વિવાદ / અમદાવાદના બાપુનગરમાં ગાડી પાર્ક કરવી હોય તો આપવા પડશે પૈસા, કૉન્ટ્રૅક્ટરને અપાઈ સત્તા, ગુસ્સે ભરાયા લોકો

• અમદાવાદના બાપુનગરમાં પાર્કિંગ ટેન્ડર મામલે વિવાદ
• AMCએ પાર્કિંગ ટેન્ડર બહાર પાડતા વેપારીઓએ કર્યો વિરોધ
• ભીડભંજન માર્કેટ બંધ રાખીને વેપારીઓ રસ્તા પર ઉતર્યા

અમદાવાદના બાપુનગરમાં પે એન્ડ પાર્કિંગ ટેન્ડર મામલે વિવાદ સર્જાયો છે. બાપુનગરના ભીડભંજન રોડ પર AMCએ પે એન્ડ પાર્કિંગ માટે ટેન્ડર બહાર પાડવામાં આવતા વેપારીઓએ વિરોધ નોંધાવ્યો છે. દુકાન પાસે વાહન પાર્ક કરવા માટે પૈસા આપવા મુદ્દે વેપારીઓએ વિરોધ નોંધાવતા મામલો ગરમાયો છે.

બાપુનગરમાં પે અન્ડ પાર્કિંગનો મુદ્દો 
ભીડભંજન રોડએ બાપુનગર વિસ્તારનો સૌથી વ્યસ્ત રસ્તો ગણાય છે. આ રોડ પર ટ્રાફિકની સમસ્યા વધુ હોય છે. જો કે, અમદાવાદ મ્યુનિસિપલ કોર્પોરેશને આ રોડ પર પે અન્ડ પાર્કિંગ શરૂ કરતા વિરોધના શૂર ઉઠ્યા છે.  અહીં 200થી વધુ દુકાનો આવેલી છે. જે તમામ વેપારીઓએ દુકાનો બંધ રાખી વિરોધ પ્રદર્શન કર્યું હતું. વેપારીઓનું કહેવું હતું કે, એક તરફ આ રોડ પર ટ્રાફિક રહે છે અને બીજી તરફ અહીં પે એન્ડ પાર્કિંગ શરૂ કરતા ટ્રાફિકની સમસ્યા બે ગણી વધી જશે. સ્થાનિક લોકો દ્વારા વિરોધ કરવામાં આવતા પોલીસ પણ ઘટનાસ્થળે દોડી આવી હતી.

કોર્પોરેટર દ્વારા પણ વિરોધ કરવામાં આવ્યો
AMCના ઉત્તર ઝોન દ્વારા પે એન્ડ પાર્કિંગનું ટેન્ડર બહાર પાડવામાં આવ્યું હતું. જે સમગ્ર બાબતને લઈ સ્થાનિક કોર્પોરેટરો દ્વારા પણ વિરોધ કરવામાં આવ્યો હતો. ટ્રાફિકગ્રસ્ત રોડથી હોવાથી સમસ્યામાં વધારો થશે જેને લઈ  ટેન્ડર પ્રક્રિયા ન કરવા માટે જવાબદાર અધિકારીને જાણ કરાઈ હતી. બાપુનગર વોર્ડના કોર્પોરેટર અશ્વિન પેથાણીએ જણાવ્યું હતું કે, ભીડભંજન હનુમાન મંદિર રોડ ઉપર ઓન રોડ પે એન્ડ પાર્કિંગ માટેનું અગાઉ ટેન્ડર આવ્યું હતું. તે જ સમયે મેં અધિકારીઓને જાણ કરી હતી કે આ રોડ ઉપર ટ્રાફિકની સમસ્યા વધુ રહે છે.