રોષ / VIDEO/ ‘દારુ અહીં નહી’ અહીંયાથી 500 મીટર દૂર લોહાનગરમાં મળે છે', રાજકોટમાં લાગ્યા પોલીસની આંખ ઉઘાડતા પોસ્ટર, તંત્ર હજુ કયા નશામાં?

• રાજકોટમાં સમસ્યાના સમાધાન માટે અનોખી રીત
• દારૂબંધીના દાવાઓની ખોલી પોલ
• લોહાનગરના પોસ્ટરોએ ખેંચ્યું ધ્યાન

રાજકોટના ગોંડલ રોડ પર આવેલી ઉધોગનગર કોલોની ભારે ચર્ચાનું કેન્દ્ર બની છે. ઉદ્યોગનગર કોલોનીનાં રહેવાસીઓએ દારુ પીનારા લોકોનાં ત્રાસથી કેટલા ત્રાહિમામ થઈ ગયા છે. તેના કારણે  જ શરાબ પીનારા લોકોને સોસાયટીથી દૂર રાખવા માટે અનોખા પોસ્ટર લગાવ્યા છે. આ પોસ્ટરમાંનાં એક પોસ્ટરમાં લખવામાં આવ્યુ છે કે, ‘દારૂ અહીં નહિ - અહિયાંથી 500 મીટર દૂર ‘લોહાનગર’ માં મળે છે.’ દારુ પીને સોસાયટીમાં કોઈપણ વ્યક્તિએ પ્રવેશ કરવો નહી. 

દારૂ 500 મિટર દૂર લોહાનગરમાં મળે છે

જ્યારે સોસાયટીનાં લોકો સાથે આ પોસ્ટર લગાવવા બાબતની વાત કરી ત્યારે સ્થાનિકોએ કહ્યું કે, ‘આ પોસ્ટર લગાવવાની મુહિમ સોસાયટીની બહેન-દીકરીઓની સુરક્ષાને ધ્યાનમાં રાખીને ચલાવવામાં આવી છે.’ લોકોએ એક પોસ્ટરમાં લખ્યું છે કે, દારૂડિયાઓએ આ શેરીમાં દારૂ ઢીંચી પ્રવેશ કરવો નહીં, જ્યારે બીજા પોસ્ટરમાં એવું છે કે, આપણી બહેન દીકરીઓની સુરક્ષાને ધ્યાનમાં રાખી કોલોનીના તમામ રહેવાસીઓને તાકીદ કરવામાં આવે છે કે, તમારા ઓરડાઓ પરપ્રાંતીઓને ભાડે આપવા નહીં! જ્યારે ત્રીજા પોસ્ટરમાં લખ્યું છે કે, દારૂ અહીં નહીં. પરંતુ અહિંયાથી 500 મિટર દૂર લોહાનગરમાં મળે છે.આમ ઠેર-ઠેર પોસ્ટરો લગાવી લોકોએ પોતાની વેદના ઠાલવી છે.

જો કે, આ મુહિમની વચ્ચે બીજો એક પ્રશ્ન એ પણ ઊભો થયો છે કે, જ્યારે રહેવાસીઓ લોહાનગરમાં દારુનું વેચાણ થાય એવો દાવો કરી રહ્યા છે તો શું ખરેખર ત્યા દારુ વેચાય છે? અને જો ત્યા દારુ વેચાય છે? તો ત્યાની પોલીસ આ અંગે શું કાર્યવાહી કરે છે? તે જાણવું પણ રસપ્રદ રહેશે.