ઘટાડો / લૉકડાઉનની વચ્ચે સામાન્ય જનતા માટે રાહતના સમાચાર, LPG સિલિન્ડરની કિંમતમાં ઘટાડો

દેશની સૌથી મોટી સરકારી તેલ કંપની ઇન્ડિયન ઓઇલ કોર્પોરેશન લિમિટેડે રસોઇ ગેસની કિંમતોમાં રાજધાની દિલ્હીમાં નોન સબ્સિડી સિલિન્ડર (14.2 કિલો) પર 61 રૂપિયા પ્રતિ સિલિન્ડરનો ઘટાડો કર્યો છે. આ ઘટાડા પછી નવો ભાવ 744 રૂપિયાનું થઇ ગયો છે. માર્ચમાં આ રસોઇ ગેસ સિલિન્ડર 805.50 રૂપિયામાં મળી રહ્યું હતું. નવી કિંમતો 1 એપ્રિલ મતલબ કે આજથી લાગૂ થઇ ગઇ છે. 

તો બીજી તરફ કોલકાતામાં 774.50 રૂપિયા, મુંબઇમાં 714.50 રૂપિયા અને ચેન્નાઇમાં 761.50 રૂપિયા થઇ ગઇ છે જે ક્રમશ: 839.50 રૂપિયા, 776.50 રૂપિયા અને 826 રૂપિયા હતી.

હવે પ્રત્યેક સિલિન્ડર પર 291.48 રૂપિયાની સબસિડી

ફેબ્રુઆરીમાં LPGના ભાવમાં અચાનક વધારા બાદ સરકારે ગેસ સિલિન્ડર પર મળનારી સબસિડીને લગભગ બમણી કરી નાખી હતી. પેટ્રોલિયમ મંત્રાલયે એક નિવેદન જાહેર કરીને કહ્યું હતું કે રાજધાની દિલ્હીમાં પ્રતિ સિલિન્ડર 153.86 રૂપિયાની સબસિડીને વધારીને 291.48 રૂપિયા કરવામાં આવી છે. આ પ્રકારે પ્રધાનમંત્રી ઉજ્જવલા યોજના અંતર્ગત જાહેર કરેલા કનેક્શન પર સબસિડીને 174.86 રૂપિયાથી વધારીને 312.48 રૂપિયા પ્રતિ સિલિન્ડર કરી નાખી છે. ઘરગથ્થુ કનેક્શન પર ગ્રાહકને એક વર્ષમાં 12 સિલિન્ડર પર સબસિડી મળે છે. ત્યારપછી સિલિન્ડરની ખરીદી કરવા પર બજારભાવ ચૂકવવો પડે છે. 

કુદરતી ગેસની કિંમતમાં 26 % ઘટાડો

કુદરતી ગેસની કિંમતમાં મંગળવારે 26 % ઘટાડો કરવામાં આવ્યો હતો. આ કપાત બાદ ગેસના ભાવ 2014 પ્રમાણે થઇ ગયા છે. 2014માં જ ગેસના ભાવ માટે એક ફોર્મ્યૂલા નક્કી કરવામાં આવી હતી. ગેસની કિંમત ઘટવાનો અર્થ એ છે કે હવે સરકારને કંપનીઓ પાસેથી ઓછી કિંમત પર ગેસ મળશે. તેનો અર્થ એ કે ONGC જેવી ગેસ ઉત્પાદન કરતી કંપનીઓની આવકમાં ભારે ઘટાડો થશે. તેથી આશા છે કે CNG અને પાઇપ દ્વારા સપ્લાય થતા રસોઇ ગેસના ભાવ પણ હવે ઘટશે.