- તલાટીની પરીક્ષા પાછી ઠેલાઈને 7 મેના રોજ યોજાશે
- અધ્યક્ષ હસમુખ પટેલની પ્રેસ કોન્ફરન્સ યોજાઈ
- ડમી ઉમેદવારની કોઈ પણ માહિતી આવશે તો પગલાં ભરાશે
તલાટીની પરીક્ષા પાછી ઠેલાઈને 7 મેના રોજ લેવાની જાહેરાત કરવામાં આવી છે.ત્યારે ગુજરાત પંચાયત સેવા પસંદગી મંડળના ઈન્ચાર્જ અધ્યક્ષ હસમુખ પટેલની પ્રેસ કોન્ફરન્સ યોજાઈ હતી. જેમાં તેમણે ડમી ઉમેદવારોને લઈને મોટું નિવેદન આપ્યું હતું. તેમણે કહ્યું કે ડમી ઉમેદવાર માટે બોર્ડને કોઈ પણ માહિતી આવશે તો પગલાં ભરવામાં આવશે. જો કે તે ઉમેદવારની સંપૂર્ણ ઓળખ આપવી પડશે. માહિતી આપનારની ઓળખ ગુપ્ત રાખવામાં આવશે. પ્રેસ કોન્ફરન્સમાં હસમુખ પટેલે કહ્યું કે, જેણે સંમતિ પત્ર ભર્યુ હશે તે જ પરીક્ષા આપી શકશે. ત્યારે હવે પરીક્ષા માટે સંમતિ પત્ર ભરવાનો સમય પૂર્ણ થઈ ગયો છે. આ સ્પર્ધાત્મક પરીક્ષા માટે કુલ 8 લાખ 65 હજાર વિદ્યાર્થીઓએ સંમતિ પત્ર ભર્યું છે. સંમતિ પત્ર ભરનાર પરીક્ષાર્થી જ કોલલેટર ડાઉનલોડ કરી શકશે. આગામી સપ્તાહમાં કોલ લેટર ઉમેદવારો માટે ડાઉનલોડ થઈ શકશે.
ડમી ઉમેદવારોને લઇ હસમુખ પટેલ જુઓ શું બોલ્યા?
'ડમી ઉમેદવારો માટે બોર્ડને જે પણ માહિતી મળશે તેમાં ત્વરિત પગલાં લેવામાં આવશે. ભૂતકાળમાં પણ કોર્ટની પરીક્ષાઓની અંદર કોઇ ડમી ઉમેદવારે ભાગ લીધો હોય એવી જો તમારી પાસે માહિતી હોય તો ચોક્કસથી અમને માહિતી જણાવે. માહિતી આપનારે પોતાની ઓળખ સાથે આપવી પડશે જેથી કરીને કોઇને પણ તેમાં કોઇની વિરૂદ્ધ ખોટા આક્ષેપ કરવાની તક મળે નહીં. એટલે જે લોકો તેમાં પોતાની ઓળખ સાથે માહિતી આપશે એ માહિતીનો ચોક્કસથી ઉપયોગ કરીને અમે આગળની કાર્યવાહી કરીશું. ભૂતકાળની પરીક્ષાઓની અંદર પણ આવું જો થયું હશે તો પણ, જે અમને માહિતી આપશે એની ઓળખ અમે ગુપ્ત રાખીશું. અમે ઓળખની અપેક્ષા એટલાં માટે રાખીએ છીએ કે કોઇની વિરૂદ્ધમાં કોઇને ખોટો આક્ષેપ કરવાની તક ન મળે. ઓળખ ગુપ્ત એટલાં માટે રાખીશું કે જેથી કરીને લોકો નિર્ભય થઇને અમને માહિતી આપી શકે. માત્ર આ ડમી ઉમેદવાર જ નહીં, પરીક્ષામાં કોઇ પણ ગેરરીતિ કરતું હોય તો તેવી કોઇ પણ માહિતી તમે અમને આપી શકશો. અમે કડકમાં કડક કાયદાનો ઉપયોગ કરીને કાયદેસરની કાર્યવાહી કરીશું. પણ એમાં લોકોના પૂરેપૂરા સહકારની અમને અપેક્ષા છે.'
કુલ 8 લાખ 65 હજાર વિદ્યાર્થીઓએ સંમતિ પત્ર ભર્યું
સંમતિ પત્ર બાબતે ગુજરાત પંચાયત સેવા પસંદગી મંડળના ઈન્ચાર્જ અધ્યક્ષ હસમુખ પટેલે મહત્વની માહિતી આપી કે, પરીક્ષા આપવા માટે સંમતિ પત્ર ભરવાનો સમય પૂર્ણ થઈ ગયો છે. કુલ 8 લાખ 65 હજાર વિદ્યાર્થીઓએ સંમતિ પત્ર ભર્યું છે. આગામી 7 મેના દિવસે તલાટીની પરીક્ષા યોજાનાર છે. તેમણએ વધુમાં જણાવ્યું કે, પંચાયત પસંદગી મંડળ દ્વારા લેવાતી આ પરીક્ષા માટે કુલ ૮ લાખ ૬૫ ઉમેદવારોએ સંમતિ પત્ર ભરવામાં આવ્યું છે. અગાઉ ૧૭ લાખ કરતાં ઉમેદવારો પરીક્ષા આપવાના હતા, પણ ૮ લાખ ૬૫ હજાર ઉમેદવારો પરીક્ષા આપશે.
