વિરોધ / ....કારણે રાજપૂત સમાજની લાગણી: હવે આ ગુજરાતી ફિલ્મને લઇ કરણીસેના મેદાનમાં, આવતીકાલે વિરોધ

• ગુજરાતી ફિલ્મ તખુભાની તલવારનો વિરોધ કરાશે
• કરણી સેના દ્વારા કરવામાં આવશે વિરોધ
• ફિલ્મ રિલીઝ ન થાય તે માટે મુખ્યમંત્રી અને ગૃહમંત્રીને અપીલ કરી

તાજેતરમાં રિલીઝ થતી અનેક ફિલ્મ લોક રોષનો ભોગ બની રહી છે. જેમાં હાલ પઠાણ ફિલ્મ ચર્ચાના ચકડોળે છે આ ફિલ્મનો ગુજરાતના ખૂણે ખૂણે વિરોધ થઈ રહ્યો છે તેવામાં હવે ગુજરાતી ફિલ્મ તખુભાની તલવારનો પણ લોકો વિરોધ કરી રહ્યા છે અને તેને રિલીઝ થવા પણ પર વાંધો ઉઠાવી રહ્યા છે. આ ફિલ્મને લઈને રાજપૂત સમાજમાં વિરોધનો મધપૂડો છંછેડાયો છે.

રાજપૂત સમાજની લાગણી દુભાઈ

ગુજરાતી ફિલ્મ તખુભાની તલવારનો આવતીકાલે  રિલીઝ થવા જઈ રહી છે આ પહેલા જ વિરોધ ઉઠ્યો છે અને કરણી સેના દ્વારા તેના વિરોધ અને ચીમકી ઉચ્ચારાઈ છે. આવતીકાલે આ ફિલ્મ રિલીઝ થશે તે પહેલા કરણી સેના દ્વારા વિરોધ કરવામાં આવશે. એટલું જ નહીં ફિલ્મ રિલીઝ ન થાય તે માટે મુખ્યમંત્રી અને ગૃહમંત્રીને અપીલ પણ કરવામાં આવી છે. કરણી સેનાના આગેવાનોએ કહ્યું કે ફિલ્મ રિલિઝ થશે ઉગ્ર વિરોધ કરીશુ. કારણકે કે આ ગુજરાતી ફિલ્મમાં ક્ષત્રિય સમાજને નીચો દેખાડવામાં આવ્યો હોવાની કરણી સેનાએ રાવ ઉઠાવી છે.  ફિલ્મના અમુક અંશોના કારણે રાજપૂત સમાજની લાગણી દુભાઈ રહી હોવાનું કરણી સેનાના અગ્રણીઓએ કહ્યું હતું.

પઠાણ ફિલ્મનો વિરોધ

બીજી બાજુ શાહરુખ ખાન અને દીપિકા પાદુકોણની પઠાણ ફિલ્મનો પણ વિરોધ ચાલી રહ્યો છે. આ ફિલ્મના 'બેશરમ રંગ' ગીતમાં દીપિકા પાદુકોણ ભગવા રંગની બિકીની પહેરીને ચેષ્ટાઓ કરતી હોવાથી વિરોધ જાગ્યો છે. ત્યારે ફિલ્મની રિલીઝ પર પ્રતિબંધ મુકવા સહિતની માગણીઓ ઉઠી રહી છે.