કૌભાંડ કે ભૂલ? / હોમિયોપેથી પરીક્ષાનું પરિણામ 2 વાર જાહેર કરતા ગુજરાત યુનિ. પર ગંભીર આક્ષેપ, ખુલાસો કરતા કહ્યું 'અમે કોઈ પણ કૌભાંડ...'

• ગુજરાત યુનિવર્સિટીએ 2 વખત જાહેર કર્યું પરિણામ
• હોમિયોપેથી પરીક્ષાનું પરિણામ 2 વખત કરાયું જાહેર
• 8 વિદ્યાર્થીઓને ગ્રેસિંગ માર્ક આપી પાસ કરાયા
• 2 વખત પરિણામ જાહેર કરવાને લઈ NSUIના આક્ષેપ

ગુજરાત યુનિવર્સિટી દ્વારા એપ્રિલ મહિનામાં લેવામાં આવેલી હોમિયોપેથી પરીક્ષાનું પરિણામ 2 વખત જાહેર કરતા ચકચાર મચી ગઈ છે. સમગ્ર મામલે કૌભાંડ થયું હોવાનો NSUI દ્વારા આક્ષેપ કરવામાં આવી રહ્યો છે. તો યુનિવર્સિટી પણ કોઈ કૌભાંડ કે કોઈ ગોટાળો ન થયો હોવાનો દાવો કરી રહી છે. 

'યુનિવર્સિટીએ 2 વખત પરિણામ જાહેર કરીને કૌભાંડ આચર્યું'
ગુજરાત યુનિવર્સિટી દ્વારા એપ્રિલ મહિનામાં લેવામાં આવેલી હોમિયોપેથી પરીક્ષાનું પરિણામ જાહેર થયા બાદ NSUI દ્વારા ગંભીર આક્ષેપો લગાવવામાં આવ્યા છે. NSUIએ કહ્યું કે એપ્રિલ મહિનામાં લેવાયી યુજી હોમિયોપેથીની ચોથા વર્ષની પરીક્ષાનું પરિણામ યુનિવર્સિટીએ 2 વખત જાહેર કર્યું છે. જેમાં 8 વિદ્યાર્થીઓને ગ્રેસિંગ માર્ક આપી પાસ કરાયા છે. સમગ્ર મામલે કૌભાંડ થયું હોવાનો NSUI દ્વારા આક્ષેપ કરવામાં આવી રહ્યો છે. 

આક્ષેપ બાદ ગુજરાત યુનિવર્સિટીનો ખુલાસો
NSUIના આક્ષેપને લઈ યુનિવર્સિટીએ ખુલાસો કર્યો છે. યુનિવર્સિટીએ કોઈ કૌભાંડ કે કોઈ ગોટાળો ન થયો હોવાનું જણાવ્યું છે. સાથે જ ગુજરાત યુનિવર્સિટીએ જણાવ્યું છે કે, અગાઉ ભૂલથી કર્મચારીઓએ ઓનલાઈન પરિણામ જાહેર કર્યું હતું. 

શું છે સમગ્ર મામલો?
ગત એપ્રિલ મહિનામાં કલોલની અનન્યા કોલેજ ઓફ હોમિયોપેથીમાં અભ્યાસ કરતા ચોથા વર્ષના વિદ્યાર્થીઓની પરીક્ષા લેવામાં આવી હતી. જેનું પરિણામ ગત 22 જૂનના રોજ ઓનલાઈન જાહેર કરવામાં આવ્યું હતું. જેમાં 8 જેટલા વિદ્યાર્થીઓ નાપાસ થયા હતા. યુનિવર્સિટીએ આ પરિણામમાં સુધારો કરીને ફરીથી 24 જૂનના રોજ પરિણામ જાહેર કર્યું હતું. 24 જૂનના રોજ જાહેર કરાયેલા પરિણામમાં અગાઉ જે 8 વિદ્યાર્થીઓ નાપાસ થયા હતા, તેઓને પાસ કરી દેવામાં આવ્યા છે. આ ઉપરાંત તેઓ જે વિષયમાં નાપાસ થયા હતા, તેમાં ગ્રેસિંગ પણ આપવામાં આવ્યું હતું. માર્ક્સ વધારવામાં આવતા ગ્રેસિંગ સાથે વિદ્યાર્થીઓ પાસ થઈ ગયા હતા. 2 વખત પરિણામ જાહેર કરવાને લઈ NSUIએ આક્ષેપ કર્યા છે. યુનિવર્સિટીએ 2 વખત પરિણામ જાહેર કરીને કૌભાંડ આચર્યું હોવાના NSUIએ આક્ષેપ કર્યા છે.