- 6 રાજ્યોની 7 વિધાનસભા બેઠકોની પેટાચૂંટણીના આજે પરિણામો
- ગુરુવારે 7 વિધાનસભા સીટો પર યોજાઈ હતી પેટાચૂંટણી
- ભાજપ અને વિરોધ પક્ષો વચ્ચે જોવા મળી શકે છે જોરદાર ટક્કર
દેશના 6 રાજ્યોની 7 વિધાનસભા બેઠકોની પેટાચૂંટણીના આજે પરિણામો જાહેર થશે. આ માટે તમામ જગ્યાએ તૈયારીઓ પૂર્ણ કરી દેવામાં આવી છે. ગુરુવારે ઉત્તર પ્રદેશના ગોલા ગોકર્ણનાથ, બિહારના મોકામા અને ગોપાલગંજ, મહારાષ્ટ્રના અંધેરી ઈસ્ટ, તેલંગાણાના મુનુગોડે, ઓડિશાના ધામનગર અને હરિયાણાના આદમપુર વિધાનસભાની સીટો પર મતદાન થયું હતું. આ બેઠકો પર ભાજપ અને વિરોધ પક્ષો વચ્ચે જોરદાર ટક્કર જોવા મળી શકે છે.
7 વિધાનસભા સીટો પર યોજાઈ હતી પેટાચૂંટણી
જણાવી દઈએ કે, જે 7 વિધાનસભા સીટો પર પેટાચૂંટણી યોજાઈ હતી. આમાંથી કેટલીક બેઠકો ધારાસભ્યના નિધન બાદ ખાલી હતી. આ તમામ 7 બેઠકોમાંથી 3 પર ભાજપ, 2 પર કોંગ્રેસ અને એક-એક બેઠક પર આરજેડી અને ઉદ્ધવ ઠાકરે જૂથની પાર્ટીનો કબ્જો હતો.
કઈ કઈ બેઠકો પર યોજાઈ હતી પેટાચૂંટણી?
ઉત્તર પ્રદેશ (ગોલા ગોકર્ણનાથ)
ગોલા ગોકર્ણનાથ બેઠક લખીમપુર ખીરી જિલ્લામાં છે. આ બેઠક પર માર્ચ મહિનામાં ભાજપના ધારાસભ્ય અરવિંદ ગિરી ચૂંટાયા હતા. તેમના અવસાન બાદ આ બેઠક ખાલી પડી હતી. આ બેઠક પર સમાજવાદી પાર્ટી અને ભાજપ વચ્ચે પ્રતિષ્ઠાનો જંગ માનવામાં આવે છે. પેટાચૂંટણીમાં BSP અને કોંગ્રેસે ઉમેદવારો ઉભા રાખ્યા નથી, તેથી સીધો મુકાબલો ભાજપ અને સમાજવાદી પાર્ટી વચ્ચે છે.
ગોપાલગંજ સીટ પર ભાજપના ધારાસભ્ય સુભાષ સિંહના નિધન બાદ પેટાચૂંટણી યોજાઈ હતી. આ સીટ પર લાલુ યાદવના સાળા અને આરજેડી સાંસદ સાધુ યાદવે પોતાની પત્નીને બીએસપીની ટિકિટ પર ચૂંટણીના મેદાનમાં ઉતાર્યા છે. તેમની સીધી સ્પર્ધા આરજેડીના મોહન ગુપ્તા સાથે છે.
બિહાર (મોકામા)
બિહારની મોકામા સીટ પર પણ પેટાચૂંટણી યોજાઈ હતી. આ સીટ આરજેડીના ધારાસભ્ય અનંત કુમાર સિંહને ગેરલાયક ઠેરવ્યા બાદ ખાલી પડી હતી. આ બેઠકને બાહુબલી અનંત સિંહનો ગઢ માનવામાં આવે છે. આ પેટાચૂંટણીમાં પહેલીવાર ભાજપે અહીંથી પોતાનો ઉમેદવાર ઉતાર્યો છે. ભાજપે અનંત સિંહની પત્ની સામે બાહુબલી લલ્લન સિંહની પત્નીને મેદાનમાં ઉતાર્યા છે.
હરિયાણા (આદમપુર)
હરિયાણાના પૂર્વ મુખ્યમંત્રી ભજન લાલના પુત્ર કુલદીપ બિશ્નોઈ આ બેઠક પરથી ધારાસભ્ય રહી ચૂક્યા છે, જેઓ આ વર્ષે ઓગસ્ટમાં કોંગ્રેસ છોડીને ભાજપમાં જોડાયા હતા. હરિયાણામાં સત્તાધારી ગઠબંધન ભાજપ-જેજેપીએ અહીંથી બિશ્નોઈના પુત્ર ભવ્યને મેદાનમાં ઉતાર્યા છે, જ્યારે કોંગ્રેસે જય પ્રકાશને પોતાના ઉમેદવાર બનાવ્યા છે.
મહારાષ્ટ્ર (અંધેરી ઈસ્ટ - મુંબઈ)
આ વર્ષે મે મહિનામાં ઋતુજા લટકેના પતિ અને શિવસેનાના ધારાસભ્ય રમેશ લટકેના અવસાનના કારણે અંધેરી (ઈસ્ટ) બેઠક ખાલી પડી હતી. આ બેઠક પર ભાજપે મનસે અને એનસીપીની અપીલ પર છેલ્લી ઘડીએ પોતાના ઉમેદવાર મુરજી પટેલને મેદાનમાંથી હટાવી દીધા હતા. આવી સ્થિતિમાં ઉદ્ધવ જૂથના ઉમેદવાર ઋતુજાની જીત નિશ્ચિત માનવામાં આવે છે.
તેલંગાણા (મુનુગોડે)
કોંગ્રેસના ધારાસભ્ય કોમિતા રેડ્ડીએ પક્ષ બદલ્યો અને રાજીનામું આપ્યા બાદ આ બેઠક પર પેટાચૂંટણી યોજાઈ હતી. આ સીટ પર 47 ઉમેદવારો મેદાનમાં હતા, પરંતુ મુખ્ય સ્પર્ધા ભાજપના ઉમેદવાર રાજગોપાલ રેડ્ડી, TRSના પૂર્વ ધારાસભ્ય કુસુકુંતલા પ્રભાકર રેડ્ડી અને કોંગ્રેસના પી શ્રવંતી વચ્ચે જોવા મળી રહી છે.
ઓડિશા (ધામનગર)
ધામનગર બેઠક પર ભાજપના ધારાસભ્ય બિષ્ણુ સેઠીના અવસાન બાદ પેટાચૂંટણી યોજાઈ હતી. અહીંથી ભાજપે સેઠીના પુત્ર સૂર્યવંશી સૂરજને મેદાનમાં ઉતાર્યા છે. બીજી તરફ ઓડિશાના સીએમ નવીન પટનાયકની પાર્ટી બીજેડીએ અંબાતી દાસને ટિકિટ આપી છે.
