મેઘો મુશળધાર / જેતપુરમાં સવા 3 ઈંચ વરસાદ, છેલ્લા 24 કલાકમાં ગુજરાતના 44 તાલુકામાં મેઘાએ બોલાવી ધડબડાટી

• છેલ્લા 24 કલાકમાં રાજ્યના 44 તાલુકામાં વરસાદ
• સૌથી વધુ જેતપુરમાં સવા 3 ઈંચ વરસાદ
• સાર્વત્રિક વરસાદથી ડેમમાં પાણીની આવક વધી
• ગઢડા તાલુકાના લીબાળી ડેમના 3 દરવાજા બે ફૂટ ખોલાયા

દેશના દરેક રાજ્યમાં હાલ વરસાદ પડી રહ્યો છે. લોકોને ગરમીમાંથી રાહત મળી રહી છે. 8 જૂને કેરળમાં ચોમાસાએ દસ્તક દીધા બાદ મોટાભાગના રાજ્યમાં વરસાદ પહોંચી ગયો છે. હવામાન વિભાગની આગાહી અનુસાર, આજે સાઉથ વેસ્ટ મોનસૂને આખા દેશને કવર કરી લીધો છે. જેના કારણે સમગ્ર દેશમાં ચોમાસું બેસી ગયું છે. ચોમાસું પહોંચ્યું ન હોય તેવો કોઈ વિસ્તાર બાકી નથી. બીજી તરફ દક્ષિણ ના રાજ્યોમાં આગામી 5 દિવસ સુધી ભારેથી અતિભારે વરસાદની ચેતવણી જાહેર કરવામાં આવી છે. ગુજરાતમાં ખાસ કરીને સૌરાષ્ટ્રના જિલ્લાઓમાં ભારેથી અતિભારે વરસાદના પરિણામે અનેક નદી નાળાં છલકાયા છે. સાયક્લોનિક સર્ક્યુલેશન અને લો પ્રેશરથી ગુજરાતમાં સારો વરસાદ વરસી રહ્યો છે. છેલ્લા 24 કલાકમાં ગુજરાતના 44 તાલુકામાં વરસાદ નોંધાયો છે. જેમાં સૌથી વધારે વરસાદ જેતપુરમાં સવા 3 ઈંચ નોંધાયો છે. 

ગુજરાતના 44 તાલુકાઓમાં નોંધાયો વરસાદ
જ્યારે મેંદરડામાં સવા 2 ઈંચ અને ધ્રોલમાં પોણા 2 ઈંચ વરસાદ નોંધાયો છે. તો કુતિયાણામાં 1.5 ઈંચ, ગારિયાધારમાં સવા ઈંચ, હાંસોટમાં 1 ઈંચ, ધારીમાં પોણો ઈંચ, કલ્યાણપુરમાં પોણો ઈંચ, બાબરામાં પોણો ઈંચ, લિલિયામાં પોણો ઈંચ, કુંકાવાવમાં પોણો ઈંચ, ટંકારામાં પોણો ઈંચ, જામ કંડોરણામાં પોણો ઈંચ, ધોરાજીમાં પોણો ઈંચ, જસદણમાં પોણો ઈંચ વરસાદ નોંધાયો છે. 

ગઢડાના લીબાળી ડેમના 3 દરવાજા ખોલાયા
ભારે વરસાદના કારણે ડેમમાં પાણીની આવક થઈ છે. જેથી બોટાદના ગઢડા તાલુકાના લીબાળી ડેમના 3 દરવાજા બે ફૂટ ખોલાયા છે. લીબાળી ડેમના ઉપરવાસમાં ઇતરીયા સહિતના ગામોમાં ધોધમાર વરસાદ વરસાદ થતાં લીબાળી ડેમમાં 3200 ક્યુસેક પાણીની આવક થઈ છે. ડેમનું રૂલ લેવલ 125.50 ફૂટ છે. જેથી ડેમના 3 દરવાજા ખોલીને પાણી છોડવામાં આવ્યું છે. જેના કારણે નીચાણવાળા 16 ગામોને એલર્ટ કરાયા છે. બોટાદના રામપરા, કેરાળા માંડવધાર અને ગઢડા એલર્ટ કરાયા છે. જ્યારે અડતાળા, પીપળ, તતાણા અને લાખણકા તેમજ ઇશ્વરિયાને એલર્ટ અપાયું છે. આ ઉપરાંત ભાવનગર જિલ્લાના દરેડ, હડમતીયા, લોલીયાણા, પછેગામ, ખેતા ટીબી અને વલ્લભીપુરને એલર્ટ કરાયા છે. 

જૂનાગઢના માળિયાની મેઘલ નદીમાં પૂર 
જૂનાગઢના માળિયામાં ઉપરવાસમાં વરસાદને કારણે સતત પાણીનું સ્તર વધી રહ્યું છે. તેવામાં માળિયામાં આવેલી મેઘલ નદી ગાંડીતૂર બની છે. મેઘલ નદીમાં અચાનક વધેલા જળસ્તરને કારણે 2 લોકો પાણીમાં તણાયા હતા. જોકે, સ્થાનિક તંત્ર અને લોકોએ બંન્ને વ્યક્તિઓનું રેસ્ક્યુ કરી સલામત સ્થળે ખસેડ્યા હતા. તો દેવગામ અને હીરણવેલ વચ્ચે ધસમસતા પાણીમાં ટ્રેક્ટર અને બાઇક તણાયું હતું. સદનસીબે બંન્ને ચાલકો સલામત છે.