કવાયત / ચીનને જડબાતોડ જવાબ, ભારતીય નેવીના 3 વોરશીપ પહોંચ્યા ફિલિપાઈન્સની રાજધાની મનીલા

Indian Warships In Philippines : ભારતના ત્રણ યુદ્ધ જહાજ ફિલિપાઈન્સની રાજધાની મનીલા પહોંચી ગયાના સમાચાર સામે આવતા જ ચીનની ચિંતામાં વધારો થવો એ સ્વાભાવિક છે. વાત જાણે એમ છે કે, ભારતના ત્રણ યુદ્ધ જહાજ મિસાઈલ ડિસ્ટ્રોયર INS દિલ્હી, ફ્લીટ ટેન્કર INS શક્તિ અને એન્ટી સબમરીન INS કિલ્ટન ફિલિપાઈન્સની રાજધાની મનીલા પહોંચી ગયા છે. તેઓ દક્ષિણ પેસિફિક મહાસાગરમાં લાંબા સમય સુધી તૈનાત રહેશે. જેનો હેતુ પોતાના અને સાથીદારોના હિતોનું રક્ષણ કરવાનો છે. આ પહેલા ચીને સર્વેના નામે ત્રણ જાસૂસી જહાજો હિંદ મહાસાગરમાં મોકલ્યા હતા. આ સિવાય નૌકાદળના ઘણા જહાજો પણ શ્રીલંકાની મુલાકાત લઈ ચૂક્યા છે. આ દરમિયાન ફિલિપાઈન્સ સાથે ચીનનો તણાવ ચરમસીમા પર છે.

ભારતીય નૌકાદળના પ્રવક્તાએ કહ્યું કે, ફિલિપાઈન્સ સાથે દરિયાઈ સહયોગ વધારવાના ઉદ્દેશ્ય સાથે ત્રણેય ભારતીય યુદ્ધ જહાજો મનીલા પહોંચ્યા છે. આ યુદ્ધ જહાજો નેવીના ઈસ્ટર્ન ફ્લીટનો ભાગ છે. મનીલામાં તૈનાતી દરમિયાન ભારતીય નૌકાદળ અને ફિલિપાઈન્સની નૌકાદળ તમામ માહિતી એકબીજા સાથે શેર કરશે અને અનેક પ્રવૃત્તિઓમાં ભાગ લેશે. ભારતીય યુદ્ધ જહાજ ફિલિપાઈન્સ નેવી સાથે દરિયાઈ ભાગીદારી અભ્યાસમાં પણ ભાગ લેશે. અગાઉ ભારતીય યુદ્ધ જહાજો સિંગાપોર, મલેશિયા, વિયેતનામ જેવા દેશોની સમાન સદ્ભાવનાની મુલાકાતે ગયા હતા. દક્ષિણ ચીન સાગરને લઈને ચીનનો લગભગ આ તમામ દેશો સાથે વિવાદ છે.

આવો જાણીએ ફિલિપાઈન્સ-ચીન વિવાદ શું છે ?

