- IPL 2024 પહેલા મુંબઈ ઈન્ડિયન્સની ટીમ સૌથી વધુ સમાચારમાં બનેલ છે
- રોહિતને MIની કેપ્ટનશિપમાંથી હટાવીને હાર્દિક ને કેપ્ટન બનાવવામાં આવ્યો
- MIનાં આ નિર્ણય બાદ ફ્રેન્ચાઈઝીમાં બધું બરાબર નથી ચાલી રહ્યું..!
ક્રિકેટનો તહેવાર આવી રહ્યો છે....ઈન્ડિયન પ્રીમિયર લીગ એટલે કે IPL 2024ની તૈયારીઓ શરૂ થઈ ગઈ છે;. આ દરમિયાન પાંચ વખતની ચેમ્પિયન રહેલ મુંબઈ ઈન્ડિયન્સની ટીમ સૌથી વધુ સમાચારમાં બનેલ છે. તેની પાછળનું કારણ તો આપણે બધા જાણીએ જ છીએ કે રોહિત શર્માને MIની કેપ્ટનશિપમાંથી હટાવીને હાર્દિક પંડ્યાને નવા કેપ્ટન બનાવવામાં આવ્યાં છે.
ફ્રેન્ચાઈઝીમાં બધું બરાબર નથી ચાલી રહ્યું..!
MIનાં આ નિર્ણય બાદ હવે એવા સમાચાર આવી રહ્યા છે કે ફ્રેન્ચાઈઝીમાં બધું બરાબર નથી ચાલી રહ્યું. IPL ઈતિહાસના સૌથી સફળ કેપ્ટન રોહિત શર્માને હટાવીને હાર્દિકને ટીમનો કેપ્ટન બનાવવાના સમાચારે આ ફ્રેન્ચાઈઝીના સેંકડો ફેન્સ તેમજ ટીમના સભ્યોના દિલ તોડી નાખ્યા છે. સાથે જ સોશિયલ મીડિયા પર પણ ટ્વીટનો ભૂચાલ આવી ગયો છે. દરેક વ્યક્તિ મુંબઈ ઈન્ડિયન્સનાં આ નિર્ણયથી નાખુશ છે અને સોશિયલ મીડિયા પર લોકો હાર્દિક પંડ્યાને ટ્રોલ કરવા માંડ્યા છે. ફેન્સ સતત રોહિત શર્માનાં સમર્થનમાં પોસ્ટ કરી રહ્યાં છે.
આ બે ખેલાડીઓએ સોશિયલ મીડિયા પર કરી પોસ્ટ
એવામાં કદાચ આ તરફ ઈશારો કરીને મુંબઈ ટીમના જૂના સભ્ય અને ભારતીય T-20 ટીમના વર્તમાન કેપ્ટન સૂર્યકુમાર યાદવે પણ સોશિયલ મીડિયા પર તૂટેલા હૃદયની ઈમોજી શેર કરી હતી. જો કે અંહિયા ધ્યાનમાં લેવા જેવી બીજી એક વાત એ છે કે હાર્દિકની ટીમમાં વાપસી બાદ સૂર્યકુમાર ટીમનો પહેલો ખેલાડી નથી, જેણે સોશિયલ મીડિયા પર આવી પોસ્ટ શેર કરી હોય. થોડા દિવસો પહેલા, મુંબઈ ઈન્ડિયન્સ ખેલાડી જસપ્રિત બુમરાહે પણ સોશિયલ મીડિયા પર આવી જ કઇંક પોસ્ટ કરી હતી, જે હાર્દિકના ટીમમાં ફરી જોડાવાને કરને કરી હોય એવું માનવામાં આવી રહ્યું છે.
સૂર્યકુમાર યાદવ છેલ્લી સિઝનમાં MIનો વાઇસ કેપ્ટન હતો
નોંધનીય છે કે સૂર્યકુમાર આઈપીએલની છેલ્લી સિઝનમાં મુંબઈ ઈન્ડિયન્સ ટીમનો વાઇસ કેપ્ટન હતો અને તેણે રોહિત શર્માની ગેરહાજરીમાં કેટલીક મેચોમાં કેપ્ટનશિપ પણ કરી હતી. ભૂતપૂર્વ ક્રિકેટર વસીમ જાફરે કહ્યું, 'કેટલાક એવા ખેલાડીઓ હતા જેઓ (MI) કેપ્ટન બનવાની ખૂબ આશા રાખતા હતા. તેમાંથી એક સૂર્યકુમાર યાદવ છે, જે ભારતીય (T-20) ટીમની કેપ્ટનશીપ કરી રહ્યો છે. તે તકની શોધમાં હતો કારણ કે તેણે તાજેતરમાં જ ભારતની સારી કેપ્ટનશીપ કરી છે.
શું રોહિત સાથે અન્યાય થયો છે?
રોહિત શર્માએ 2013માં પહેલીવાર મુંબઈ ઈન્ડિયન્સની કેપ્ટનશીપ કરી હતી જ્યારે હાર્દિક પંડ્યાની આઈપીએલ કારકિર્દી 2015માં મુંબઈથી શરૂ થઈ હતી. વસીમ જાફર કહે છે, 'મને આશ્ચર્ય થયું કે મુંબઈ ઈન્ડિયન્સ આટલી ઝડપથી રોહિત શર્માથી આગળ વધી ગઈ. તે આટલું ઝડપથી થયું કે મને પણ થોડું આશ્ચર્ય થયું. જ્યારે તેણે ટ્રેડ કર્યો, ત્યારે કદાચ હાર્દિકને જાણ કરવામાં આવી હતી કે તે કેપ્ટન તરીકે આવવાનો છે, પરંતુ રોહિતને તેની જાણ કરવામાં આવી હતી કે કેમ, મને ખબર નથી. પૂર્વ સાઉથ આફ્રિકાના ક્રિકેટર એબી ડી વિલિયર્સ કહે છે, 'હાર્દિક પંડ્યા તેની IPL કારકિર્દીની શરૂઆતથી જ મુંબઈનો ખેલાડી હતો. ટીમમાં તેના વાપસી પર આવી નકારાત્મક પ્રતિક્રિયાઓ જોઈને થોડું આશ્ચર્ય થાય છે.'
