રાજનીતિ / રાષ્ટ્રપતિ ચૂંટણીમાં માત્ર આ એક વોટથી રાજકારણમાં મચ્યો ખળભળાટ, ભાજપ થઈ ગયું ખુશ

• રાષ્ટ્રપતિ ચૂંટણીમાં NDA ઉમેદવાર દ્રૌપદી મુર્મુની ઐતિહાસિક જીત
• કેરળમાંથી મળેલા આ અણધાર્યા મત પર ભાજપે ખુશી વ્યક્ત કરી
• રાષ્ટ્રપતિ  ચૂંટણીમાં માત્ર એક વોટથી રાજકારણમાં ખળભળાટ  
• 140 સભ્યોની કેરળ વિધાનસભામાં BJP પાસે એકપણ MLA નથી છતાં મત મળ્યો 

રાષ્ટ્રપતિ ચૂંટણીમાં NDA ઉમેદવાર દ્રૌપદી મુર્મુની ઐતિહાસિક જીત થઈ છે. જોકે હવે ચૂંટણીમાં માત્ર એક વોટથી રાજકારણમાં ખળભળાટ મચી ગયો છે. વાત જાણે એમ છે કે, કેરળમાંથી એક મતે રાષ્ટ્રપતિની ચૂંટણીમાં NDA ઉમેદવાર દ્રૌપદી મુર્મુની ઐતિહાસિક જીતમાં ફાળો આપ્યો. જો કે આ વોટને નું કારણ એ છે કે, 140 સભ્યોની રાજ્ય વિધાનસભામાં ભારતીય જનતા પાર્ટી (BJP) પાસે એકપણ ધારાસભ્ય નથી. 

અણધાર્યા મત પર ભાજપે ખુશી વ્યક્ત કરી 

દેશના ઘણા રાજ્યોમાં મુર્મુની તરફેણમાં ક્રોસ વોટિંગ વચ્ચે કેરળમાંથી મળેલા આ અણધાર્યા મત પર ભાજપે ખુશી વ્યક્ત કરી છે. કેરળ વિધાનસભામાં ભાજપની ગેરહાજરીને કારણે એવી ધારણા હતી કે, રાષ્ટ્રપતિની ચૂંટણીમાં વિપક્ષના ઉમેદવાર યશવંત સિંહાને રાજ્યના તમામ મતો મળશે. શાસક કોમ્યુનિસ્ટ પાર્ટી ઓફ ઈન્ડિયા (CPI-M)ના નેતૃત્વ હેઠળના લેફ્ટ ડેમોક્રેટિક ફ્રન્ટ (LDF) અને કોંગ્રેસના નેતૃત્વ હેઠળના યુનાઈટેડ ડેમોક્રેટિક ફ્રન્ટ (UDF) એ પણ સિંહાને સમર્થન જાહેર કર્યું હતું.

ભૂલથી વોટ આપ્યો કે જાણી જોઈને ? 

વિધાનસભા સચિવ પ્રભારી કવિતા ઉન્નિતન જે રિટર્નિંગ ઓફિસરે જણાવ્યું કે, રાષ્ટ્રપતિની ચૂંટણીમાં મતદાન ગુપ્ત મતદાન દ્વારા થયું હતું. તેથી રાજ્ય વિધાનસભામાં મુર્મુની તરફેણમાં કોણે ક્રોસ વોટિંગ કર્યું તે શોધવું શક્ય નથી. રાજકીય નિરીક્ષકો હવે એવો સવાલ પણ ઉઠાવી રહ્યા છે કે,  શું આ એક વોટ નેશનલ ડેમોક્રેટિક એલાયન્સ (NDA)ના ઉમેદવારને ભૂલથી કે જાણી જોઈને આપવામાં આવ્યો હતો.

ભાજપે વ્યક્ત કરી ખુશી 

ભાજપના રાજ્ય એકમે આ અણધાર્યા મતદાન અંગે ખુશી વ્યક્ત કરી છે. પ્રદેશ ભાજપ અધ્યક્ષ કે. સુરેન્દ્રને કહ્યું કે, કેરળમાંથી દ્રૌપદી મુર્મુને મળેલા એક વોટનું અન્ય 139 વોટ કરતા વધુ મહત્વ છે. તે નકારાત્મકતા સામે "સકારાત્મક મત" છે.

દ્રૌપદી મુર્મુની ઐતિહાસિક જીત 

દ્રૌપદી મુર્મુએ વિપક્ષી પાર્ટીઓના ઉમેદવાર યશવંત સિન્હાને હરાવીને આદિવાસી સમુદાયમાંથી પ્રથમ રાષ્ટ્રપતિ બનીને ઈતિહાસ રચ્યો છે. મત ગણતરીમાં મુર્મુને 64 ટકાથી વધુ માન્ય મત મળ્યા હતા. શાસક ભાજપનો દાવો છે કે, સંસદના બંને ગૃહોના 17 સાંસદો અને રાજ્યોના 126 ધારાસભ્યોએ સંબંધિત પક્ષની રેખાઓને અવગણીને NDA ઉમેદવાર દ્રૌપદી મુર્મુની તરફેણમાં મતદાન કર્યું હતું.