- ICC ODI વર્લ્ડ કપના સત્તાવાર શેડ્યૂલ માટે વધુ રાહ જોવી પડી શકે
- શેડ્યૂલની જાહેરાત માટે લગભગ 27 જૂનની તારીખ નક્કી કરી હતી
- PCBના સંભવિત નવા અધ્યક્ષના નિવેદને તેને લંબાવવાનો સંકેત આપ્યો
ભારતમાં યોજાનાર ICC ODI વર્લ્ડ કપના સત્તાવાર શેડ્યૂલ માટે વધુ રાહ જોવી પડી શકે છે. વાત એમ છે કે ICCએ ODI વર્લ્ડ કપના શેડ્યૂલની જાહેરાત માટે લગભગ 27 જૂનની તારીખ નક્કી કરી હતી અને સાથે એ પણ જાણીતું છે કે 5 ઓક્ટોબરથી ટૂર્નામેન્ટ શરૂ થવાની હતી. હવે આ બધા વચ્ચે પાકિસ્તાન ક્રિકેટ બોર્ડ (PCB)ના સંભવિત નવા અધ્યક્ષ ઝકા અશરફને કારણે ICC ODI વર્લ્ડ કપના સત્તાવાર શેડ્યૂલ માટે વધુ રાહ જોવી પડી શકે છે. સંભવિત નવા અધ્યક્ષે તેમના નિવેદન સાથે રાહ જોવા અને તેને લંબાવવાનો સંકેત આપ્યો છે.
જણાવી દઈએ કે ભારતીય ક્રિકેટ કંટ્રોલ બોર્ડ એટલે કે BCCI અને ICCએ 27 જૂનના રોજ મોટા પાયે શેડ્યૂલ જાહેર કરવાની યોજના બનાવી હતી. પણ હાલ જ ઝકા અશરફે પોતાના નિવેદનમાં સ્પષ્ટ કર્યું હતું કે આ મેગા ઈવેન્ટમાં ભાગ લેતા પહેલા ઘણા મુદ્દાઓ છે જેને ઉકેલવાની જરૂર છે. આ સાથે જ એમના નિવેદનમાં એમને હાઇબ્રિડ મોડલ હેઠળ એશિયા કપનું આયોજન કરવાની વાતને પણ નકારી કાઢી છે.
વાત એમ છે કે ઝકા અશરફે પ્રેસ કોન્ફરન્સમાં કહ્યું કે પાકિસ્તાન સામે ઘણા પડકારો છે. ઘણા વર્ષોના કેસો ઉકેલવા પડે છે. હવે એશિયા કપ અને પછી વર્લ્ડ કપ છે. ટીમની તૈયારીઓથી લઈને ઘણા મુદ્દાઓ છે. હું કોઈની વિરુદ્ધ કોઈ નિવેદન આપવા માંગતો નથી. અત્યાર સુધી મેં આ પદ સંભાળ્યું નથી. એકવાર હું જવાબદારી સંભાળીશ, તે પછી હું જોઈશ કે સંજોગો શું છે. હું મીડિયાથી કંઈપણ છુપાવવામાં માનતો નથી. અમે બધા પાકિસ્તાનના સારા માટે કામ કરીએ છીએ.
ODI વર્લ્ડ કપમાં ભાગ લેવા માટે પાકિસ્તાન તેની મેચો ભારતને બદલે અન્ય કોઈ જગ્યાએ યોજવાની માંગ કરી શકે છે. જો કે આઈસીસી અને બીસીસીઆઈ કોઈપણ કિંમતે તેની માંગ સ્વીકારશે નહીં. હવે લાગી રહ્યું છે કે એશિયા કપને લઈને ઝકા અશરફના આ વલણને કારણે બીસીસીઆઈ અને પીસીબી વચ્ચેના સંબંધો વધુ બગડવાની સંભાવના છે. આ પહેલા પાકિસ્તાને ODI વર્લ્ડ કપમાં ઓસ્ટ્રેલિયા અને અફઘાનિસ્તાન સામેની મેચનું સ્થળ બદલવાની માંગ કરી હતી જેને ICC દ્વારા ફગાવી દેવામાં આવી હતી.
