ખળભળાટ / સુરતમાં ઘોડામાં ફેલાયેલો ભયાનક રોગ માણસમાં ફેલાવવાનો ડર: SMCની ટીમ દોડી, સેમ્પલ લેવાયા

• સુરતના અશ્વોમાં ગ્લેન્ડર નામના રોગનો ફેલાવો
• અશ્વોમાંથી આ રોગ મનુષ્યમાં ન ફેલાય તે માટે તંત્ર એલર્ટ
• SMCની ટીમે અશ્વોના માલિક અને પરિવારના સભ્યોના લીધા સેમ્પલ 

સુરતમાં અશ્વોમાં ગ્લેન્ડર નામનો રોગ ફેલાતા ખળભળાટ મચી ગયો છે. કલેક્ટર દ્વારા સમગ્ર સ્થિતિ ઉપર નજર રાખવાનો આદેશ આપવામાં આવ્યો છે. આ ઉપરાંત આ રોગથી સંક્રમિત 6 અશ્વોને દયામૃત્યુ આપવા આવ્યું છે. અશ્વોમાંથી આ રોગ મનુષ્યમાં ન ફેલાય તે માટે તંત્ર એલર્ટ છે. 

6 અશ્વોના સેમ્પલ ગ્લેન્ડર પોઝિટિવ 
શહેરના લાલ દરવાજા વિસ્તારમાં અશ્વોમાં ગ્લેન્ડર નામના રોગે દેખા દેતા જિલ્લા આરોગ્ય વિભાગ અને પાલિકા તંત્ર દોડતું થયું હતું. જિલ્લા આરોગ્ય વિભાગની ટીમે 20 જેટલા અશ્વોના સેમ્પલ લઈ તેને તપાસ માટે મોકલી આપવામાં આવ્યા હતા. જેમાંથી 6 અશ્વોના સેમ્પલ ગ્લેન્ડર પોઝિટિવ આવ્યા હતા.

તમામને અપાયું દયામૃત્યુ
લાલ દરવાજાના અશ્વોમાં ગ્લેન્ડર પોઝિવિટ હોવાનું સામે આવતા પશુચિકિત્સકો દોડતાં થઈ ગયા હતા. જે બાદ 6 અશ્વોને દયામૃત્યુ મોત આપવાનો આદેશ સુરત કલેક્ટરે દિલ પર પથ્થર મૂકીને આપ્યો હતો. તંત્ર દ્વારા તમામ છ અશ્વને ઇન્જેક્શન આપી દયામૃત્યુ આપવામાં આવ્યું હતું. તમામ છ અશ્વની દફનવિધિ પણ તંત્ર દ્વારા કરવામાં આવી હતી. 6 ઘોડાના મોત બાદ અજાણીયા જગ્યા પર દફન કરી દેવાયા હતા.

લક્ષણ મનુષ્યોમાં દેખાયાં નથીઃ ડો મયૂર ભીમાણી
સુરત જિલ્લાના નાયબ પશુપાલન નિયામક મયૂર ભીમાણીએ જણાવ્યું કે, 'આ રોગ પશુમાંથી મનુષ્યમાં ન ફેલાય તે માટે તંત્રએ આ વિસ્તારના પશુઓને બહાર લઈ જવા પર પ્રતિબંધ લાદી દીધો છે. હાલ આ રોગના કોઈ પણ પ્રકારનાં લક્ષણ મનુષ્યોમાં દેખાયાં નથી.'

સંપર્કમાં આવેલા લોકોના સેમ્પલ લેવાની તજવીજ હાથ ધરાઈ
અત્રે ઉલ્લેખનીય છે કે, ગ્લેન્ડર રોગ પ્રાણીઓમાંથી માનવીઓમાં પણ ફેલાય છે, જેના કારણે માનવીમાં ના ફેલાય તે માટે તાત્કાલિક તંત્ર એલર્ટ થઈ ગયું છે. તાત્કાલિક અસરથી ભારત સરકારની ગઇડલાઇન્સ મુજબ કામગીરી શરૂ કરવામાં આવી છે. SMCની ટીમ દ્વારા અશ્વના સંપર્કમાં આવેલા લોકોના સેમ્પલ લેવાની તજવીજ હાથ ધરવામાં આવી છે. અશ્વોના માલિક અને તેમના પરિવારજનોના ટેસ્ટિંગ માટે પ્રક્રિયા શરૂ કરવામાં આવી છે. પરિવારજનોના સેમ્પલ લઈ ટેસ્ટિંગ માટે લેબમાં મોકલવામાં આવશે. આ ઉપરાંત સુરતના લાલ દરવાજા વિસ્તારના પાંચ કિલોમીટરની ત્રીજ્યામાં અશ્વ, ખચ્ચર અને ગધેડાની હેરાફેરી પર પ્રતિબંધ મૂકવામાં આવ્યો છે.