મોટો ઝટકો / પાકિસ્તાનના મિસાઇલ પ્રોગ્રામથી ભડક્યું અમેરિકા, પાર્ટસ સપ્લાય કરતી ત્રણ ચીની કંપનીઓ પર લગાવ્યો પ્રતિબંધ, જાણો કારણ

• પાકિસ્તાનને અમેરિકા તરફથી મોટો ઝટકો લાગ્યો
• અમેરિકાએ ચીનની ત્રણ કંપનીઓ પર પ્રતિબંધો લગાવ્યા
• આ કંપનીઓએ પાકિસ્તાનને બેલેસ્ટિક મિસાઈલ પ્રોગ્રામ માટે સાધનોની સપ્લાય કરી હતી 

Pakistan Missile Program USA : પાકિસ્તાનને અમેરિકા તરફથી મોટો ઝટકો લાગ્યો છે. વાત જાણે એમ છે કે, અમેરિકાએ પાકિસ્તાનના બેલેસ્ટિક મિસાઈલ પ્રોગ્રામ માટે મિસાઈલ સંબંધિત સાધનોની સપ્લાય કરવા બદલ ચીનની ત્રણ કંપનીઓ પર પ્રતિબંધો લગાવ્યા છે.  યુએસ સ્ટેટ ડિપાર્ટમેન્ટે શુક્રવારે કહ્યું કે, આ પ્રતિબંધો વૈશ્વિક અપ્રસાર સિસ્ટમ હેઠળ લાદવામાં આવ્યા છે. 

શું કહ્યુ વિદેશ મંત્રાલયે ? 
યુએસ સ્ટેટ ડિપાર્ટમેન્ટ મંત્રાલયે એક નિવેદનમાં જણાવ્યું હતું કે, આજે અમે ત્રણ કંપનીઓ પર એક્ઝિક્યુટિવ ઓર્ડર 13382 અનુસાર પ્રતિબંધો લાદી રહ્યા છીએ જે સામૂહિક વિનાશના શસ્ત્રોના પ્રસાર અને વિતરણ સાથે સંકળાયેલી છે. આ ત્રણેય કંપનીઓ ચીનની છે અને તેણે પાકિસ્તાનના બેલેસ્ટિક મિસાઈલ કાર્યક્રમને મિસાઈલ સંબંધિત ભાગો અને સાધનો સપ્લાય કર્યા છે.

પાકિસ્તાનનું સાથી રહ્યું છે ચીન 
મહત્વનું છે કે, ચીન પાકિસ્તાનનું સર્વકાલીન સાથી છે અને તે ઈસ્લામાબાદના લશ્કરી આધુનિકીકરણ કાર્યક્રમમાં શસ્ત્રો અને સંરક્ષણ સાધનોનો મુખ્ય સપ્લાયર રહ્યો છે. આ ત્રણ કંપનીઓ જનરલ ટેકનોલોજી લિમિટેડ, બેઇજિંગ લુઓ લુઓ ટેક્નોલોજી ડેવલપમેન્ટ કંપની લિમિટેડ અને ચાંગઝોઉ યુટેક કોમ્પોઝિટ કંપની લિમિટેડ છે. આ પ્રતિબંધો પાકિસ્તાનની અબાબિલ બેલેસ્ટિક મિસાઈલ સિસ્ટમના લોન્ચિંગના થોડા દિવસો બાદ લગાવવામાં આવ્યા છે.

ઈરાન પર પ્રતિબંધો લાદવામાં આવ્યા 
આ પહેલા બાઈડન સરકારે ઈરાન પર પ્રતિબંધો લગાવ્યા હતા. આ ઈરાનના બેલેસ્ટિક મિસાઈલ અને ડ્રોન કાર્યક્રમો સામેના પ્રતિબંધો હતા. યુએનના પ્રતિબંધો ખતમ થયાના બીજા જ દિવસે અમેરિકાએ આ પગલું ભર્યું હતું. અમેરિકાએ 11 લોકો, 8 સંસ્થાઓ અને એક જહાજ પર પ્રતિબંધો લગાવ્યા છે. જેમના પર પ્રતિબંધો લાદવામાં આવ્યા છે તેમના સંબંધો હોંગકોંગ, વેનેઝુએલા અને ચીન સાથે છે. આ ઈરાનના બેલેસ્ટિક મિસાઈલ અને ડ્રોન કાર્યક્રમોમાં મદદ કરે છે.