પાટણમાં ભાજપનાં લોકસભાનાં ઉમેદવારે બાઈક રેલી યોજી પ્રચાર કર્યો હતો. જેમાં ભાજપનાં ઉમેદવાર ભરતસિંહજી ડાભીની બાઈક રેલી શહેરનાં વિવિધ વિસ્તારમાંથી પસાર થઈ હતી. આ બાઈક રેલીમાં મોટી સંખ્યામાં લોકો જોડાયા હતા.
ધોરાજી તાલુકાના પ્રાચીન સુપેડી ગામ ખાતે આવેલ મુરલી મનોહર મંદિર ખાતે પોરબંદર લોકસભાના ભાજપના ઉમેદવાર મનસુખ માંડવીયાએ ધ્વજારોહણ કર્યું હતું. પ્રચારના છેલ્લા દિવસે માંડવીયાએ વૈદિક પરંપરા મુજબ પૂજા અર્ચન કરી ધ્વજા ચડાવી હતી. મુરલી મનોહર મંદિર 700 વર્ષ જૂનું પ્રાચીન છે અને રક્ષિત સ્મારક તરીકે જાહેર થયેલ છે.
ધારાસભ્યના કાર્યાલયથી રોડ શોની કરાઈ હતી શરૂઆત
ખેડાનાં નડિયાદમાં મુખ્યમંત્રીનો રોડ શો યોજાયો હતો. ધારાસભ્યનાં કાર્યાલયથી રોડ શો ની શરૂઆત કરાઈ હતી. નડિયાદ શહેરનાં વિવિધ વિસ્તારોમાંથી રોડ શો પસાર થયો હતો. મુખ્યમંત્રીએ ખેડા બેઠકનાં ઉમેદવાર દેવુસિંહ ચૌહાણનો પ્રચાર કર્યો હતો.
લોકસભાની ચૂંટણી પ્રચારની છેલ્લી ઘડીએ રાજકોટમાં ભાજપ દ્વારા બાઈક રેલીનું આયોજન કરવામાં આવ્યું હતું. રેસકોર્સ સર્કલથી યાજ્ઞિક રોડ સુધી ભાજપની બાઈક રેલી યોજાઈ હતી. પરષોત્તમ રૂપાલા પણ બાઈક રેલીમાં જોડાયા હતા. પરષોત્તમ રૂપાલાએ મતદારોને 100 ટકા મતદાન કરવા અપીલ કરી હતી. રૂપાલાએ રાજકોટ સહિત સમગ્ર ગુજરાતના લોકોને મતદાન કરવા અપીલ કરી હતી.
અમદાવાદ પૂર્વના ઉમેદવાર હસમુખ પટેલે દહેગામમાં યોજી રેલી
રાજ્યમાં પ્રચારનાં અંતિમ દિવસે ભાજપનાં ઉમેદવારો પ્રચાર માટે મેદાને છે. અમદાવાદનાં પૂર્વનાં ઉમેદવાર હસમુખ પટેલે દહેગામમાં રેલી યોજી હતી. અમદાવાદ પશ્ચિમના ઉમેદવાર દિનેશ મકવાણાની શાહીબાગમાં રેલી યોજી હતી. ભાજપ ઉમેદવાર દિનેશ મકવાણાની રેલીમાં સ્થાનિક ધારાસભ્ય અને કાર્યકરો જોડાયા હતા.
લિંબાયત વિધાનસભા વિસ્તારમાં સી.આર.પાટીલની રેલી
લોકસભા ચૂંટણીનો સુરતમાં છેલ્લી ઘડીનો પ્રચાર ચાલી રહ્યો છે. લિંબાયત વિધાનસભા વિસ્તારમાં સી.આર.પાટીલની રેલી નીકળી હતી. બાઈક રેલીમાં મોટી સંખ્યામાં કાર્યકર્તાઓ જોડાયા હતા. નીલગીરી મેદાનથી રેલીની શરૂઆત થઈ હતી. રેલીમાં ચારેય વિધાનસભાનાં ધારાસભ્યો જોડાયા હતા.
