NULL / પાક. પોતાની ધરતી પરથી આતંકીઓને સમર્થન આપવાનું બંધ કરેઃ USની ચેતવણી

ટ્રમ્પ પ્રશાસને પણ પાકિસ્તાનને ચેતવણી આપતાં જણાવ્યું છે કે તે પોતાની ધરતી પરથી આતંકી પ્રવૃત્તિઓને સમર્થન આપવાનું તાત્કાલિક બંધ કરે. અમેરિકાના વ્હાઇટ હાઉસ તરફથી પાકિસ્તાનને નામ જોગ ચેતવણી આપવામાં આવી છે.

વ્હાઈટ હાઉસની પ્રવકતા સારા સેન્ડર્સે જણાવ્યું છે કે પાકિસ્તાન તાત્કાલિક આતંકી સંગઠનોને પ્રોત્સાહન આપવાનું બંધ કરે. અમેરિકન વિદેશ મંત્રાલયે પણ પોતાના નિવેદનમાં પાકિસ્તાનનું નામ લઇને જણાવ્યું છે કે તમામ રાષ્ટ્રોએ આતંક વિરુદ્ધ સંયુકત રાષ્ટ્રસંઘના ઠરાવ હેઠળ પોતાની જવાબદારીઓ સમજવી પડશે અને આતંકીઓના આશ્રયદાતા બનવાનું બંધ કરવું પડશે. અમે આતંકવાદનો સામનો કરવા માટે દરેક સ્થિતિમાં ભારતની સાથે છીએ.

દ‌િક્ષણ એશિયા સાથે સંકળાયેલા અમેરિકન નિષ્ણાતોનું કહેવું છે કે જમ્મુ-કાશ્મીરના પુલવામા જિલ્લામાં થયેલા આતંકી હુમલામાં માત્ર જૈશ-એ-મોહંમદ જ નહીં પરંતુ પાકિસ્તાનની જાસૂસી સંસ્થા આઇએસઆઇનો પણ હાથ હોઇ શકે છે. પાકિસ્તાન સ્થિત આતંકી સંગઠન જૈશે આ હુમલા માટે જવાબદારી સ્વીકારી છે. 

નિષ્ણાતોનું કહેવું છે કે આતંકી હુમલાથી સ્પષ્ટ થાય છે કે અમેરિકા જૈશ અને અન્ય આતંકી જૂથો વિરુદ્ધ કાર્યવાહી કરવા માટે પાકિસ્તાનને મનાવવામાં નિષ્ફળ રહ્યું છે.

અમેરિકન ગુપ્તચર સંસ્થા સીઆઇએના પૂર્વ વિશ્લેષક બ્રુશ રિડેલે જણાવ્યું છે કે હુમલામાં જૈશ-એ-મોહંમદની સ્વઘોષિત સંડોવણી આ હુમલાના સમર્થનમાં આઇએસઆઇની ભૂમિકા સામે ગંભીર સવાલો ઊભા કરે છે.

ઓબામા પ્રશાસનના રાષ્ટ્રીય સુરક્ષા પરિષદના એક પૂર્વ અધિકારી અનીશ ગોયલે જણાવ્યું છે કે આ હુમલા પરથી સ્પષ્ટ થાય છે કે પાક. સ્થિત આતંકી જૂથો કાશ્મીરમાં સક્રિય છે.