આસ્થા / સાળંગપુર હનુમાનજીનું વિશાળ સ્વરૂપ હવે આણંદના ઓડમાં જોવા મળશે, બજરંગ બલીની 39 ફૂટ ઊંચી મૂર્તિનું અનાવરણ

• આણંદમાં હનુમાનજીની મૂર્તિનું અનાવરણ 
• હર્ષ સંઘવીનાં હસ્તે મૂર્તિનું અનાવરણ
• 39 ફૂટ ઉંચી હનુમાનજીની મૂર્તિનું અનાવરણ

આણંદનાં ઉમરેઠનાં ઓડ ગામે 39 ફૂટ ઉંચી હનુમાનજીની મૂર્તિનું અનાવરણ કરવામાં આવ્યું છે. સાળંગપુરનાં કષ્ટભંજન દેવની પ્રતિકૃતિ ઓડ ગામમાં જોવા મળી રહી છે. ગૃહ રાજ્યમંત્રી હર્ષ સંઘવીનાં હસ્તે મૂર્તિનું અનાવરણ કરવામાં આવ્યું હતું, ઓડ ગામના જાહેર રસ્તા પર વિશાળ હનુમાનજી મૂર્તિ સૌનું ભક્તિનું કેન્દ્ર બન્યો છે. 

સંતો-મહંતોની ઉપસ્થિતિમાં અનાવરણ 
ઓડમાં વિરાજીત સંકટમોચન હનુમાનજી ભગવાનની 39 ફૂટ ઊંચી મૂર્તિનું સંતો-મહંતોની ઉપસ્થિતિમાં અનાવરણ કરવામાં આવ્યું હતું. આ મંગલ પ્રસંગે રાજ્યકક્ષાના મંત્રી દેવુસિંહ ચૌહાણ તથા જિલ્લાના વિવિધ મહાનુભાવો પણ ઉપસ્થિત રહ્યા હતા. 

ભક્તિમય માહોલ 
10 માસના ટૂંકા ગાળામાં 39 ફૂટ ઉંચી સંકટમોચન હનુમાનજીની મૂર્તિ તૈયાર કરાઈ છે. ભગવાનની મૂર્તીના અનાવરણ પ્રસંગે ભક્તોની ભારે ભીડ જોવા મળી હતી. અત્રે જણાવીએ કે, ઓડ ગામમાં આ મૂર્તીના અનાવરણને લઈ ગ્રામજનોમાં પણ ભક્તિમય માહોલ વચ્ચે ભારે ઉત્સાહ જોવા મળ્યો હતો.

પરિસર સ્વચ્છ રાખવા સંકલ્પ
હર્ષ સંઘવીએ જણાવ્યું હતું કે, 39 ફુટની વિશાળ પ્રતિમાના અનાવરણમાં મોટી સંખ્યામાં ઉપસ્થિત રહેલા હનુમાનજીના ભક્તો ઐતિહાસિક ક્ષણના સાક્ષી બન્યા છે. સાથે જ હર્ષ સંઘવીએ ભક્તોને શુભકામના પાઠવી હતી અને પરિસર સ્વચ્છ રાખવા સંકલ્પ પણ લેવડાવ્યા હતા, ઉપરાંત કાર્યક્રમમાં વડાપ્રધાન નરેન્દ્ર મોદીના વ્યક્તિત્વને આવરી લેતા એક પુસ્તકનું વિમોચન કરવામાં આવ્યું હતું જે સાંસદ મિતેશ પટેલ દ્વારા લખવામાં આવ્યું છે