- દિવાળીનાં તહેવાર નિમિત્તે સૌ કોઈ પોતાનાં પરિવાર સાથે માદરે વતન જાય છે
- દિવાળીનાં તહેવાર દરમ્યાન ખાનગી વાહન માલિકો દ્વારા ચલાવાય છે ઉઘાડી લૂંટ
- સુરત ડાયમંડ એસોસિયેશન તેમજ GSRTC દ્વારા કરાયું વધારાની એક્સ્ટ્રા બસોનું આયોજન
દિવાળીનાં તહેવારમાં સૌ કોઈ પોતાનાં પરિવાર સાથે માદરે વતન જતા હોય છે. જેને ધ્યાને રાખી સુરત ડાયમંડ એસોસીયેશન તથા ગુજરાત રાજ્ય માર્ગ વાહન વ્યવહાર નિગમ દ્વારા ડાયમંડ સીટી સુરત ખાતે વેપાર ધંધાર્થે સૌરાષ્ટ્ર, પંચમહાલ, અમદાવાદ, ઉત્તર ગુજરાત તથા મહારાષ્ટ્રનાં લોકો માટે વધારાની એસ.ટી. બસોનું આયોજન કર્યું છે. દિવાળીમાં પોતાનાં ઘરે જતા લોકો એડવાન્સ બુકીંગ પણ કરાવી શકે છે.
મુસાફરો માટે ગ્રુપ બુકીંગની પણ વ્યવસ્થા કરાઈ
મુસાફરોને સરળતા રહે તે માટે ગ્રુપ બુકીંગની પણ વ્યવસ્થા કરવામાં આવી છે. જેમાં મુસાફરો 51 સીટનું ગ્રુપ બુકીંગ કરાવી શકશે. એક્સ્ટ્રા બસ તા. 7.11.2023 થી 11.11.2023 નાં રોજ સાંજે 4 થી રાત્રે 10 કલાકે ઉપડશે. ત્યારે સૌરાષ્ટ્રનાં મુસાફરોએ બસમાં બેસવાનું સ્થળ શ્રીસ્વામી આત્માનંદ સરસ્વતી વિદ્યાસંકુલ, કાપોદ્રા, સુરત નક્કી કરવામાં આવ્યું છે. તેમજ એડવાન્સ ઓનલાઈન બુકીંગ WWW.GSRTC.IN પર જઈને તમે ગ્રુપ બુકીંગ અને મોબાઈલ એપ GSRTC થી પણ બુકીંગ કરાવી શકશો. તેમજ ગ્રુપ બુકીંગ તા. 21.9.2023 થી તા. 31.10.2023 સુધી સુરત સેન્ટ્રલ બસ સ્ટેન્ડ, સુરત ખાતે ચાલુ રહેશે.
કેટલું ભાડુ નક્કી કરાયું
સુરત ડાયમંડ એસોસીયેશન તથા ગુજરાત રાજ્ય માર્ગ વાહન વ્યવહાર નિગમ દ્વારા દિવાળીનાં તહેવારમાં માદરે વતન જતા લોકો માટે ખાસ બસની વ્યવસ્થા કરવામાં આવી છે. જેમાં અમુક રૂટ મુજબ ભાડુ પણ નક્કી કરવામાં આવ્યું છે. સુરતથી અમરેલીનાં 395 રૂપિયા, સારવકુંડલાનાં 420 રૂપિયા, ભાવનગરનાં 345 રૂપિયા, મહુવાનાં 400 રૂપિયા, ગારીયાધારનાં 380 રૂપિયા, રાજકોટનાં 380 રૂપિયા, જૂનાગઢનાં 430 રૂપિયા, જામનગરનાં 435 રૂપિયા, અમદાવાદનાં 280 રૂપિયા, ડીસાનાં 380 રૂપિયા, પાલનપુરનાં 370 રૂપિયા, દાહોદનાં 300 રૂપિયા, ઝાલોદનાં 305 રૂપિયા, ક્વાંટનાં 260 રૂપિયા, છોટાઉદેપુરનાં 270 રૂપિયા તેમજ લુણાવાડાનું 280 રૂપિયા ભાડુ નક્કી કરવામાં આવ્યું છે.