વાસ્તવમાં સાઉથ ચાઈના સી (South China sea )ને લઈને ચીનની લગભગ અડધો ડઝન દેશો સાથે દુશ્મની છે. ફિલિપાઈન્સ સાથે તેનો તણાવ લગભગ બે દાયકાથી ચાલી રહ્યો છે. કારણ છે દક્ષિણ ચીન સમુદ્રનો બીજો થોમસ શોલ વિસ્તાર જેને ફિલિપાઈન્સ આયુંગિન શોલ કહે છે. ચીન તેને પોતાનો દાવો કરે છે. આ મૂળભૂત રીતે પાણીમાં ડૂબેલા ખડક જેવી જગ્યા છે અને 1999થી ફિલિપાઈન્સે અહીં એક જહાજ પાર્ક કર્યું છે જે તેને અમેરિકાથી મળ્યું છે. આ જહાજ પર તેના કેટલાક સૈનિકો પણ તૈનાત છે. ફિલિપાઈન્સ અહીં ખોરાક અને અન્ય જરૂરી વસ્તુઓ મોકલવાનું ચાલુ રાખે છે. ચીન દરરોજ તેનો વિરોધ કરે છે. તાજેતરમાં જ્યારે ફિલિપાઇન્સ તેના સૈનિકોને આવશ્યક ચીજવસ્તુઓ પહોંચાડવા જઈ રહ્યું હતું ત્યારે ચીની કોસ્ટ ગાર્ડ્સે તેના જહાજને અટકાવ્યું. તેના લશ્કરી પુરવઠા પર પાણીની તોપથી હુમલો કરવામાં આવ્યો. અમેરિકા જેવા ઘણા દેશોએ ચીનની આ કાર્યવાહીને ઉશ્કેરણી ગણાવી અને જોરદાર વિરોધ કર્યો.

ચીનને એની ભાષામાં ભારતે આપ્યો જવાબ

ચીન દક્ષિણ ચીન સાગર તેમજ હિંદ મહાસાગરમાં પોતાનું વર્ચસ્વ વધારવા માટે સતત પ્રયાસો કરી રહ્યું છે. તેના ત્રણ જાસૂસી જહાજો છેલ્લા ઘણા મહિનાઓથી હિંદ મહાસાગર વિસ્તારમાં પેટ્રોલિંગ કરી રહ્યા છે. હિંદ મહાસાગર ક્ષેત્રના જે દેશોએ ભારતનો તણાવ વધાર્યો હતો તે ચીન દ્વારા તરત જ આંચકી લેવામાં આવ્યા હતા. તેણે પાડોશી શ્રીલંકા અને માલદીવ સાથે મિત્રતા વધારી અને પછી ત્યાં પોતાનું જાસૂસી જહાજ મોકલ્યું. નિષ્ણાતોનું કહેવું છે કે, આ જાસૂસી જહાજો દ્વારા ચીન હિંદ મહાસાગરમાં એવી જગ્યાઓ શોધી રહ્યું છે જ્યાં તે પોતાની સબમરીન અને અન્ય હથિયારો તૈનાત કરી શકે. લક્ષ્યાંક ભારત છે. હવે ભારતે ચીનના કટ્ટર દુશ્મન ફિલિપાઈન્સમાં તેના ત્રણ યુદ્ધ જહાજો મોકલીને ચીનને તેની જ ભાષામાં જવાબ આપ્યો છે.

વધુ વાંચો : ગેરકાયદે કંબોડિયા પહોંચેલા 300 ભારતીયો પર કાર્યવાહી, સંચાલકો વિરુદ્ધ બળવો કરનારાઓની ધરપકડ

દુશ્મનનો દુશ્મન ભારતનો મિત્ર

આ તરફ હવે જે દેશો સાથે ચીનની દુશ્મની છે તેની સાથે ભારત મિત્રતા વધારી રહ્યું છે. હાલ તમે ફિલિપાઈન્સનું ઉદાહરણ જ લઈ લો. ભારતે તાજેતરમાં ફિલિપાઈન્સને બ્રહ્મોસ સુપરસોનિક ક્રૂઝ મિસાઈલ આપી હતી. આ મિસાઇલોની ગણતરી વિશ્વની સૌથી ઝડપી સુપરસોનિક ક્રૂઝ મિસાઇલોમાં થાય છે. આ સિવાય મિસાઈલ બેટરી અને લોન્ચર જેવી વસ્તુઓ પણ આપવી પડશે. ભારતે ફિલિપાઈન્સને શસ્ત્રો આપ્યા ત્યારે ચીન ચોંકી ગયું હતું. કહ્યું કે એ નક્કી કરવું પડશે કે આનાથી કોઈ ત્રીજા પક્ષની શાંતિમાં ખલેલ ન પહોંચે.