલાઈ 2026થી મોંઘવારી ભથ્થું વધારીને બેઝિક પગારના 63 ટકા કર્યું છે. હવે આગામી વધારો જાન્યુઆરી 2027થી લાગુ થવાની શક્યતા છે. આ વધારો નક્કી કરવા માટે જાન્યુઆરીથી ડિસેમ્બર 2026 સુધીના મોંઘવારીના આંકડા ધ્યાનમાં લેવામાં આવશે.DAની ગણતરી માટે ઔદ્યોગિક શ્રમિકોનો ગ્રાહક ભાવ સૂચકાંક (AICPI-IW) ઉપયોગમાં લેવામાં આવે છે. આ સૂચકાંકથી રોજિંદા વપરાશની વસ્તુઓ અને સેવાઓના ભાવમાં કેટલો ફેરફાર થયો છે તેનો અંદાજ મળે છે. આ આંકડાના આધારે કર્મચારીઓને મળતા મોંઘવારી ભથ્થાની ગણતરી કરવામાં આવે છે.

આ તસવીર શેર કરો

4/9

4. કેવી રીતે 67 ટકા સુધી પહોંચી શકે છે DA?

જાન્યુઆરી 2027ના DAની ગણતરી માટે છેલ્લા 12 મહિનાના સરેરાશ AICPI-IW આંકડાને ધ્યાનમાં લેવામાં આવે છે. જાન્યુઆરી 2026માં આ આંકડો 148.6 હતો, જે ફેબ્રુઆરીમાં 148.5 અને માર્ચમાં 149.1 નોંધાયો હતો. એપ્રિલમાં આંકડો 149.9, મેમાં 150.8, જૂનમાં 151.9 અને જુલાઈમાં 153.2 થયો હતો. ઓગસ્ટ 2026માં આ આંકડો વધીને 154.4 થયો હતો.સપ્ટેમ્બરનો આંકડો હજુ જાહેર થયો નથી. આવી સ્થિતિમાં સપ્ટેમ્બરથી ડિસેમ્બર સુધીનો આંકડો ઓગસ્ટના સ્તર એટલે કે 154.4 પર જળવાઈ રહે તેવું માનીને અંદાજ લગાવવામાં આવ્યો છે. આ આંકડાઓના આધારે 12 મહિનાનો સરેરાશ AICPI-IW 152 થાય છે. આ સરેરાશને DAના ફોર્મ્યુલામાં મૂકવામાં આવે તો મોંઘવારી ભથ્થાનો દર આશરે 67.46 ટકા આવે છે.

આ તસવીર શેર કરો

5/9

5. DA ગણતરીનું ફોર્મ્યુલા શું છે?

મોંઘવારી ભથ્થાની ગણતરી માટે નક્કી કરેલા ફોર્મ્યુલાનો ઉપયોગ થાય છે. આ ફોર્મ્યુલા 2016થી બદલાયો નથી. DAની ગણતરી માટે છેલ્લા 12 મહિનાના સરેરાશ AICPI-IWને 2.88 વડે ગુણવામાં આવે છે. ત્યારબાદ તેમાંથી 261.41 બાદ કરવામાં આવે છે અને મળેલી સંખ્યાને 261.41 વડે ભાગીને 100થી ગુણવામાં આવે છે.આ ગણતરી પ્રમાણે 152ને 2.88 વડે ગુણતાં 437.76 થાય છે. તેમાંથી 261.41 બાદ કરતાં 176.35 મળે છે. હવે 176.35ને 261.41 વડે ભાગતાં 0.674607 થાય છે. આ સંખ્યાને 100થી ગુણતાં DAનો દર 67.46 ટકા આવે છે.આ રીતે મોંઘવારી ભથ્થાનો દર આશરે 67.46 ટકા આવે છે. હાલ DA 63 ટકા હોવાથી ગણતરી પ્રમાણે 4.46 ટકાનો વધારો દેખાય છે.

આ તસવીર શેર કરો

6/9

6. કર્મચારીઓને 4 ટકા DA વધારાનો લાભ મળી શકે

ગણતરીમાં DAનો દર 67.46 ટકા આવતો હોવા છતાં કર્મચારીઓને 67 ટકા DA મળવાનો અંદાજ છે. તેનું કારણ એ છે કે મોંઘવારી ભથ્થાની જાહેરાત વખતે સામાન્ય રીતે દશાંશ પછીના આંકડાને ધ્યાનમાં લેવામાં આવતા નથી અને નીચેના પૂર્ણ આંકડા પ્રમાણે દર નક્કી કરવામાં આવે છે.આથી હાલના 63 ટકામાં 4 ટકાનો વધારો થઈને DA 67 ટકા થઈ શકે છે. જોકે આ માત્ર અંદાજ છે. સપ્ટેમ્બરથી ડિસેમ્બર 2026 દરમિયાન AICPI-IWના આંકડામાં ફેરફાર થશે તો DAની ગણતરી પણ બદલાઈ શકે છે. જો મોંઘવારી સૂચકાંક વધશે તો DAનો દર પણ વધારે આવી શકે છે. બીજી તરફ આંકડો ઘટશે તો વધારાનો અંદાજ ઓછો થઈ શકે છે.

