તમારા કામનું / મુંબઈમાં લૂના કારણે 11 લોકોના મોત, હિટસ્ટ્રોકથી બચવા માટે કરો આ ઉપાય, જાણો શું કહે છે એક્સપર્ટ ડૉક્ટર્સ

• તાપમાન 40 ડિગ્રીને પાર.
• હીટસ્ટ્રોકને કારણે નવી મુંબઈમાં 11 લોકોના મૃત્યુ. 
• ડાયાબિટીસ અને બ્લડપ્રેશર ધરાવતા લોકોએ વધુ સાવધાન રહેવું.

ભારતમાં ભીષણ ગરમી પડી રહી છે. અનેક રાજ્યોમાં તાપમાન 40 ડિગ્રીને પાર પહોંચી ગયું છે. વૈજ્ઞાનિકો અને ડોકટરો આ લૂ (હીટસ્ટ્રોક)થી બચવાની સલાહ આપી રહ્યા છે. હીટસ્ટ્રોકને કારણે નવી મુંબઈમાં 11 લોકોના મૃત્યુ થયા છે. ઓપન ગ્રાઉંડમાં એક જાહેર સભા દરમિયાન અનેક લોકો હીટસ્ટ્રોકની ચપેટમાં આવી ગયા હતા, જેમાંથી 11 લોકોના મૃત્યુ થઈ ગયા છે. અનેક લોકોના શરીરમાં પાણીની કમી થઈ ગઈ તો કેટલાક લોકોને આરોગ્ય સંબંધિત અન્ય સમસ્યા થઈ. હીટસ્ટ્રોકના લક્ષણોમાં શરીરનું ઉચ્ચ તાપમાન, ગરમી, શુષ્ક, હ્રદયના ધબકારા, માથાનો દુખાવો, ચક્કર આવવા, ઉબકા, બેભાન થઈ જવા જેવા લક્ષણો શામેલ છે. આમાંથી કોઈપણ લક્ષણ દેખાય તો તાત્કાલિક ડોકટરની સલાહ લેવી જોઈએ.

શરીર ઉચ્ચ તાપમાનના સંપર્કમાં આવે અથવા વધુ શારીરિક શ્રમ કરે તો હીટસ્ટ્રોકની ચપેટમાં આવી શકે છે. દર મહિને હીટસ્ટ્રોકને કારણે હોસ્પિટલમાં 5થી 6 દર્દીઓ દાખલ થાય છે. એપ્રિલ 2022માં પણ હીટસ્ટ્રોકના દર્દીઓની સંખ્યા વધી હતી અને જૂન 2022 સુધી આ દર્દીઓની સંખ્યા વધતી જતી હતી. મહારાષ્ટ્રના નાનાવતી મેક્સ સુપર સ્પેશિયાલિટી હોસ્પિટલ ઈન્ટરનલ મેડિસિના વરિષ્ઠ સલાહકાર ડૉ.હેમલત્તા અરોરાએ જણાવ્યું છે કે, ગયા સપ્તાહે આઉટડોર પેશન્ટને વધુ થાક લાગવાને કારણે અને ચક્કર આવતા હોસ્પિટલમાં દાખલ કરવા પડ્યા હતા. પૂણાની સૂર્યા મધર એન્ડ ચાઈલ્ડ સુપર સ્પેશિયાલિટી હોસ્પિટલમાં આંતરિક ચિકિત્સા સલાહકાર ડૉ.અનૂપ લાતેને જણાવ્યું હતું કે, બાળકો અને ગર્ભવતી મહિલાઓએ ભીષણ ગરમીથી રાહત મેળવવા માટે વધુ સાવધાની રાખવી જોઈએ અને બપોરે બહાર ના નીકળવું જોઈએ. તમામ રાજ્યો અને શહેરોમાં એક સપ્તાહમાં નિયમિતરૂપે તાપમાન 40 ડિગ્રીને પાર જઈ શકે છે. 

કોણે વધુ સાવધાની રાખવી

• ચિકિત્સા નિષ્ણાંતો જણાવી રહ્યા છે કે, વધુ ઉંમર ધરાવતા લોકોએ 40 ડિગ્રીથી વધુ તાપમાનમાં સાવધાન રહેવું જોઈએ. 
• ડાયાબિટીસ અને બ્લડપ્રેશર ધરાવતા લોકોએ વધુ સાવધાન રહેવું.
• કેટલીક દવાઓને કારણે શરીરમાં પાણીની કમી થઈ જાય છે, જેના કારણે ડિહાઈડ્રેશન થઈ શકે છે અને તમે હીટસ્ટ્રોકનો શિકાર પણ થઈ શકો છો. 
• મહિલાઓએ તાજા ફળનો રસ અને છાશ જેવા પીણાંઓનું સેવન કરવું જોઈએ.
• બાળકો અને ગર્ભવતી મહિલાઓએ દિવસે બહાર જતા સમયે છત્રીનો ઉપયોગ કરવો જોઈએ. 
• બાળકોએ સ્કૂલ દરમિયાન ચહેરા અને હાથને સાફ કરવા માટે પાણીનો ઉપયોગ કરવો.