દિલ્હી / નાગરિકતા કાયદા વિરુદ્ધ જામિયાના વિદ્યાર્થીઓનું પ્રદર્શન હિંસક બન્યું, 3 બસોને આગ લગાવામાં આવી

• દિલ્હીમાં નાગરિકતા કાનૂનના વિરોધમાં પ્રદર્શન
• વિરોધ પ્રદર્શને હિંસક સ્વરૂપ ધારણ કર્યું
• સાઉથ દિલ્હીમાં ત્રણ બસો અને કેટલીક બાઇકને સળગાવી દેવાઇ

આ દરમિયાન પોલીસની સાથે ઘર્ષણ થયું અને પ્રદર્શનકારીઓએ સાઉથ દિલ્હીની ન્યૂ ફ્રેન્ડ્સ કોલોનીમાં ત્રણ બસો અને કેટલીક બાઇકને સળગાવી દીધી છે. ઘટનાસ્થળ પર ફાયર ફાઇટરના ચાર વાહનોને મોકલવામાં આવ્યા છે. 

પોલીસે જવાબી કાર્યવાહી કરતા ટિયર ગેસ છોડ્યા અને લાઠીચાર્જ કર્યો. પ્રદર્શનકારીઓએ પથ્થરમારો કરીને કેટલીક બસોના કાચ તોડી નાંખ્યા અને ફાયર બ્રિગેડની ગાડીને પણ નુકશાન પહોંચાડ્યું. હાથમાં તિરંગો અને પ્લેકાર્ડ લઇને પ્રદર્શનકારીઓ નવા નાગરિકતા કાનૂન વિરુદ્ધ નારેબાજી કરી રહ્યા છે અને તેને પાછો લેવાની માંગ કરી રહ્યા છે. વિરોધ પ્રદર્શનને કારણે રોડ પરિવહન પ્રભાવિત થયું છે. તેઓએ ન્યૂ ફ્રેન્ડ્સ કોલોનીની સામે મથુરા રોડને પ્રભાવિત કર્યો છે. નોંધનીય છે કે, કેન્દ્રીય દિલ્હીના જંતર-મંતર પર પણ આ કાયદા વિરુદ્ધ પ્રદર્શન થઇ રહ્યું છે, જ્યાં પૂર્વોત્તરના સ્ટૂડન્ટ્સ કાયદાનો વિરોધ કરવા એકઠા થયા છે. 

Traffic Alert

Traffic movement is closed from Okhla Underpass to Sarita Vihar due to demonstration. Kindly avoid this road.

— Delhi Traffic Police (@dtptraffic) December 15, 2019

બીજી તરફ ટ્રાફિક પોલીસે ઓખલા અંડરપાસથી સરિતા વિહાર જતા માર્ગ પર વાહનવ્યવહાર રોકી દીધો છે. લોકોને અપીલ કરાઇ છે કે તેઓ આ રસ્તા જવાનું ટાળે. નોંધનીય છે કે, નવા નાગરિકતા કાયદાના અસ્તિત્વમાં આવ્યા બાદથી જ વિરોધ-પ્રદર્શન થઇ રહ્યા છે. પ્રદર્શનોની વ્યાપક અસર આસામ, પૂર્વોત્તરના રાજ્યો અને પ.બંગાળમાં જોવા મળી રહી છે. 

નાગરિકતા સંશોધન કાયદા પર જામિયા મિલિયા ઇસ્લામિયામાં રવિવારે પણ વિરોધ પ્રદર્શન થયું. ગત ત્રણ દિવસથી અહીં વિદ્યાર્થીઓ CAA વિરુદ્ધ સતત પ્રદર્શન કરી રહ્યા છે.