સ્પોર્ટસ / આ દાયકામાં ભારત તરફથી ૩૫ ખેલાડીએ ટેસ્ટ ક્રિકેટમાં ડેબ્યૂ કર્યું

જે ૩૫ ખેલાડીએ ટેસ્ટ ડેબ્યૂ કર્યું છે એમાંના સાત ખેલાડી ફક્ત વન ડે ક્રિકેટ રમી શક્યા છે. આ ખેલાડીઓ છે- ઋદ્ધિમાન સાહા, અભિમન્યુ મિથુન, ચેતેશ્વર પૂજારા, વરુણ એરોન, પંકજસિંહ, જયંત યાદવ અને કરુણ નાયર. સાહા ભારતીય ટેસ્ટ ટીમનો વિકેટકીપર છે, જ્યારે નાયરે ડેબ્યૂ ટેસ્ટમાં જ ત્રેવડી સદી ફટકારી હતી, પરંતુ હાલ તે ટીમની બહાર છે.

ત્રણેય ફોર્મેટમાં મળીને ભારત તરફથી ટીમ ઇન્ડિયાના કેપ્ટન વિરાટ કોહલીએ આ દાયકામાં સૌથી વધુ ૨૧,૦૬૭ રન બનાવ્યા છે. આટલા રન બનાવવા માટે વિરાટ કુલ ૩૮૮ મેચ રમ્યો. આ મામલામાં બીજા સ્થાને રોહિત શર્મા રહ્યો. તેણે ૩૦૨ મેચમાં ૧૨,૭૮૨ રન બનાવ્યા. કોહલીએ ૭૦ અને રોહિતે ૩૮ સદી ફટકારી. ત્રીજા સ્થાન પર મહેન્દ્રસિંહ છે. તેણે ૩૨૫ મેચમાં ૯૬૦૧ રન બનાવ્યા છે. આ દરમિયાન ધોનીની સરેરાશ ૪૪.૮૬ની રહી. તેણે સાત સદી અને ૫૮ અર્ધસદી ફટકારી.

આ દાયકામાં જો ટેસ્ટ, વન ડે અને ટી-૨૦ ફોર્મેટને મળી સૌથી વધુ વિકેટ ઝડપનારા ભારતીય બોલરની વાત કરવામાં આવે તો પ્રથમ સ્થાને આર. અશ્વિન છે, જેણે ૨૨૭ મેચમાં કુલ ૫૬૪ વિકેટ ઝડપી છે. આ દરમિયાન ૨૭ વાર તે એક ઇનિંગ્સમાં પાંચથી વધુ વિકેટ ઝડપી ચૂક્યો છે. બીજા સ્થાને રવીન્દ્ર જાડેજા છે. તેણે ૨૩૬ મેચમાં ૪૧૪ વિકેટ પોતાના નામે નોંધાવી છે. ત્રીજા સ્થાન પર મોહંમદ શામી છે. તેના નામ પર ૧૨૮ મેચમાં ૩૨૧ વિકેટ નોંધાયેલી છે. ભારતના ઓલટાઇમ બેસ્ટ ડાબોડી ફાસ્ટ બોલર ઝહીર ખાને ૬૭ મેચમાં ૧૫૧ વિકેટ ઝડપી હતી. ઝહીર ૨૦૧૪માં પોતાની અંતિમ મેચ રમ્યો હતો.