કાર્યક્રમ / PM મોદીના હસ્તે ગાંધીનગરમાં ‘સેમિકોન ઇન્ડિયા 2023’નું ઉદ્ઘાટન, હવે સર્કિટ હાઉસમાં ‘ગુજરાતનું ગૌરવ’ થીમ પર ભોજન સમારંભ

• મહાત્મા ગાંધી મંદિર ગાંધીનગરમાં PM મોદીની બેઠક
• PM નરેન્દ્ર મોદીએ સેમિકોન ઈન્ડિયા 2023નું ઉદ્ઘાટન કર્યું
• PM મોદી મહાત્મા મંદિર ખાતે ત્રણ બેઠક કરશે

બે દિવસની ગુજરાત મુલાકાતે આવેલ PM મોદીએ ગઈકાલે રાજકોટમાં 2033 કરોડના વિકાસ કામોનું લોકાર્પણ કરી સભા સંબોધી હતી. આ તરફ હવે આજે PM નરેન્દ્ર મોદી ગાંધીનગરમાં મહાત્મા ગાંધી મંદિર ખાતે પહોંચ્યા છે અને સેમિકોન ઈન્ડિયા 2023નું ઉદ્ઘાટન કર્યું છે.

નોંધનીય છે કે, PM મોદીના ગુજરાત પ્રવાસનો આજે બીજો દિવસ છે. PM મોદી મહાત્મા મંદિર ખાતે ત્રણ બેઠક કરશે. 

આજે બપોરે ભવ્ય ભોજન વ્યવસ્થા
PM મોદી આજે બપોરનું ભોજન ગાંધીનગરના સર્કિટ હાઉસમાં લેશે. PM મોદીના ગુજરાત પ્રવાસને લઈને ભોજન સમારંભનું આયોજન  નવનિયુક્ત સાંસદ બાબુભાઈ દેસાઈ અને કેશરીદેવસિંહ ઝાલા દ્વારા આયોજન કરવામાં આવ્યું છે. ભોજન સમારોહના આ અવસરે મુખ્યમંત્રી ભૂપેન્દ્ર પટેલ સહિત અન્ય મંત્રીઓ, MP-MLA તથા સંગઠનના હોદ્દેદારોને પણ આમંત્રણ આપવામાં આવ્યું છે. જેના ભાગરૂપે ભોજન સમારંભમાં 200થી વધુ લોકો ઉપસ્થિત રહે તેવું અનુમાન લગાવાઈ રહ્યું છે. 

રાજકોટમાં હીરાસર એરપોર્ટનું કર્યું હતું લોકાર્પણ
PM મોદી ગઈકાલે રાજકોટ પ્રવાસે હતા. જ્યાં રાજ્યના પ્રથમ ગ્રીનફિલ્ડ હીરાસર આંતરરાષ્ટ્રીય એરપોર્ટ પર તેમનું પ્લેન લેન્ડ થયું હતું. બાદમાં PM મોદીનું મુખ્યમંત્રી ભૂપેન્દ્ર પટેલ દ્વારા હીરાસર એરપોર્ટ પર સ્વાગત કરાયું હતું. હીરાસર એરપોર્ટના પરિસરનું નરેન્દ્ર મોદીએ નિરીક્ષણ કર્યું હતું. બાદમાં હીરાસર એરપોર્ટનું PM મોદીએ રિબીન કાપી લોકાર્પણ કર્યું હતું. હીરાસર એરપોર્ટથી રવાના થઈ તેઓ રેસકોર્સ મેદાને સભાસ્થળે પહોંચ્યા હતા.