ગુજરાતનું ગૌરવ / ઇન્ટરનેશનલ કરાટે ચેમ્પિયનશિપ: ભારતના 6 ખેલાડીઓ જશે અમેરિકા, અમદાવાદના એક માત્ર ખેલાડીનો સમાવેશ

• અમેરિકામાં ભારતનું પ્રતિનિધિત્વ કરશે આરવ રાજપૂત
• ભારતમાંથી 6 ખેલાડીઓ જશે અમેરિકા 
• ગુજરાતમાંથી એકમાત્ર અમદાવાદના આરવનો સમાવેશ

એક તરફ અમેરિકાના વિઝા માટે વર્ષોનું વેઇટિંગ આવે છે, ત્યારે બીજી તરફ અમદાવાદના આરવ રાજપૂત અમેરિકામાં ભારતનું પ્રતિનિધિત્વ કરવા જશે. આરવ રાજપૂતના તાત્કાલિક વિઝા થવાના છે. અમેરિકાના સ્પોર્ટ્સ ઓથોરિટી દ્વારા આરવને પત્ર પણ મોકલવામાં આવ્યો છે. આખા વિશ્વમાંથી અમેરિકા કરાટે ચેમ્પિયનો આવવાના છે, તેમાં ભારતનું પ્રતિનિધિત્વ માટે આરવ રાજપૂત અમેરિકા જશે અને આ સ્પર્ધામાં ભાગે લેશે.

આરવ રાજપૂત સાથે ખાસ વાતચીત
VTV ન્યૂઝ દ્વારા આરવ રાજપૂત સાથે ખાસ વાતચીત કરવામાં આવી હતી. આ દરમિયાન આરવ રાજપૂતે જણાવ્યું કે, 'હું કરાટેમાં સળંગ સાત વખત નેશનલ ચેમ્પિયન રહી ચૂક્યો છું. છેલ્લા 15 વર્ષથી હું આ ફિલ્ડમાં છું. ઇન્ટરનેશનલ ચેમ્પિયનશિપ હું પહેલા પણ થાઇલેન્ડ ખાતે રમી ચૂક્યો છું અને મુંબઇમાં રમાયેલી વર્લ્ડ ચેમ્પિયનશિપમાં પણ મને ગોલ્ડ મેડલ મળ્યો હતો.' 

હું દરરોજ સળંગ 8 કલાક કરાટેની પ્રેક્ટિસ કરું છુંઃ આરવ 
તેઓએ જણાવ્યું કે, 'સૌથી પહેલાં નેશનલ ચેમ્પિયન શિપમાં સિલેક્શન થાય છે, તેમાં જેઓને ગોલ્ડ મેડલ મળ્યો હોય તેઓ ઇન્ટનેશનલ ચેમ્પિયનશિપ માટે ક્વોલિફાય થાય છે. અત્યારે હું દરરોજ સળંગ 8 કલાક કરાટેની પ્રેક્ટિસ કરું છું અને મારો ગોલ છે કે હું ભારતનું નામ રોશન કરું.'  

ગુજરાતમાંથી હું એકમાત્ર સિલેક્ટ થયો છુંઃ રાજપૂત
અમેરિકા ઈન્ટરનેશનલ કરાટે ચેમ્પિયનશિપ અંગે જણાવતા તેઓએ જણાવ્યું કે, 'અત્યારે અમેરિકા જવા માટે 2025 સુધી વિઝા મળવા મુશ્કેલ છે, પરંતુ મને વિદેશ મંત્રી અને ગુજરાત સરકારનો ઘણો સપોર્ટ છે. ભારતભરમાંથી 6 ખેલાડીઓ જવાના છે, ગુજરાતમાંથી હું એકમાત્ર સિલેક્ટ થયો છું.' કોમ્પિટિશન વિશે જણાવતા તેઓએ કહ્યું કે, અમેરિકા દ્વારા ઇન્ટરનેશનલ કરાટે ચેમ્પિયનશિપનું આયોજન કરવામાં આવ્યું છે. જેમાં 26 દેશોના ખેલાડીઓ ભાગ લેવાના છે. 

કોણ છે આરવ રાજપૂત?
- અમદાવાદના આરવ રાજપૂત એક નિપુર્ણ સ્પોર્ટ્સ પર્સન છે. 
- આરવ નાનપણથી જ અક્ષય કુમારને રોલ મોડલ માને છે.
- તેઓ જ્યારે ધોરણ 7માં હતા ત્યારથી જ માર્શલ આર્ટ શીખવાનું કર્યું હતું શરૂ
- તેઓએ જાપાનથી બ્લેક બેલ્ટની ડિગ્રી હાંસલ કરી છે.
- તેઓ છેલ્લા 15 વર્ષછી માર્શલ આર્ટમાં એક્ટિવ છે અને ઘણી ચેમ્પિયનશિપ રમી છે.
- આરવે ગુજરાતને સળંગ 4 વખત ગોલ્ડ મેડલ અપાવીને રેકોર્ડ રચ્યો છે 
- તેઓ ઇન્ટરનેશનલ ચેમ્પિયનશિપમાં પણ રમી ચૂક્યા છે.
- બીજી વખત ભારતનું પ્રતિનિધિત્વ કરવા જઈ રહ્યા છે આરવ.