જ્યોતિ મૌર્યથી ઉલટું / વાસણો-કચરાં પોતા કરીને પતિને બનાવ્યો અધિકારી, નોકરી આવતાં દીધો દગો, બીજી વ્હાલી લાગી

• જ્યોતિ મૌર્ય અને આલોકના વિવાદ જેવો જ કિસ્સો
• મધ્યપ્રદેશના દેવાસમા સામે આવ્યું પીડિત પત્નીનું પ્રકરણ 
• ઓફિસર બનાવ્યા બાદ પતિએ પત્નીને છોડીને અન્ય મહિલા સાથે રહેવાનું શરૂ કર્યું

જ્યોતિ મૌર્ય અને આલોકનો વિવાદ તાજેતરમાં જ જગજાહેર થયો છે. જેને લઈને સોશિયલ મીડિયા ખૂબ આ મુદ્દો ગાજી રહ્યો છે. અઢળક મીમ્સ પણ બની ચૂકયા છે. ત્યારે ઘાસ વાત એ પણ છે કે આ કેસ સામે આવ્યા બાદ ઘણા પતિઓએ પોતાની પત્નીઓનો અભ્યાસ પણ છોડાવી દીધો હોવાનો દાવો કરાઈ રહ્યો છે. આ સમગ્ર ઘટનાક્રમ વચ્ચે મધ્યપ્રદેશમાંથી પણ આવો જ કિસ્સો સામે આવ્યો છે. મધ્યપ્રદેશના દેવાસમા સામે આવેલ પ્રકરણમાં પત્ની પીડિત છે. જેમાં પતિને ટેક્સ ઓફિસર બનાવ્યા બાદ પતિએ પત્નીને છોડીને અન્ય મહિલા સાથે રહેવાનું શરૂ કરી દીધું હતું. 

મમતા અને કમરૂએ 2015માં પ્રેમ લગ્ન કર્યા હતા

કમરુ હાથીલે નામના યુવાન સામે આરોપ લાગી રહ્યા છે. મમતા નામની તેમની પત્નીએ દાવો કર્યો હતો કે જ્યારે યુવાન સ્પર્ધાત્મક પરીક્ષાઓની તૈયારી કરતો હતો ત્યારે આર્થિક કટોકટી ભોગવતો હોવાથી તેને ટેકો આપવા માટે તેણે બીજાના ઘરનું કામ કર્યું હતું. મમતાના દાવા પ્રમાણે મમતા અને કમરૂએ 2015માં પ્રેમ લગ્ન કર્યા હતા. ગ્રેજ્યુએટ સુધીનો અભ્યાસ કરવા બાદ પણ કમરું બેરોજગાર હોવાથી મમતાથી આ જોવાતું ન હતું. અને તેને પોતાના પતિને સ્પર્ધાત્મક પરીક્ષાની તૈયારી કરવા માટે પ્રેરિત કર્યો હતો. 

બાદમાં પતિના તમામ ખર્ચની જવાબદારી પણ ઉઠાવી લીધી હતી. કમરુને મદદરુપ થવા માટે મમતાએ અન્ય લોકોના ઘરના વાસણ ધોતી અને ઘરકામ પણ કરવા જતી હતી. કામરુને પુસ્તકો અને નોટો મળી રહે તે માટે તેણે વિવિધ દુકાનોમાં પણ કામ કર્યું હતું. અંતે સફળતાએ કમરુના દ્વાર ખટખટાવ્યા હતા. અને કમરુ પરીક્ષા પાસ કરી 2019-20માં આવકવેરા અધિકારી બની ગયો હતો.

12, 000 રૂપિયા મોકલવા થઈ હતી સહમતી

ઓફિસર બન્યા બાદ કમરૂની પોસ્ટિંગ રતલામમાં મળી હતી અને આ દરમિયાન તેને એક મહિલા સાથે મુલાકાત થઈ હતી. કમરૂએ તેમની પત્ની મમતાને પિયર મોકલી લીધી અને તે આ મહિલા સાથે રહેવા લાગ્યો હતો અને મમતા સાથે રહેવાની મનાઈ કરી દીધી હતી. બાદમાં આ અંગે મમતાએ ઓગસ્ટ 2021 માં તેમના પતિ વિરુદ્ધ ફરિયાદ દાખલ કરાવી હતી. જેમાં સહમતી થઈ હતી કે મમતાના પતિએ મમતાને દર મહિને 12, 000 રૂપિયા મોકલવાના રહેશે. પરંતુ મમતા એવો આરોપ લગાવ્યો છે કે આરોપી પતિ તેમને પૈસા મોકલતો નથી.