- મૌલાના અરશદ મદનીનું નિવેદન વિવાદમાં
- શંકરાચાર્ય સ્વામી સહિત અને ધર્મગુરૂઓ ભરાયા રોષે
- પ્રતિક્રિયા આપી મૌલાના મદનીનાં નિવેદનને પડકાર્યું
દેશની રાજધાની દિલ્હીનાં રામલીલા મેદાનમાં જે જમીયત ઉલેમા-એ-હિંદનાં મહા અધિવેશન બીજા ધર્મ અને સંપ્રદાયોને જોડવા માટે ન માત્ર મુસ્લિમ પરંતુ અન્ય ધર્મનાં લોકો પણ એકજૂથ થઈ રહ્યાં હતાં, તેમાં મૌલાના અરશદ મદની દ્વારા કરવામાં આવેલા ॐ અને અલ્લાહ એક હોવાના નિવેદન બાદ વિવાદો શરૂ થઈ ચૂક્યાં છે. મૌલાના અરશદ મદનીનાં નિવેદનથી ન માત્ર હિન્દૂ પરંતુ મુસ્લિમોમાં પણ નારાજગી જોવા મળી રહી છે. મદનીનાં દાવા પર સંતો સવાલો ઊઠાવી રહ્યાં છે. ત્યારે જ્યોર્તિમઠનાં શંકરાચાર્ય સ્વામી અને જૈન ધર્મઆચાર્ય લોકેશ મુનિની પ્રતિક્રિયા સામે આવી છે.
મદનીને મસ્જિદોમાં ॐ લખવાનો આપ્યો ચેલેન્જ
જ્યોર્તિમઠનાં શંકરાચાર્ય સ્વામી અવિમુક્તેશ્વરાનંદ સરસ્વતી કહે છે કે 'જો અરસદ અદનીનો દાવો છે કે ॐ અને અલ્લાહ એક છે તો આ વાતને સાબિત કરવા માટે તેમણે પોતાની મસ્જિદો પર ॐ લખાવવું જોઈએ. તેની શરૂઆત કાબાથી થવી જોઈએ અને તેમણે ત્યાં સોનાનાં વરખથી ॐ લખાવવું જોઈએ. ત્યારબાદ જામા મસ્જિદમાં ॐ લખાવો. જ્યાં-જ્યાં પર અલ્લાહ લખાયેલું છે ત્યાં ॐ લખાવવું જોઈએ કારણકે તેમની દ્રષ્ટિએ બંને એક જ છે. '
જૈન ધર્મઆચાર્ય લોકેશ મુનિએ વાતને કહી ફાલતૂ
જૈન ધર્મઆચાર્ય લોકેશ મુનિએ મદનીની વાતને ફાલતૂની જણાવી હતી. તેમણે કહ્યું કે આ પ્રકારની ફાલતૂની વાતોથી પ્રાચિન ઈતિહાસ સિદ્ધ થતો નથી. જૈન મુનિનું કહેવું છે કે ' આપણો ઈતિહાસ સૌ કોઈ જાણે છે કે ક્યારથી સનાતન અથવા જૈન પરંપરા છે. આ સૌને ખબર જ છે કે ક્યારે ઈસ્લામ ક્યારે આવ્યું છે...મેં તેમને એ વાત માટે શાસ્ત્રાર્થનું આમંત્રણ આપ્યું છે અને કહ્યું છે કે આવો બેસો, અમે તમને જણાવીએ કે ક્યારથી તમારો ઈતિહાસ છે.'
આ છે સમગ્ર મામલો
મૌલાના અરશદ મદનીએ આ કાર્યક્રમનાં મંચથી ॐ અને અલ્લાહને એક જણાવ્યું અને આદમની તુલના મનુથી કરી ત્યારે હિન્દૂ સહિત અન્ય ધર્મગુરૂ આ વાતને નકારીને સભા છોડવા માંડ્યાં. જૈન ધર્મગુરૂ આચાર્ય લોકેશ મુનિએ તો ભરી સભામાં જ મદનીને શાસ્ત્રાર્થ માટે પડકાર્યું હતું. અરશદ મદની દ્વારા હિન્દૂ પરંપરા અના માન્યતાઓને ઈસ્લામ સાથે જોડીને રજૂ કરવા અંગે શંકરાચાર્ય સહિત અનેક ધર્મ ગુરુઓની પ્રતિક્રિયાઓ આવી છે.
