કમરતોડ ફટકો / અલકાયદાના 11 આતંકીઓ સામે NIAની મોટી કાર્યવાહી, 'કાફીર' પર હુમલાનું રચ્યું હતું ષડયંત્ર

• 11 સભ્યોની સામે કેસ દાખલ કરીને ચાર્જશીટ ફાઈલ થઈ
• મુર્શીદ હસનની આગેવાનીમાં અલકાયદાના મોડ્યુઅલ કામ કરી રહ્યા છે
• 11 આતંકીઓને ઝડપી પાડવામાં આવ્યાં છે

પશ્ચિમ બંગાળ અને કેરળમાં આતંકી સભ્ય મુર્શીદ હસનની આગેવાનીમાં અલકાયદાના મોડ્યુઅલ કામ કરી રહ્યા હોવાની બાતમીને આધારે એનઆઈએ 11 સભ્યોની સામે કેસ દાખલ કર્યો છે. 

અલકાયદાના આ 11 સભ્યો દેશના વિવિધ ભાગોમાં આતંકી હુમલાઓ કરવાનું આગળ પડતું ષડયંત્ર રચી રહ્યાં છે. કેરળ અને પશ્ચિમ બંગાળના ગત વર્ષના દરોડામાં 9 આતંકીઓની ધરપકડ કરવામાં આવી હતી. ત્યાર બાદ બીજા બે એમ કુલ 11 આતંકીઓને ઝડપી પાડવામાં આવ્યાં હતા. 

એનઆઈએની તપાસમાં મુર્શીદ હસન પાકિસ્તાન અને બાંગ્લાદેશ સ્થિત અલકાયદાના આકાઓ સાથે સંપર્કમાં હોવાનો તથા સોશિયલ મીડિયા દ્વારા તેમની પાસેથી કટ્ટરવાદી સામગ્રી મેળવતો હોવાનો ખુલાસો થયો હતો. મુર્શીદ તેના બીજા સભ્યો સાથે મળીને લોકોની અલકાયદામાં ભરતી કરતો હતો. તેમણે બધાએ ભેગા થઈને સોશિયલ મીડિયા પર કટ્ટરવાદી સામગ્રીનો પ્રચાર કરતા હતા. તથા ભારતમાં જેહાદને ઉગ્ર બનાવીને ઈસ્લામિક સ્ટેટ બનાવવાનું કાવતરુ રચી રહ્યાં હતા. 

એનઆઈએની તપાસમાં એવું પણ બહાર આવ્યું કે ગ્રુપના સભ્યો જેમને પણ કાફીર ગણતા હતા તેમની પર આતંકી હુમલાઓ કરવાની પેરવીમાં હતા. ગ્રુપના સભ્યોએ હથિયારો, દારુગોળો, વિસ્ફોટક સામગ્રીની ખરીદી માટે પૈસા ભેગા કરવા માટે બેઠકો પણ યોજતા હતા તથા યુવાનોની ભરતી કરતા હતા. આરોપીઓ તેમના વિદેશમાં બેઠેલા આકાઓ દ્વારા શસ્ત્રોના ડીલરો સાથે પણ સતત સંપર્કમાં રહેતા હતા અને તેઓ નવી દિલ્હીમા અત્યાધુનિક શસ્ત્રોનો જથ્થો સ્વીકારવાની તૈયારી કરી રહ્યાં હતા.