તમારા કામનું / અડધા રસ્તે બાઇકમાં પેટ્રોલ ખતમ થઈ જાય તો તરત કરો આ કામ, નહીં લગાવવો પડે ધક્કો

• ઘણી વખત બાઇકમાં અધવચ્ચે જ ફ્યુલ પૂરું થઈ જાય છે
• આવી સ્થિતિમાં ફસાઈ જાઓ તો આ ટિપ્સ અપનાવો 
•  બાઇકને સાઈડ સ્ટેન્ડ પર લગાવો 

આપણા દેશમાં કાર કરતાં ટુ-વ્હીલર્સની સંખ્યા ઘણી વધુ છે. દર મહિને મોટી સંખ્યામાં બાઇક અને સ્કૂટરની ખરીદી થાય છે અને આ ટુ-વ્હીલર્સથી લોકો શહેરથી કરીને ગામડા સુધીની સફર કરે છે. જો કે ટુ-વ્હીલર્સની સૌથી મોટી સમસ્યા એ છે કે તેનું ફ્યુલ ટેન્ક ઘણું નાનું હોય છે અને તેને કારણે જ થોડા થોડા દિવસે તેમાં ફ્યુલ ભરાવવાની જરૂર પડે છે. એવામાં ઘણી વખત એવી પરિસ્થિતિ ઊભી થઈ જાય છે કે અધવચ્ચે જ તેમાં ફ્યુલ પૂરું થઈ જાય છે.  જો તમે પણ કોઈ વખત આવી સ્થિતિમાં ફસાઈ જાઓ તો તેનાથી બચવા માટે અમે તમને કેટલીક ટિપ્સ આપવા જઈ રહ્યા છીએ જેની મદદથી તમે ગાડી ચલાવીને પેટ્રોલ પંપ સુધી પહોંચી શકો છો.

1. ચોકનો ઉપયોગ કરો
તમે જોયું હશે કે મોટાભાગની બાઇક્સ ચોક સિસ્ટમ સાથે આવે છે. બાઈકમાં થોડું પેટ્રોલ હોય ત્યારે એ બંધ થઈ જાય છે. જો કે તેમાં વધુ પેટ્રોલ નથી હોતું પણ તેની મદદથી તમે બાઇક સ્ટાર્ટ કરી શકો છો અને નજીકમાં કોઈ પેટ્રોલ પંપ સુધી પહોંચી શકો છો. પણ આ સિસ્ટમ હવેની મોર્ડન બાઇકમાં આપવામાં આવતી નથી.

2. બાઇકને સાઈડ સ્ટેન્ડ પર લગાવો 
બાઈકમાં ફ્યુઅલ પૂરું થયા પછી પણ તેની ટાંકીની સાઈડમાં થોડીવાર માટે થોડું પેટ્રોલ અટકી જાય છે. એન્જિન સુધી પહોંચતું નથી. આવી સ્થિતિમાં બાઇકને થોડીવાર માટે સાઇડ સ્ટેન્ડ પર રાખો તો આ અટકેલું પેટ્રોલ એન્જિન સુધી પંહોચી જાય છે અને તેનાથી તમે બાઇકને સ્ટાર્ટ કરી શકો છો. 

3. ફ્યુઅલ ટેન્કમાં પ્રેશર બનાવો 
બાઈકમાં ફ્યુઅલ પૂરું થયા પછી તમે આ છેલ્લી યુક્તિનો પણ ઉપયોગ કરી શકો છો. આ મુજબ તમે બાઇકની ફ્યુઅલની ટાંકી ખોલીને તેમાં ફૂંક મારીને તેને બંધ કરી દો. આ કરવાથી ઇંધણને એન્જિન સુધી પહોંચવામાં અને બાઇકને સ્ટાર્ટ કરવામાં સરળતા રહે છે.