મહામારી / ગુજરાત સરકાર પોતાના જ આંકડાઓમાં ફસાઈ : વેન્ટિલેટર મુદ્દે જે ગોટાળા માર્યા તે જાણીને ચોંકી જશો

• રાજ્ય સરકારના આંકડાઓમાં અસમંજસતા
• સરકારના જણાવ્યા અનુસાર 700 દર્દીઓ વેન્ટિલેટર પર
• રાજ્યમાં કુલ વેન્ટિલેટરની સંખ્યા 6,574, 5800 વેન્ટિલેટર ઉપલબ્ધ
• બીજી તરફ વેન્ટિલેટર માટે દર્દીઓએ મારવા પડે છે ફાંફા

વેન્ટિલેટરનો આંકડો ખોટો કે પછી ગંભીર દર્દીઓનો?

ગુજરાત અને આખો દેશ અત્યારે કોરોના વાયરસના સંકટમાંથી પસાર થઈ રહ્યો છે. રાજ્યમાં કોરોના વાયરસઆ દર્દીઓની સંખ્યા વધી રહી છે અને દરરોજ હજારોની સંખ્યામાં લોકો આ મહામારીની ઝપેટમાં આવી રહ્યા છે ત્યારે રાજ્યની સરકાર તથા તંત્ર આંકડાઓના ખેલમાં હોય તેવું દેખાઈ રહ્યું છે. અત્યાર સુધી તંત્ર પર આરોપ લાગતાં હતા કે તંત્ર મોતના આંકડાઓમાં ખેલ કરે છે અને ઓછા મોત દર્શાવવામાં આવે છે પરંતુ હવે વેન્ટિલેટરના આંકડાઓમાં પણ રમત રમાતી હોવાનું સામે આવી રહ્યું છે. રાજ્ય સરકારના આંકડાઓમાં મુદ્દે ખૂબ જ મૂંઝવણ છે. 

સરકાર પોતાના જ આંકડાઓમાં જ ફસાઈ 

ગુજરાત સરકાર દ્વારા આપવામાં આવેલ માહિતી અનુસાર રાજ્યમાં 700 દર્દીઓ એવા છે જે વેન્ટિલેટર પર છે. હવે ગુજરાત રાજ્યમાં કુલ વેન્ટિલેટર 6,574 છે સરકાર જ કહે છે કે 5800 જેટલા વેન્ટિલેટર ઉપલબ્ધ છે. સર્વવિદિત છે કે ગુજરાતમાં ગંભીર દર્દીઓને વેન્ટિલેટર બેડ નથી મળી રહ્યા અને મળે તો ભારે જહેમત કરવી પડે એવામાં સવાલ ઊભો થાય છે કે જો સરકારના આંકડા સાચા હોય તો આ હજારો વેન્ટિલેટર છે ક્યાં? અને જો વેન્ટિલેટરના આંકડા સાચા હોય તો રાજ્યમાં ગંભીર દર્દીઓની સાચી સંખ્યા કેટલી છે? સરકાર સંખ્યા કેમ છુપાવી રહી છે? 

ભારતમાં કોરોનાની બીજી લહેરનો કહેર 

ભારત અત્યારે કોરોના વાયરસની બીજી ભયંકર લહેરનો સામનો કરી રહ્યો છે. આ લહેરમાં છેલ્લા ઘણા દિવસથી દરરોજ ત્રણથી ચાર લાખ કોરોના વાયરસના કેસ સામે આવી રહ્યા છે. આ સિવાય હોસ્પિટલોમાં બેડનો અભાવ અને ઑક્સીજન મળી નથી રહ્યો તથા પ્રજા પારવાર મુશ્કેલીનો સામનો કરી રહી છે ત્યારે આ સંકટ વહેલા જાય તેવી પ્રાર્થના દેશભરના નાગરિકો કરી રહ્યા છે.

કોરોના વાયરસ કેસ અપડેટ (8 મે, 2021)

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 11,892 નવા કેસ નોંધાયા છે તો સંક્રમણના કારણે આજે સતત બીજા દિવસે 119 લોકોના મોત નિપજ્યા છે. તો પ્રથમ ઘટના છે કે, કોરોનાની બીજી લહેરમાં કોરોનાના કેસ કરતા બીજી વખત સાજા થનારનો આંકડો વધુ છે. ઉલ્લેખનીય છે કે, છેલ્લા 24 કલાકમાં રાજ્યમાં સતત બીજા દિવસે 119 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 8273 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ઘટાડો જોવા મળ્યો છે. જો કે, નવા કેસની સામે આજે ગુજરાતમાં 14,737 દર્દીઓ સાજા થયાં છે. આ સાથે જ અત્યાર સુધીમાં 5,18,234 દર્દીઓ કોરોના મુક્ત થયાં છે. આમ આજે કેસ વધ્યા છે પરંતુ સાજા થનારનો આંકડો રાહત આપનારો છે. રાજ્યમાં હાલ 782 લોકો વેન્ટિલેટર પર છે. એક્ટિવ કેસનો આંકડો 1,43,421 પર પહોંચ્યો છે.