ઇલેક્શન-2022 / થાક બહુ થયો, હવે નવું કરીએ: કોંગ્રેસમાંથી દિગ્ગજ નેતાનું રાજીનામું, કેજરીવાલ સાથે કરી હતી મીટિંગ

• કૈલાશ ગઢવીએ કોંગ્રેસમાંથી આપ્યું રાજીનામું
• પ્રદેશ કોંગ્રેસ પર રોષ ઠાલવી આપ્યું રાજીનામું
•  કૈલાશ ગઢવી AAPમાં જોડાય તેવી શક્યતાઓ

કોંગ્રેસમાં એક સાંધે ત્યાં તેર તૂટે જેવી સ્થિતિ ઉભી થઇ છે. ગુજરાત વિધાનસભા 2022ની ચૂંટણી પહેલા  ગુજરાત કોંગ્રેસમાં ઉકળતા ચરૂની સ્થિતિ સામે આવી છે. કોંગ્રેસના નેતા કૈલાશ ગઢવીએ કોંગેસમાંથી રાજીનામું આપી આપ્યું છે. પ્રદેશ કોંગ્રેસ પર રોષ ઠાલવીને રાજીનામું આપ્યું. આ અંગે તેઓએ પાર્ટી વિરુદ્ધ ટ્વિટ કરીને બળાપો કાઢ્યો હતો. 

ટ્વિટર પર કાઢ્યો બળાપો 

કોંગ્રેસમાં એક બાદ એક નારાજગીના સૂર ઉઠી રહ્યા છે. અહેમદ પટેલના દિકરાએ અગાઉ ટ્વિટ કરીને કોંગ્રેસથી નારાજગી વ્યક્ત કરી હતી. ત્યારે હવે કૈલાસ ગઢવીએ રાજીનામુ આપતા કોંગ્રેસમાં વધુ એક ગાબડું પડ્યું છે. તેઓએ ટ્વિટ કરતા જણાવ્યું કે સત્તા મેળવવા માટે કે સરકાર બનાવવા માટે કટ્ટર સંકલ્પના અભાવમાં છેલ્લા ઘણા સમયથી  કોંગ્રેસનું નેતૃત્વ ગુજરાતમાં સરકાર બનાવવામાં અસફળ રહ્યું છે. જેના કારણે સૌથી વધુ નુકસાન જમીની સ્તર સાથે જોડાયેલા એ કાર્યકર્તાઓને થાય છે જેઓ દિવસ રાત મહેનત કરે છે. હવે  બહુ થાક થયો, ચાલો કંઇક નવું કરીએ. તો બીજી તરફ મળતી માહિતી મુજબ કૈલાશ ગઢવી પક્ષના 10થી 15 જેટલા હોદ્દેદારો પણ કોંગ્રેસ છોડશે.

सत्ता पाने या सरकार बनाने की कट्टर संकल्प के अभाव मै पिछले काफ़ी समय से कोंग्रेस का नेत्रित्व गुजरात मै सरकार बनाने मै असफल रहा है इससे सबसे ज़्यादा नुक़सान ज़मीन से जुड़े उन कार्यकर्तावों का होता है जो दिन रात मेहनत करते है अब थकान बहुत हो गई है - चलो कुछ नया करते है @AICCMedia

— C A Kailash k Gadhvi (@kailashkgadhvi) April 22, 2022

મક્કમતા હજી દેખાતી નથી- કૈલાશ ગઢવી 

વીટીવી ન્યૂઝ સાથે વાત કરતા જણાવ્યું કે 2007થી પાર્ટીમાં એક્ટિવ રહ્યો છું. પાર્ટીએ જે કીધુ એ કામ કર્યું. પરંતુ સરકાર બનાવવાની જે આગ હોયને તેની ઉણપ દેખાય છે.  પાર્ટીને સત્તામાં લાવવા માટે કાર્યકરો મહેનત કરે છે.  પછી થોડા દિવસોમાં વ્યવસ્થા ખોરવાઇ જાય છે, અને પછી એવા નિર્ણયો લેવામાં આવે છે જેના કારણે પાર્ટી સત્તામાં આવતી આવતી રહી જાય છે. ગઇ વખતે પણ 20 સીટી આવી રીતે જ ગઇ. અને હજુ પણ જે મક્કમતા આવવી જોઇએ એ દેખાતી નથી.. જગદીશભાઇ મહેનત ઘણી કરી રહ્યા છે પણ બાકીના લોકો તેમની મહેનત ફળવા દે તેમ નથી લાગતું. 
 

તો શું આપમાં જોડાશે કૈલાશ ગઢવી ?

વીટીવી ન્યૂઝ દ્વારા કૈલાશ ગઢવીએ આગામી રણનીતિ અંગે જ્યારે સવાલ કરવામાં આવ્યો ત્યારે તેઓએ જણાવ્યુ કે આવતી કાલ બપોર સુધીમાં જણાવી દેશે કે તેઓ કયા પક્ષ સાથે જોડાઇ રહ્યા છે. તો બીજી તરફ સૂત્રો દ્વારા મળતી માહિતી અનુસાર, કૈલાશ ગઢવી આપમાં જોડાઈ શકે છે. ઉલ્લેખનીય છે કે, સીએ કૈલાશ ગઢવી કોંગ્રેસ પ્રવક્તા રહી ચૂક્યા છે. પ્રોફેશનલ કોંગ્રેસના વડા પણ રહી ચૂક્યા છે. કૈલાશ ગઢવી થોડા દિવસ પહેલા અરવિંદ કેજરીવાલને મળી ચૂક્યા છે. ત્યારે તે આપમાં જોડાઈને નવાજૂની કરવાના એંધાણ કરે તો નવાઇ નહી.