જાણવા જેવું / કોઇ પણ ફ્રોડ કરનારને આખરે કેમ કહેવાય છે '420'?, નથી ખબરને તો પહેલાં આ જાણી લો દિલચસ્પ કહાની

• કેમ કોઇ પણ ઠગ કે ફ્રોડને કેમ કહેવાય છે '420'?
• પોલીસ દ્વારા તેની વિરૂદ્ધ કલમ ​​420 લાગુ કરવામાં આવે છે
• આવી વ્યક્તિને થઇ શકે છે 7 વર્ષ સુધીની સજા

તમને જણાવી દઈએ કે, તેનું કારણ ભારતીય દંડ સંહિતાની કલમ 420 છે. જ્યારે પણ કોઈ વ્યક્તિ કોઇની સાથે છેતરપિંડી કરે અથવા તો તે પોતાની પ્રમાણિકતા બરાબર ના દાખવે તો પોલીસ દ્વારા તેની પર કલમ ​​420 લાગુ કરવામાં આવે છે. આથી જ સામાન્ય બોલચાલમાં પણ લોકોએ આ નંબરને ઠગ અને બેઇમાની સાથે જોડી દીધો છે.

જો આપણે કલમ 420 ના કાયદાકીય પાસા જોઈએ તો એવું કહેવામાં આવ્યું છે કે, - 'કોઈ પણ વ્યક્તિ કે જે અન્ય વ્યક્તિ સાથે છેતરપિંડી કરે છે, છળકપટ કરે છે, બેઇમાનીથી કોઇ અન્ય વ્યક્તિની બહુમૂલ્ય વસ્તુ અથવા તો સંપત્તિમાં ફેરફાર કરી નાખે છે અથવા તો તેને નષ્ટ કરી દે છે અથવા તો આ કામમાં કોઇ અન્ય વ્યક્તિને સહારો કરે છે તો તેની વિરૂદ્ધ 420ની કલમ લગાવવામાં આવે છે.

આ સાથે કોઇ વ્યક્તિ સ્વાર્થ માટે અન્ય વ્યક્તિ સાથે બનાવટીનો રોલ ભજવી, બનાવટી સહીઓ કરીને તેમજ નાણાંકીય અથવા તો માનસિક દબાણ હેઠળ કોઇ અન્ય વ્યક્તિની સંપત્તિને પોતાના નામે કરે છે તો તેની વિરૂદ્ધ પણ કલમ 420 લગાવવામાં આવે છે.

7 વર્ષ સુધીની સજા થઈ શકે છે

આવાં કેસોની સુનાવણી પ્રથમ વર્ગના મેજિસ્ટ્રેટની કોર્ટમાં થાય છે. જેમાં ગુનેગારને વધુમાં વધુ 7 વર્ષ સુધીની જેલ થઈ શકે છે. જેમાં સજાની સાથે દંડની પણ જોગવાઇ કરવામાં આવી છે.

પોલીસ સ્ટેશનમાંથી જામીન મેળવવા બની જાય છે મુશ્કેલ

આ ગુનો બિનજામીનપાત્ર અને કોગ્નિઝેબલ ગુનાની શ્રેણીમાં આવે છે. એટલે કે પોલીસ સ્ટેશનમાંથી આવાં ગુનેગારને જામીન મળતા નથી. આવાં કિસ્સાઓમાં જજ જ કોર્ટમાં મહત્વનો ચુકાદો સંભળાવી શકે. આવાં કિસ્સાઓમાં કોર્ટની પરવાનગીથી જ બંને પક્ષો વચ્ચે સમાધાન પણ થઈ શકે છે.