અમદાવાદ / આવી રીતે છેતરાતા નહીં, વિધવા મહિલાઓને મદદ કરવાનો હાથ લબાવી ઘરેણાં કરતી છૂમંતર, મોડસ ઓપરેન્ડી જાણી પોલીસ પણ સ્તબ્ધ

• વિધવાને સહાય આપવાના બહાને છેતરપિંડી
• અમદાવાદ ક્રાઈમ બ્રાન્ચે પકડી મહિલાને
• રાજ્યમાં ૨૫થી વધુ ગુના મહિલા વિરૂધ નોંધાયા

અમદાવાદ ક્રાઈમ બ્રાન્ચે આજે એક મહિલા આરોપીની ધરપકડ કરી છે. તેણી વિધવાને સહાય અપાવવાના બહાને સોનાના દાગીના પડાવી લેતી હતી. પકડાયેલ મહિલા આરોપી અગાઉ પણ આ જ મોડેસ ઓપરેન્ડીથી અનેક ગુનાઓને અંજામ આપી ચુકી છે. સમગ્ર કૌભાંડની વાત કરીએ તો સૈયદાબીબીએ અમદાવાદમાં સાબરમતી વિસ્તાર અને કારંજ પોલીસ સ્ટેશનમાં વિધવા મહિલાઓને પોતાના શિકાર બનાવીને દાગીના પડાવી લીધા હતા. ત્યારે ભુજમાં પણ આ જ મોડેસ ઓપરેન્ડીથી એક વિધવા મહિલાને ભોગ બનાવી હોવાની ફરિયાદ ભુજ એ ડિવિઝન પોલીસ સ્ટેશનમાં નોંધવામાં આવી હતી. 

મહિલા આરોપીની ઉમરેઠના દાગજીપુરા ગામમાંથી કરી ધરપકડ
અમદાવાદ ક્રાઈમ બ્રાન્ચની ટીમને ચોક્કસ માહિતી મળી હતી કે સૈયદાબીબી પઠાણ આણંદના ઉમરેઠમા રહે છે. જે હકીકત આધારે પોલીસે ઉમરેઠના દાગજીપુરા ગામમાંથી તેની ધરપકડ કરી હતી. પકડાયેલ આરોપી મહિલાની પૂછપરછ કરતા તેને કબૂલ્યું હતું કે અમદાવાદના ભદ્રકાળી માતા મંદિર પાસે પણ એક વિધવા મહિલાને સહાય અપાવવાની બહાને તેના દાગીના ઉતરાવી લીધા હતા. 

કેવી હતી મોડેસ ઓપરેન્ડી ?
સૈયદાબીબીની મોડેસ ઓપરેન્ડીની વાત કરીએ તો આ મહિલા આરોપી કોઈપણ વિધવા મહિલાને સહાય અપાવવાના બહાને અન્ય જિલ્લામાં હોટલમાં કે ઘરમાં બેસાડીને અધિકારી ઇન્સ્પેક્શનમાં આવશે ત્યારે ગરીબ હોવાનું દેખાડવાના બહાને ફરિયાદીના દાગીના ઉતરાવી સાચવવાના બહાને દાગીના લઈ ફરાર થઈ જતી હતી. પોલીસે ગુનાહિત ઇતિહાસ ચકાસતા અત્યાર સુધીમાં ગુજરાતના અનેક જિલ્લાઓમાં 25 થી પણ વધુ ગુનાઓ તેના વિરુદ્ધ નોંધાયેલા છે. અને ત્રણ વખત પાસા હેઠળ સજા પણ ભોગવી ચુકયાનું સામે આવ્યું છે.