હડતાળનો અંત / 23 દિવસ બાદ પંચાયત હસ્તકના વર્ગ-3ના આરોગ્ય કર્મીઓની માંગ સ્વીકારાઈ, એક મહિનામાં આવશે તમામ પ્રશ્નોનો નિકાલ

• પંચાયત હસ્તકના વર્ગ-3ના કર્મચારીઓ હડતાળનો આખરે અંત આવ્યો
• એક મહિનામાં તમામ પ્રશ્નોનો નિકાલ કરવામાં આવશે- વાઘાણી
• 130 દિવસના પગાર માટે સકારાત્મક છીએઃઆરોગ્ય મંત્રી

130 દિવસના પગાર માટે સરકાર સકારાત્મક છીએ: ઋષિકેશ પટેલ

છેલ્લા 23 દિવસથી હડતાળ પર ઉતરેલા આરોગ્યકર્મીઓની માંગ અંતે ગુજરાત સરકારે સ્વીકારી લીધી છે. આ મામલે રાજ્ય સરકારના પ્રવક્તા જીતુ વાઘાણીએ નિવેદન આપતા જણાવ્યું કે, 'એક મહિનામાં તમામ પ્રશ્નોનો નિકાલ કરવામાં આવશે. આરોગ્ય કર્મચારી મહાસંઘ અમારી વાતથી સહમત છે.' આરોગ્ય મંત્રી ઋષિકેશ પટેલે પણ આ મુદ્દે નિવેદન આપતા કહ્યું કે, '130 દિવસના પગાર માટે સરકાર સકારાત્મક છીએ.'

પગાર વિસંગતતાના પ્રશ્નનો એક મહિનામાં નિકાલની બાંહેધરી: રણજીતસિંહ મોરી

ત્યારે આરોગ્ય કર્મચારી મહાસંઘના પ્રમુખ રણજીતસિંહ મોરીએ નિવેદન આપતા જણાવ્યું કે, 'પંચાયત હસ્તક આરોગ્યના 16 હજાર કર્મચારીઓ છે. પગાર વિસંગતતાના પ્રશ્નનો એક મહિનામાં નિકાલની બાંહેધરી આપીએ છીએ. પગાર વિસંગતતા ક્ષતિ દૂર કરવા માંગ સ્વીકારાઈ છે. જો એક મહિનામાં પ્રશ્નનો નિકાલ નહીં આવે તો આંદોલન યથાવત રહેશે.'

ઉલ્લેખનીય છે કે, જિલ્લા પંચાયતના આરોગ્ય કર્મચારીઓ પોતાની માંગ પર અડગ છે ત્યારે ગાંધીનગર ખાતે આજે આંદોલન કમિટીની બેઠકમાં સરકાર દ્વારા મહત્વનો નિર્ણય કરવામાં આવ્યો છે. જેમાં આરોગ્ય કર્મીઓની માંગ સ્વીકારવામાં આવી છે.

જાણો શું છે આરોગ્ય કર્મચારીઓની માંગ?

પડતર માંગણીઓને લઈ આરોગ્ય કર્મચારીઓ ઉતર્યા હતા હડતાળ પર
ગુજરાત રાજય આરોગ્ય કર્મચારી મહાસંઘના નેજા હેઠળ હડતાળ
ગ્રેડ-પે સહિતના મુદ્દાઓને લઇ ચોથી વખત આરોગ્ય કર્મચારીઓની હડતાળ
2017, 2019 અને 2021માં કર્મચારીઓ માંગણીઓને લઇ હડતાળ પર ઉતર્યા હતા
અગાઉ સરકારે માંગણીઓનું સમાધાન માટે આપ્યું હતું આશ્વાસન
આરોગ્ય કર્મચારીઓની ગ્રેડ-પે રૂપિયા 1 હજાર 900થી વધારી રૂપિયા 2 હજાર 800 કરવા માંગ
કોવિડ સમયમાં કરેલા કામનું ભથ્થું આપવા માંગ
ફેરણી ભથ્થું (PTA) આપવા કર્મચારીઓની માંગ