અમદાવાદ / રક્ષાબંધન પર મુસ્લિમ બહેનોએ મહંત દિલીપદાસજીને બાંધી રાખડી, દેશવાસીઓને પાઠવ્યો વિવિધતામાં એકતાનો સંદેશ

• અમદાવાદના જગન્નાથ મંદિરમાં રક્ષાબંધનની કરાઈ ઉજવણી 
• જગન્નાથ મંદિરમાં કોમી એકતાના થયા દર્શન 
• મુસ્લિમ બહેનોએ મહંત દિલીપદાસજીને બાંધી રાખડી 
• મુસ્લિમ મહિલાઓએ મહંત માટે જાતે રાખડી બનાવી

Rakshabandhan 2023:  આજે ગુજરાત સહિત દેશભરમાં ભાઈ-બહેનના પ્રેમના પવિત્ર તહેવાર રક્ષાબંધનની ધામધૂમથી ઉજવણી કરવામાં આવી રહી છે. દર વર્ષે શ્રાવણ માસની પૂર્ણિમાએ ઉજવાતો આ તહેવાર ભાઈ-બહેન વચ્ચેના પ્રેમ અને પવિત્ર સંબંધને વધુ ગાઢ બનાવે છે. આ દિવસે બહેનો પોતાના ભાઈના કાંડા પર રક્ષાસૂત્ર બાંધે છે અને ભાઈની દરેક રીતે રક્ષા થાય તેવા આશીર્વાદ આપે છે, તો ભાઈ પણ પોતાની બહેનને રક્ષાનું વચન આપે છે. ત્યારે આજે રક્ષાબંધનના પવિત્ર તહેવાર પર અમદાવાદના જગન્નાથ મંદિરમાં કોમી એકતાના દર્શન થયા છે.

મુસ્લિમ બહેનોએ મહંતને બાંધી રાખડી 
અમદાવાદના જગન્નાથ મંદિરમાં આજે રક્ષાબંધનની હર્ષોલ્લાસ સાથે ઉજવણી કરવામાં આવી. આજે સવારે મુસ્લિમ બહેનો જમાલપુર ખાતે આવેલા ભગવાન જગન્નાથજીના મંદિરે પહોંચી હતી. ત્યાર બાદ મુસ્લિમ બહેનોએ જગન્નાથ મંદિરના મહંત દિલીપદાસજી મહારાજને પરંપરા મુજબ તિલક કરીને રાખડી બાંધી હતી અને મીઠાઈ પણ ખવડાઈ હતી. ફક્ત એટલું જ નહીં આ બહેનોએ મહંત દિલીપદાસજી માટે જાતે તરંગા અને ભગાવાન જગન્નાથજીની પ્રતિકૃતિવાળી રાખડી બનાવી હતી. સાથે કોમી એકતાનો સંદેશ આપ્યો હતો.

જગન્નાથજી મંદિર સાથે જોડાયેલો છે મુસ્લિમ સમાજઃ મહંત દિલીપદાસજી
આ તકે જગન્નાથ મંદિરના મહંત દિલીપદાસજી મહારાજે કહ્યું હતું કે, રક્ષાબંધનનો પવિત્ર તહેવાર એ ભાઈ-બહેનનો એક અનોખો તહેવાર છે. ત્યારે મુસ્લિમ સમાજ પણ એકતા અને બંધુત્વની ભાવના સાથે જગન્નાથજી મંદિર સાથે જોડાયેલો છે. અનેક તહેવારોમાં તેમનો સાથ અને સહકાર મંદિર સાથે રહેલો છે. ત્યારે આજે રક્ષાબંધનના તહેવાર પર મુસ્લિમ બહેનોએ આવીને રાખડી બાંધી છે અને રક્ષાબંધનના તહેવારની ઉજવણી કરી છે.