આ તસવીર શેર કરો

7/9

7. કર્મચારી સંગઠનોની 8મા પગાર પંચ સમક્ષ મોટી માંગ

8મા પગાર પંચની ભલામણોને લઈને કર્મચારી સંગઠનો પણ પોતાની માગણીઓ રજૂ કરી રહ્યાં છે. તેમની મુખ્ય માગ છે કે DAની ગણતરીમાં રાઉન્ડિંગ કરવાની જગ્યાએ જે વાસ્તવિક આંકડો આવે તેના આધારે વધારો આપવામાં આવે. આ પદ્ધતિને પોઈન્ટ-ટુ-પોઈન્ટ DA કહેવામાં આવે છે.ફેડરેશન ઓફ નેશનલ પોસ્ટલ ઓર્ગેનાઈઝેશન્સ (FNPO)એ માગ કરી છે કે કર્મચારીઓને રાઉન્ડિંગ વગર વાસ્તવિક ગણતરી પ્રમાણે DA મળવું જોઈએ. આ ઉપરાંત DA અને DR એટલે કે મોંઘવારી ભથ્થું અને મોંઘવારી રાહત 25 ટકાથી વધારે થાય ત્યારે તેને બેઝિક પગારમાં ઉમેરી દેવાની પણ માગ કરવામાં આવી છે.ભારત પેન્શનર્સ સમાજે પણ DA અને DRમાં દર ત્રણ મહિને ફેરફાર કરવાની માગ કરી છે. સંગઠનનું કહેવું છે કે ત્રણ મહિનાના સરેરાશ મોંઘવારી સૂચકાંકના આધારે વધારો આપવો જોઈએ, જેથી મોંઘવારીની અસર પ્રમાણે કર્મચારીઓ અને પેન્શનરોને રાહત મળી શકે.

આ તસવીર શેર કરો

8/9

8. 8મો પગાર પંચ ક્યારે આપશે રિપોર્ટ?

8મા પગાર પંચની રચના નવેમ્બર 2025માં કરવામાં આવી હતી. પંચને પોતાની ભલામણો તૈયાર કરવા માટે 18 મહિનાનો સમય આપવામાં આવ્યો છે. આ સમય પ્રમાણે મે 2027 સુધીમાં પંચ કેન્દ્ર સરકારને પોતાનો રિપોર્ટ સોંપી શકે છે. એટલે મે-જૂન 2027ની આસપાસ તેની ભલામણો સામે આવવાની શક્યતા છે.જો જાન્યુઆરી 2027થી DA વધીને 67 ટકા થાય તો 8મા પગાર પંચની નવી પગાર વ્યવસ્થા લાગુ થાય તે પહેલાંનો આ 7મા પગાર પંચ હેઠળનો છેલ્લો DA વધારો બની શકે છે.

આ તસવીર શેર કરો

9/9

9. 8મો પગાર પંચ લાગુ થયા પછી DAનું શું થશે?

નવા પગાર પંચની ભલામણો લાગુ થયા બાદ હાલના DAને નવા બેઝિક પગારમાં સામેલ કરવામાં આવે તેવી શક્યતા છે. ત્યારબાદ નવા પગાર માળખા પ્રમાણે મોંઘવારી ભથ્થાની ગણતરી ફરીથી શરૂ થઈ શકે છે. એટલે નવા પગાર માળખામાં DAનો દર ફરી શૂન્યથી શરૂ થઈ શકે છે.પરંતુ તેનો અર્થ એવો નથી કે કર્મચારીઓને અગાઉ મળતા 67 ટકા DAનો લાભ ગુમાવવો પડશે. આ રકમ નવા બેઝિક પગારની ગણતરીમાં સામેલ થઈ શકે છે. નવી પગાર વ્યવસ્થામાં DA કેવી રીતે સામેલ થશે અને કઈ તારીખથી તેનો અમલ થશે તે અંગેનો અંતિમ નિર્ણય કેન્દ્ર સરકારની મંજૂરી અને સત્તાવાર આદેશ બાદ જ સ્પષ્ટ થશે.હાલ જાન્યુઆરી 2027થી 67 ટકા DA મળવાનો અંદાજ છે. કર્મચારીઓએ તેને સરકારની સત્તાવાર જાહેરાત ન થાય ત્યાં સુધી સંભવિત વધારો જ માનવો જોઈએ.

આ તસવીર શેર કરો

સંકળાયેલા મુદ્દાઓ

DA Hike 2027 મોંઘવારી ભથ્થું 8th Pay Commission