- ભારતમાં મોટાપાયે સોનાની દાણચોરી
- નવેમ્બર 2022 સુધી દેશમાં 3,083 કિલો સોનું જપ્ત કરાયું
- નાણા રાજ્યમંત્રી પંકજ ચોધરીએ લોકસભામાં આપી માહિતી
ભારતમાં ખૂબ મોટાપાયે સોનાની તસ્કરી થાય છે અને વિદેશમાંથી લોકો મોટી માત્રામાં ભારતમાં સોનું ઘુસાડે છે જોકે તસ્કરોનો આ પ્લાન કદી પણ સફળ થઈ શકતો નથી કારણ કે સરકારી એજન્સીઓ દ્વારા આવા સોનાને ઝડપી પાડવામાં આવતું હોય છે.
નાણાં રાજ્યમંત્રી પંકજ ચૌધરીએ લોકસભાને કહ્યું
સોના સંબંધિત સરકારે સંસદને જે જાણ કરી છે તે ખરેખર ચોંકાવનારી છે. નાણાં રાજ્યમંત્રી પંકજ ચૌધરીએ લોકસભામાં જણાવ્યું હતું કે આ વર્ષે નવેમ્બર સુધીમાં 3,083 કિલો સોનું જપ્ત કરવામાં આવ્યું હતું. દેશભરમાં 2021માં 2383 કિલો સોનું અને 2020માં 2154 કિલો સોનું જપ્ત કરવામાં આવ્યું હતું. 2019માં 3673 કિલો સોનું જપ્ત કરવામાં આવ્યું હતું.
જાણો કયા રાજ્યોમાંથી કેટલું સોનું મળ્યું
સોનાની દાણચોરીના સૌથી વધુ કેસ કેરળથી આવ્યા છે. કેરળમાં 2022માં 948 કેસમાં 690 કિલો સોનું જપ્ત કરવામાં આવ્યું હતું. વર્ષ 2021માં 587 કિલો સોનું જપ્ત કરવામાં આવ્યું હતું અને 2020માં 406 કિલો સોનું જપ્ત કરવામાં આવ્યું હતું. સાથે જ વર્ષ 2019માં 725 કિલો સોનું જપ્ત કરવામાં આવ્યું હતું. કેરળ ઉપરાંત મહારાષ્ટ્રમાં આ વર્ષે નવેમ્બર 2022 સુધીમાં સોનાની દાણચોરીના 484 કેસ નોંધાયા હતા, જેમાં 474 કિલો સોનું જપ્ત કરવામાં આવ્યું હતું. તમિળનાડુમાં 809 કેસ નોંધાયા છે અને 440 કિલો સોનું કબજે કર્યું છે. પશ્ચિમ બંગાળમાં 214 કેસ નોંધાયા છે અને 369 કિલો સોનું જપ્ત કર્યું છે.
સોનાની દાણચોરી મામલે કડક થયા નાણામંત્રી
નાણાં રાજ્યમંત્રી પંકજ ચૌધરીએ જણાવ્યું હતું કે કસ્ટમ સેક્ટરના અધિકારીઓ અને ડિરેક્ટોરેટ ઓફ રેવન્યુ ઇન્ટેલિજન્સ (ડીઆરઆઈ) સતત નજર રાખે છે. ગત સપ્તાહે ડિરેક્ટોરેટ ઓફ રેવન્યુ ઇન્ટેલિજન્સના અધિકારીઓને સંબોધિત કરતા નાણામંત્રી નિર્મલા સીતારમણે કહ્યું હતું કે કસ્ટમ ડ્યૂટી હોવા છતાં સોનાની દાણચોરી થઇ રહી છે. તેમણે ગુપ્તચર અધિકારીઓને પણ પૂછ્યું હતું કે શું આયાત અને દાણચોરી વચ્ચે કોઈ પેટર્ન અને કડી છે.
સોના પરની આયાત ડ્યુટી વધારીને 12.5 ટકા કરાઈ
સ્થાનિક ચલણ પરનું દબાણ ઓછું કરવા અને આયાતને સરળ બનાવવા માટે જુલાઈમાં સોના પરની આયાત ડ્યુટી 7.5 ટકાથી વધારીને 12.5 ટકા કરવામાં આવી હતી. 2021-22માં સોનાની આયાત 33 ટકા વધીને 46.14 અબજ ડોલર થઈ છે. ચીન પછી ભારત સોનાનો વિશ્વનો બીજો સૌથી મોટો ઉપભોક્તા દેશ છે.
શું છે જપ્ત કરવામાં આવેલા સોનાનું
ડીઆરઆઈ, કસ્ટમ વિભાગ કે એરપોર્ટ ઓથોરિટી કે બીજી કોઈ સરકારી એજન્સી દ્વારા જપ્ત કરવામાં આવેલું સોનું સરકારી ખજાનામાં જમા કરાવી દેવું પડતું હોય છે.
