ગુજરાતના બોટાદમાં કેમિકલ કાંડમાં 43 લોકોના મોત નીપજ્યા. કોઇએ ભાઇ ગુમાવ્યો તો કોઇએ પિતા. કોઇએ પિતાની છત્રછાયા ગુમાવી તો કોઇએ ઘરનો મોભી. દરેક ઘરની એટલી દયનીય અને કરુણ સ્થિતિ છે કે સાંભળીને હૃદય કંપી ઉઠે. કેમિકલ કાંડમાં સૌથી વધારે મોત બોટાદ જિલ્લામાં 32 અને અમદાવાદમાં 11 લોકોના મોત નીપજ્યા. તેમાં પણ બોટાદનું રોજિદ ગામના વધારે લોકો આ કેમિકલકાંડનો ભોગ બન્યા.
આ કેમિકલ કાંડ નથી આ લઠ્ઠાકાંડ જ છેઃ કગથરા
ત્યારે આ મામલે પ્રદેશ કોંગ્રેસ ડેલિગેશન રોજિદ ગામે પહોંચ્યુ હતું. પ્રદેશ કાર્યકારી પ્રમુખ ઋત્વિક મકવાણા, અમરીશ ડેર, પ્રતાપ દુધાત, લલીત કગથરા, રાજેશ ગોહિલ સહિતના નેતાઓએ રોજિંદની મુલાકાત લીધી. રોજિદ ગામના મૃતકોના પરિવારની મુલાકાત લીધી. તેઓ સાથે ચર્ચા કરી. આ બાદ લલિત કગથરાએ નિવેદન આપતા જણાવ્યું કે આ કેમિકલ કાંડ નથી લઠ્ઠાકાંડ જ છે. સરકાર તાત્કાલિક સહાય આપે તેવી કોંગ્રેસે માગ કરી. તેમજ લલિત કગથરા અને રાજેશ ગોહિલ એક મહિનાનો પગાર પીડિત પરિવારને આપશે તેમ જણાવ્યું હતું.
વધુ 7 આરોપીઓ કોર્ટમાં રજૂ કરાશે
બોટાદ કેમિકલ કાંડમાં 15 જેટલા આરોપીઓને ઝડપી પાડવામાં આવ્યા છે. જેમાં ગઈકાલે ગજુબેન અને પીન્ટુ ગોરહવાને કોર્ટમાં રજૂ કરવામાં આવ્યા હતા. કોર્ટે બંને આરોપીઓના 10 દિવસની રિમાન્ડની માંગણી વચ્ચે 6 દિવસના રિમાન્ડ મંજૂર કર્યા હતા.ત્યારે આજે વધુ 7 આરોપીઓને બરવાળાની કોર્ટમાં કરવામાં રજૂ કરવામાં આવશે. આરોપીને કોર્ટમાં રજૂ કરી 10 દિવસના રિમાન્ડ માગવામાં આવશે.
આરોપીઓએ 43 લોકોના લીધા જીવ અનેકને બેઘર કર્યા
જયેશના ફુઆના છોકરા સંજયને 600 લિટર કેમિકલ અપાયું. 600 લિટરમાંથી સંજય ઉર્ફે પિન્ટુ નામ શખ્સને આ કેમિકલ અપાયું. જયેશ કેમિકલ કંપનીના ગોડાઉનનો ઇન્ચાર્જ હતો. 600 લિટરમાંથી 200 લિટર કેમિકલ પિન્ટુને આપવામાં આવ્યું હતું. જેમાં પાણી મિલાવીને તેનું વેચાણ કરાતું. આ રીતે ગામમાં ટુકડે-ટુકડે મિથેનોલનું વેચાણ થયું હતું
મહત્વનું છે કે પોલીસે જપ્ત કરેલા દારૂનો FSL રિપોર્ટ આવતા મોટો ખુલાસો થયો હતો કે આરોપીઓએ દારૂના નામે લોકોને કેમિકલ પીવડાવી દીધું હતું. કારણ કે K અને Lના નમૂનામાં મીથાઈલ આલ્કોહોલનું પ્રમાણ 98.71 તથા 98.99 આવ્યું હતું. જ્યારે ઇથાઇલ આલ્કોહોલમાં 0 પ્રમાણ આવ્યુ હતું જે બાદ કેમિકલ કાંડમાં કાવતરું થયું હોવાનું પોલીસને જાણવા મળ્યું હતું.
