- અમદાવાદમાં ખુલ્લેઆમ દારૂનું વેચાણ
- શાહીબાગમાં દેશી દારૂના વેચાણનો વિડીયો વાયરલ
- સુરેન્દ્રનગરમાંથી ઝડપાયો લાખો રૂપીયાની કિંમતનો દારૂ
રાજ્યમાં દારૂબંધી વચ્ચે પણ અમદાવાદમાં દારૂનું દૂષણ વકરી રહ્યું છે. અવારનવાર દારૂના જથ્થા સાથે આરોપીઓ ઝડપાઇ રહ્યા છે ઉપરાંત છાસવારે દેશી દારૂના વિડીયો પણ વાયરલ થઇ રહ્યા છે જે દારૂબંધી માત્ર કાગળ પર જ રહી હોવાના પુરાવા સમાન સાબિત થઇ રહ્યા છે. તેવામાં વધુ એક વખત અમદાવાદમાં દેશી દારૂના વેચાણનો વીડિયો વાયરલ થયો છે. અમદાવાદના શાહીબાગ વિસ્તારમાં ખોડીદાસની નવી ચાલીના નાકા નજીક 3 ભાઈઓ દેશી દારૂ વેચતા હોવાનું વીડિયોમાં દ્રશ્યમાન થઇ રહ્યું છે. જેથી પોલીસે તપાસ હાથ ધરી છે. હાલ આ વીડિયો સોશિયલ મીડિયામાં વાયરલ થઇ રહ્યો છે. જેની પુષ્ટી VTV કરતું નથી. નોંધનિય છે કે વારંવાર સામે આવતા વિડીયોને લઈને અમદાવાદ પોલીસની આબરૂ ધૂળધાણી થઇ રહી છે.
સુરેન્દ્રનગરમાં દારુના કટિંગ વેળાએ LCB ત્રાટકી
બીજી તરફ સુરેન્દ્રનગર જિલ્લાના ધ્રાંગધ્રાના સરવાલમાંથી પણ વિદેશીનો જંગી જથ્થો ઝડપાયો છે. જેને લઈને દારૂબંધી સામે સવાલો ઊભા થયા છે. નોંધનિય છે કે છેલ્લા ઘણા સમયથી સુરેન્દ્રનગર જિલ્લામાં પોલીસ માત્ર નામની જ રહી હોય તેમ હત્યા, લૂંટ, ચોંરી સહીતના ગુન્હાઓએ માઝા મૂકી છે તેવામાં વધુ એક વખત બુટલેગરે ધ્રાંગધ્રાના સરવાલ ગામે દારૂ મંગાવ્યો હોવાનો પર્દાફાસ થતા પોલીસની કામગીરી સામે પણ લોકોમાં સો મણનો સવાલ ઊભો થયો છે. દારૂનો જથ્થો ઊતરતો હોવાની LCB ને બાતમી મળી હતી. જેને લઈને LCBએ તાત્કાલિક રેડ પાડી હતી. સુરેન્દ્રનગરના બુટલેગરે વિદેશી દારૂ ભરેલી ટ્રક મંગાવી હતી જે વેળાએ વિદેશ દારુનું કટિંગ થઈ રહ્યુ હતુ ત્યા પોલીસે ત્રાટકી હતી અને લાખોના દારૂ સાથે બે બુટલેગરની ધરપકડ કરી હતી.
- દારૂબંધી હોવા છતાં ગુજરાતમાં દારૂ ક્યાંથી આવે છે?
- શું બુટલેગરોને કાયદાનો ભય રહ્યો નથી?
- બુટલેગરો પર કોનો હાથ છે?
- પોલીસ વિભાગ કેમ દાખલારૂપ કાર્યવાહી કરતું નથી?
- ગુજરાત પોલીસ દારૂબંધીનો અમલ કેમ કરાવી શકતી નથી?
- શું બુટલેગરો પોલીસને હપ્તો પહોંચાડે છે?
- શું લઠ્ઠાકાંડ જેવો બનાવ બનશે પછી જ પોલીસ કાર્યવાહી કરશે?
- પોલીસને કાર્યવાહી કરતા કોણ રોકે છે?
- શું પોલીસને બુટલેગરો વિરુદ્ધ કાર્યવાહી કરવામાં ભય લાગે છે?
