જોરદાર કિસ્સો / લો બોલો! ઇન્ટરનેટ પર શખ્સે સર્ચ કર્યું Suicide, તુરંત ઇન્ટરપોલે મુંબઇ પોલીસને કરી એલર્ટ, બચી ગયો જીવ

• એક યુવાનનો જીવ બચાવવા નિમિત્ત બની મુંબઈ પોલીસ
• વ્યક્તિએ મોબાઈલ પર બેસ્ટ સુસાઇડ વે સર્ચ મારતા જ પોલીસ પહોંચી ગઈ
• પોલીસે ટ્રેક કરી આત્મહત્યા કરતા અટકાવ્યો

મુંબઈમાં ઇન્ટરપોલ અને પોલીસની સતર્કતા એક વ્યક્તિનો જીવ બચાવવા નિમિત્ત બની છે. મુંબઈમાં રહેતો એક 28 વર્ષીય યુવાન google પર આત્મહત્યા કરવા માટેના રસ્તા અંગે સર્ચ કરતો હતો. જેને લઈને ઇન્ટરપોલને જાણ થતા તેણે મુંબઈ પોલીસેને મોબાઈલ નંબર શેર કર્યા હતા. જેને લઈને પોલીસે આ નંબર ટ્રેક કર્યા હતા. જ્યાં તપાસ બાદ યુવાનનું લોકેશન શોધી અને તેમને ઉપનગરીય માલવણી વિસ્તારમાંથી બચાવ્યો હતો. જે યુવાન ડિપ્રેશનના હોવાનું તપાસમાં સામે આવ્યું હતું.

ક્રાઈમ બ્રાન્ચના યુનિટ 11 ની ટીમ દ્વારા બચાવ અભિયાન

મુંબઈ પોલીસ અધિકારીઓના જણાવ્યા અનુસાર ઇન્ટરપોલ દ્વારા મંગળવારે બપોર બાદ મેસેજ મળતાની સાથે જ પોલીસ બચાવ કામગીરીમાં જોતરાઈ હતી. મુંબઈ પોલીસની ક્રાઈમ બ્રાન્ચના યુનિટ 11 ની ટીમ દ્વારા આ અભિયાન હાથ ધરવામાં આવ્યું હતું. તેમણે લોકેશન શોધી કાઢ્યું હતું. જ્યા પોલીસે દોડી જઈ તપાસ હાથ ધરતા જાણવા મળ્યું કે યુવાન મૂળ રાજસ્થાનનો છે તેમના માતાની બે વર્ષ અગાઉ ફોજદારી કેસમાં પોલીસ દ્વારા ધરપકડ કરવામાં આવી હતી. જેને લઈને યુવાન હાલ માણવાણી જતા પહેલાના મીરા રોડ પર સબંધીઓને ત્યાં રહેતો હતો. એટલું જ નહીં છેલ્લા છ મહિનાથી રોજગારી માટે પણ તે દર દર ભટકતો હતો. એક બાજુ બેરોજગારી અને બીજી બાજુ માતાને જેલમાંથી મુક્ત ન કરાવતા યુવાન ડિપ્રેશનનો ભોગ બન્યો હતો.

યુવાનનો જીવ બચાવમાં નિમિત્ત બની

બાદમાં યુવાને આપઘાત કરી જીવન લીલા સંકેલી લેવાનો મનોમન નિર્ણય લઈ લીધા બાદ તે google માં આત્મહત્યા માટેના શ્રેષ્ઠ માર્ગ સર્ચ કરી રહ્યો હતો. જેને લઈને ઇન્ટરપોલના અધિકારીઓનું ધ્યાન જતા તેમણે મુંબઈ પોલીસને ઈ-મેલ મોકલ્યો હતો અને હાલ પોલીસે આ યુવાનનું કાઉન્સેલિંગ કર્યું છે. વધુમાં સંબંધીઓની મુલાકાત કરી હોવાનું જાણવા મળી રહ્યું છે. આમ ઇન્ટરનેશનલ ક્રિમિનલ પોલીસ ઓર્ગેનાઈઝેશન જેને ઇન્ટરપોલ તરીકે ઓળખવામાં આવે છે તે આંતરરાષ્ટ્રીય સંસ્થા છે અને સમગ્ર વિશ્વમાં પોલીસ સહકાર અને ગુનાના નિયંત્રણની સુવિધા આપે છે. તે યુવાનનો જીવ બચાવમાં નિમિત્ત બની છે.